 ថា ខ្លួនចង់ឃើញថៃ ដោះលែងកងទ័ពខ្មែរទាំង ១៨នាក់ភ្លាមៗក្រោយភាគីទាំងពីរបានចុះហត្ថលេខាលើកិច្ចព្រមព្រៀងសន្តិភាពកាលពីចុងសប្តាហ៍កន្លងទៅ។){kind=link}
សហរដ្ឋអាមេរិក ដាស់តឿនរដ្ឋាភិបាលលោក អនុធីន ឆានវីរៈគុល (Anutin Charnvirakul) ថា ខ្លួនចង់ឃើញថៃ ដោះលែងកងទ័ពខ្មែរទាំង ១៨នាក់ភ្លាមៗក្រោយភាគីទាំងពីរបានចុះហត្ថលេខាលើកិច្ចព្រមព្រៀងសន្តិភាពកាលពីចុងសប្តាហ៍កន្លងទៅ។
ទីភ្នាក់ងារសារព័ត៌មាន រ៉យទ័រ (Reuters) បានរាយការណ៍នៅថ្ងៃទី២៨ តុលា នេះថា មន្ត្រីជាន់ខ្ពស់ក្រសួងការបរទេសរបស់ថៃ បានអះអាងថា សហរដ្ឋអាមេរិក រំពឹងថាប្រទេសថៃ នឹងធ្វើការជាមួយប្រទេសកម្ពុជា ដើម្បីចាប់ផ្តើមដំណើរការដោះលែងទាហានកម្ពុជា ទាំង ១៨នាក់ភ្លាមៗ បន្ទាប់ពីមេដឹកនាំនៃប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិភាពក្រោមវត្តមានរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។
ប្រភពដដែល បញ្ជាក់ថា ដំណើរការនៃការដោះលែងទាហានកម្ពុជា ទាំងនេះ គឺទាក់ទងនឹងការប្ដេជ្ញាចិត្តរបស់ប្រទេសថៃ ដែលនោះគឺជាក្តីរំពឹងរបស់អាមេរិក ក្រោយមេដឹកនាំទាំងពីរបានឯកភាពគ្នាដោះលែងចំណាប់ខ្មាំងទាំងនោះដែលបានកំណត់ក្នុងកិច្ចព្រមព្រៀងសន្តិភាពកាលពីថ្ងៃទី២៦ ខែតុលា កន្លងទៅថ្មីៗនេះ។
ការអះអាងនេះ ធ្វើឡើងបន្ទាប់ពីថៃ យល់ព្រមដោះលែងទាហានខ្មែរទាំង ១៨នាក់ដែលត្រូវបានកំណត់ក្នុងកិច្ចព្រមព្រៀងសន្តិភាពរវាងមេដឹកនាំនៃប្រទេសទាំងពីរ។
នាយករដ្ឋមន្ត្រីកម្ពុជា លោក ហ៊ុន ម៉ាណែត និងនាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) កាលពីថ្ងៃទី២៦ ខែតុលា បានចុះហត្ថលេខាលើកិច្ចព្រមព្រៀងសន្តិភាពដើម្បីបញ្ចប់ជម្លោះព្រំដែន ដែលមានប្រធានាធិបតីអាមេរិក លោក ដូណាល់ ត្រាំ (Donald Trump) ធ្វើជាសាក្សី ខណៈកិច្ចព្រមព្រៀងនេះបានកំណត់ឱ្យមានការដោះលែងចំណាប់ខ្មាំងសង្គ្រាមផងដែរ ក្រៅពីការកំណត់ឱ្យភាគីទាំងពីរគោរពច្បាប់អន្តរជាតិ និងសន្ធិសញ្ញានានា។
គណៈកម្មាធិការនាយកក្លឹបអ្នកកាសែតកម្ពុជា (ក.អ.ក) លោក ពុយ គា បានធ្វើសេចក្តីរាយការណ៍ពីប្រទេសម៉ាឡេស៊ី នៅថ្ងៃទី២៨ តុលា នេះថា ក្នុងជំនួបទ្វេភាគីជាលើកដំបូងក្រោយជម្លោះព្រំដែនរវាងនាយករដ្ឋមន្ត្រីកម្ពុជា លោក ហ៊ុន ម៉ាណែត ជាមួយនាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) អំឡុងពេលចូលរួមកិច្ចប្រជុំកំពូលអាស៊ាន ក៏បានលើកអំពីទាហានកម្ពុជា ទាំង ១៨នាក់ដែរ ប៉ុន្តែមិនទាន់មានការវិវត្តជាវិជ្ជមាននៅឡើយទេ។
ជុំវិញបញ្ហានេះ ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី២៨ តុលា នេះថា វីរៈកងទ័ពកម្ពុជា ចំនួន ១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ មានរយៈពេល ៩១ថ្ងៃហើយ ខណៈរាជរដ្ឋាភិបាលបានប្រើគ្រប់យន្តការដោះស្រាយទាំងអស់ដើម្បីឱ្យភាគីថៃ ដោះលែងកងកម្លាំងទាំងនោះវិលត្រឡប់មកប្រទេសកំណើតវិញឱ្យបានឆាប់ និងដោយសុខសុវត្ថិភាព។
ប្រភពដដែល បញ្ជាក់ថា រាជរដ្ឋាភិបាលកម្ពុជា បានអំពាវនាវឱ្យភាគីថៃ ដោះលែងទាហានខ្មែរទាំង ១៨នាក់ ត្រឡប់មកវិញឱ្យបានឆាប់ ដើម្បីជួបជុំក្រុមគ្រួសារ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។
ជុំវិញបញ្ហានេះ កាសែត ខៅស៊ុត (Khaosod) របស់ថៃ បានចុះផ្សាយកាលពីថ្ងៃទី៤ ខែសីហា កន្លងទៅថា កងទ័ពភូមិន្ទថៃ (RTA) បានចាត់ទុកទាហានកម្ពុជា ទាំង ១៨នាក់ ជាអ្នកទោសសង្គ្រាម (POW) ខណៈកងទ័ពភូមិន្ទថៃ ក៏កំពុងរៀបចំបញ្ជូនទាហានកម្ពុជា ទាំង ១៨នាក់នោះ ត្រឡប់មកមាតុភូមិវិញដែរ នៅពេលដែលស្ថានការណ៍ព្រំដែនធូរស្រាលទាំងស្រុង។
កាលពីថ្ងៃទី៣០ ខែកក្កដា ឆ្នាំ២០២៥ មេបញ្ជាការតំបន់ប្រតិបត្តិការសឹករងខេត្តព្រះវិហារ ឧត្ដមសេនីយ៍ទោ ច័ន្ទ សុភ័ត្រា បានប្រាប់អនុព័ន្ធយោធា និងមន្ត្រីការទូតទាំង ១៣ប្រទេសថា ក្រោយបទឈប់បាញ់ចូលជាធរមាន ទាហានថៃ បានប្រើល្បិចកលចាប់ទាហានកម្ពុជា ចំនួន ២២នាក់។
ប្រភពដដែល អះអាងថា ក្រោយពេលមានបទឈប់បាញ់ ទាហានថៃ បានដើរមកស្វាគមន៍ទាហានកម្ពុជា ដោយសម្ដែងនូវការស្រុះស្រួលគ្នា និងស្នើសុំទាហានកម្ពុជា ថតរូបជាមួយគ្នាថែមទៀត ប៉ុន្តែពេលកំពុងថតរូប ក្រុមទាហានថៃ ដែលបង្កប់ខ្លួននៅក្នុងព្រៃ ក៏ចេញមកភ្ជង់កាំភ្លើងចាប់ខ្លួនទាហានខ្មែរទាំងនោះតែម្តង ប៉ុន្តែមានទាហានខ្មែរម្នាក់បានរត់រួចខ្លួន ក្រោយពុតធ្វើជាស្លាប់។
ក្រោយចាប់ខ្លួន ៣ថ្ងៃ ក្រសួងការពារជាតិកម្ពុជា បានអះអាងកាលពីថ្ងៃទី០១ ខែសីហា ឆ្នាំ២០២៥ ថា ភាគីថៃ បានប្រគល់ទាហានខ្មែរត្រឹមតែ ៣នាក់ប៉ុណ្ណោះមកឱ្យកម្ពុជា វិញ។
ប្រភពដដែល បញ្ជាក់ថា នៅថ្ងៃទី៣១ ខែកក្កដា ថៃបានបញ្ជូនសាកសពទាហានខ្មែរម្នាក់ និងថ្ងៃទី១ ខែសីហា ថៃក៏បានបញ្ជូនទាហានខ្មែរ ២នាក់បន្ថែមទៀត ប៉ុន្តែទាហានម្នាក់មានរបួសធ្ងន់ និងបាក់ដៃ ខណៈទាហានម្នាក់ទៀតមានស្មារតីមិនគ្រប់គ្រាន់។
ជុំវិញបញ្ហានេះ សហគមន៍ខ្មែរក្នុងប្រទេសអូស្ត្រាលី នៅថ្ងៃទី២៨ ខែតុលា នេះ បានធ្វើដំណើររាប់រយគីឡូម៉ែត្រទៅដល់សភាសហព័ន្ធក្នុងទីក្រុងកង់បេរ៉ា (Canberra) ប្រទេសអូស្ត្រាលី ដើម្បីយកញត្តិប្រគល់ឱ្យតំណាងរាស្ត្រប្រទេសអូស្ត្រាលី លោក ម៉ាក ដ្រេហ្វើស (Hon. Mark Dreyfus) ទាមទារឱ្យថៃ គោរពកិច្ចព្រមព្រៀងសន្តិភាពទីក្រុងប៉ារីស និងដោះលែងទាហានខ្មែរទាំង ១៨នាក់ដោយឥតលក្ខខណ្ឌ៕
© 2025, ឌឹ ខេមបូឌា ដេលី. All rights reserved.