ក្រសួងការពារជាតិកម្ពុជា ស្នើឱ្យភាគីថៃ ដោះលែងទាហានខ្មែរទាំង ១៨នាក់ ត្រឡប់មកប្រទេសកំណើតវិញ ខណៈកងទ័ពថៃ ទាមទារឱ្យកម្ពុជាអនុវត្តនូវលក្ខខណ្ឌដ៏តឹងរ៉ឹងមួយចំនួន មុននឹងគេដោះលែងទាហានខ្មែរទាំងនេះ។
ក្រសួងការពារជាតិនៃប្រទេសកម្ពុជា ចេញសេចក្តីប្រកាសព័ត៌មាននៅថ្ងៃទី០៤ វិច្ឆិកា ដោយអំពាវនាវទៅកាន់ភាគីថៃ ឱ្យដោះលែងកងទ័ពកម្ពុជា ទាំង ១៨នាក់ ឱ្យត្រឡប់មកប្រទេសកំណើតវិញឱ្យបានឆាប់ ដើម្បីឱ្យពួកគេអាចជួបជុំក្រុមគ្រួសារប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។
ប្រភពដដែល អះអាងថា គិតត្រឹមថ្ងៃទី០៤ ខែវិច្ឆិកា នេះ គឺមានរយៈពេល ៣ខែ ៨ថ្ងៃហើយ (៩៨ថ្ងៃ) ដែលវីរកងទ័ពកម្ពុជា ចំនួន ១៨នាក់ ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ ចាប់តាំងពីចុងខែកក្កដា ឆ្នាំ២០២៥ មក។
ក្រសួងការពារជាតិកម្ពុជា បញ្ជាក់ថា រាជរដ្ឋាភិបាលកម្ពុជាមិនដែលបោះបង់កងកម្លាំងជាតិរបស់ខ្លួនចោលឡើយ ទោះក្នុងកាលៈទេសៈណាក៏ដោយ ក្រោមកិច្ចខិតខំប្រឹងប្រែងឥតឈប់ឈរដោយប្រើគ្រប់យន្តការដោះស្រាយគ្រប់បែបយ៉ាង ដើម្បីឱ្យភាគីថៃ ដោះលែងទាហានខ្មែរទាំង ១៨នាក់នេះឱ្យអាចវិលត្រឡប់មកទឹកដីកំណើតវិញឱ្យបានឆាប់។
កាសែត The Nation របស់ថៃ បានចុះផ្សាយសម្ដីអ្នកនាំពាក្យរងនៃកងទ័ពថៃ លោក ចុងចិត វ៉ាចារ៉ាណាន់ (Jongjet Vacharanan) នៅថ្ងៃទី៤ វិច្ឆិកា ថា ដើម្បីឱ្យភាគីថៃ ដោះលែងទាហានខ្មែរទាំង ១៨នាក់នោះវិញ លុះត្រាតែអរិភាពរវាងប្រទេសទាំងពីរត្រូវបញ្ចប់ជាផ្លូវការ មានការដកអាវុធធុនធ្ងន់ និងបញ្ចប់ប្រតិបត្តិការបោសសម្អាតមីនក្នុងទីតាំងសំខាន់ទាំង៥ ជាមុនសិន។
តំបន់ទាំងនេះ រួមមាន តំបន់បានសាយធូ (Ban Sai Tho 10) ក្នុងខេត្តបុរីរាំ តំបន់ចុងហៀវ (Chong Hew) ក្នុងខេត្តសូរិន្ទ តំបន់បានណងចាន់ (Ban Nong Chan) និងតំបន់បានណងយ៉ាកែវ (Ban Nong Ya Kaew) ក្នុងខេត្តស្រះកែវ រួមទាំងតំបន់បានចំរ៉ាក់ ក្នុងខេត្តត្រាត ផងដែរ។
អ្នកនាំពាក្យរូបនេះ អះអាងថា ការឃុំខ្លួនទាហានកម្ពុជា ដែលជាអ្នកទោសសង្គ្រាម គឺអនុវត្តតាមអនុសញ្ញាទីក្រុងហ្សឺណែវ ដែលចែងថា អ្នកទោសសង្គ្រាមត្រូវតែដោះលែង និងធ្វើមាតុភូមិនិវត្តន៍ដោយគ្មានការពន្យារពេល បន្ទាប់ពីការបញ្ចប់អរិភាពសកម្មនឹងគ្នា។
មន្ត្រីយោធាថៃ ដដែល ព្រមានថា ជម្លោះកម្ពុជា-ថៃ មិនទាន់បញ្ចប់ទេ ទោះបីជាមានការព្រមព្រៀង មានបទឈប់បាញ់គ្នា និងការប្រកាសព្រមព្រៀងសន្តិភាពនៅប្រទេសម៉ាឡេស៊ី ក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ ក៏ដោយ។
សេចក្តីប្រកាសរួមព្រមព្រៀងរកសន្តិភាព កាលពីថ្ងៃទី២៦ ខែតុលា រវាងកម្ពុជា-ថៃ មិនបានចែង ឬមិនបានកំណត់ឱ្យដោះលែងចំណាប់ខ្មាំងសង្គ្រាម និងលក្ខខណ្ឌមួយចំនួនទៀត ខណៈប្រធានាធិបតីអាមេរិក លោក ដូណាល់ ត្រាំ ក៏គ្រាន់តែបានថ្លែងស្នើក្នុងពិធីចុះកិច្ចព្រមព្រៀងនេះ ជំរុញឱ្យមានការដោះលែងទាហានខ្មែរទាំង ១៨នាក់នោះផង។
កាលពីថ្ងៃទី៣០ ខែកក្កដា ឆ្នាំ២០២៥ មេបញ្ជាការតំបន់ប្រតិបត្តិការសឹករងខេត្តព្រះវិហារ ឧត្ដមសេនីយ៍ទោ ច័ន្ទ សុភ័ត្រា អះអាងថា ក្រោយបទឈប់បាញ់ចូលជាធរមាន ទាហានថៃ បានប្រើល្បិចកលចាប់ទាហានកម្ពុជា ចំនួន ២២នាក់ដោយរំលោភបទឈប់បាញ់ ប៉ុន្តែទាហានខ្មែរម្នាក់បានរត់រួចខ្លួនក្រោយពីពុតធ្វើជាស្លាប់។
ជុំវិញបញ្ហានេះ ក្រសួងការពារជាតិកម្ពុជា បានអះអាងកាលពីថ្ងៃទី០១ ខែសីហា ឆ្នាំ២០២៥ ថា ក្រោយចាប់ខ្លួនទាហានខ្មែរបាន ៣ថ្ងៃ ភាគីថៃ បានបញ្ជូនសាកសពទាហានខ្មែរម្នាក់នៅថ្ងៃទី៣១ ខែកក្កដា ខណៈទាហានខ្មែរ ២នាក់ទៀត ត្រូវទាហានថៃ បញ្ជូនមកនៅថ្ងៃទី១ ខែសីហា ប៉ុន្តែទាហានម្នាក់មានរបួសធ្ងន់ និងបាក់ដៃ និងទាហានម្នាក់ទៀតមានស្មារតីមិនគ្រប់គ្រាន់។
គិតចាប់តាំងពីកម្ពុជា-ថៃ បានចុះហត្ថលេខាលើសេចក្តីប្រកាសរួមព្រមព្រៀងស្វែងសន្តិភាព កាលពីថ្ងៃទី២៦ ខែតុលា មកដល់ពេលនេះ ទាហានខ្មែរទាំង ១៨នាក់ដែលត្រូវភាគីថៃ ចាប់ឃុំខ្លួន នៅតែត្រូវបានកងទ័ពថៃ បន្តឃុំខ្លួនដដែល៕
© 2025, ឌឹ ខេមបូឌា ដេលី. All rights reserved.