 ដោយប្រើសន្ធិសញ្ញា និងកិច្ចព្រមព្រៀងនានា ក្រោយពីថៃ ប្រកាសដើរចេញពីកិច្ចព្រមព្រៀងសន្តិភាពជាមួយកម្ពុជា នាពេលនេះ។){kind=link}
អ្នកតាមដានស្ថានការណ៍កម្ពុជា ជំរុញឱ្យកម្ពុជា ត្រូវប្រញាប់បញ្ជូនពាក្យបណ្ដឹងប្តឹងថៃ ទៅតុលាការយុត្តិធម៌អន្តរជាតិ (ICJ) ដោយប្រើសន្ធិសញ្ញា និងកិច្ចព្រមព្រៀងនានា ក្រោយពីថៃ ប្រកាសដើរចេញពីកិច្ចព្រមព្រៀងសន្តិភាពជាមួយកម្ពុជា នាពេលនេះ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត សរសេរលើគណនីហ្វេសប៊ុករបស់ខ្លួននៅថ្ងៃទី១២ វិច្ឆិកា នេះថា កម្ពុជាត្រូវអនុវត្តនូវវិធានការបន្ទាន់មួយចំនួនសម្រាប់ឧបសគ្គចំពោះមុខដែលភាគីថៃ បានប្រកាសលុបកិច្ចព្រមព្រៀងសន្តិភាពដែលមានអាមេរិក និងម៉ាឡេស៊ី ចូលរួមធ្វើជាសាក្សីកាលពីពេលកន្លងទៅនេះ។
អ្នកឃ្លាំមើលសង្គមរូបនេះលើកឡើងថា រដ្ឋាភិបាលកម្ពុជា ចាំបាច់ត្រូវប្រញាប់ស្នើទៅកាន់សហរដ្ឋអាមេរិក និងប្រធានអាស៊ានប្តូរវេន នាយករដ្ឋមន្ត្រីម៉ាឡេស៊ី ដើម្បីដាក់សម្ពាធទៅលើភាគីថៃ ក្នុងកម្រិតការទូតខ្ពស់បំផុត ឱ្យពួកគេងាកមកគោរពកិច្ចព្រមព្រៀងសន្តិភាពនេះវិញ។ ជាងនេះទៀត កម្ពុជាក៏ត្រូវតែប្រញាប់បញ្ជូនពាក្យបណ្ដឹងប្តឹងថៃ ទៅតុលាការយុត្តិធម៌អន្តរជាតិដែរ ហើយការប្តឹងផ្តល់នេះ កម្ពុជាត្រូវប្រើឯកសារគន្លឹះ ដូចជា សន្ធិសញ្ញាបារាំង-សៀម និងផែនទីបារាំង អមសន្ធិសញ្ញានេះ ដោយភ្ជាប់ជាមួយឯកសារពាក់ព័ន្ធនានា រួមទាំងកិច្ចព្រមព្រៀងសន្តិភាពកម្ពុជា-ថៃ នៅទីក្រុងកូឡាឡាំពួរ ព្រមទាំងរបាយការណ៍របស់ក្រុមអង្កេតការណ៍អន្តរជាតិ (IOT) និងក្រុមអង្កេតការណ៍អាស៊ាន (AOT) ផងដែរ។
កាលពីថ្ងៃទី១១ ខែវិច្ឆិកា កាសែតថៃ The Nation បានរាយការណ៍សម្ដីនាយករដ្ឋមន្ត្រីថៃ លោក អនុធីន ឆានវីរៈគុល (Anutin Charnvirakul) ថា ប្រទេសថៃ បានប្រកាសលុបចោលលក្ខខណ្ឌទាំង ៤ប្រការ ដែលបានកំណត់ក្នុងសេចក្តីថ្លែងការណ៍រួមជាមួយកម្ពុជា នៅទីក្រុងកូឡាឡាំពួរ ហើយ ព្រោះរដ្ឋាភិបាលរបស់លោកនឹងគាំទ្រយ៉ាងពេញទំហឹងដល់ប្រតិបត្តិការយោធាដើម្បីសន្តិសុខជាតិ។
ជុំវិញបញ្ហានេះ អ្នកស្រាវជ្រាវអំពីការអភិវឌ្ឍសង្គម បណ្ឌិត មាស នី សរសេរលើគណនីហ្វេសប៊ុករបស់ខ្លួនកាលពីថ្ងៃទី១១ វិច្ឆិកា ថា ដើម្បីឆ្លើយទៅនឹងទង្វើក្រឡេចក្រឡុចរបស់ភាគីថៃ កម្ពុជាត្រូវតែប្រុងប្រៀបការពារខ្លួនឲ្យបានខ្ពស់បំផុតជាងពេលដែលផ្ទុះសង្គ្រាម ៥ថ្ងៃ កាលពីចុងខែកក្កដា កន្លងទៅទៅទៀត។
ចំណែកអតីតមេធាវីសាលាក្ដីខ្មែរក្រហម លោក កង ឫទ្ធិគិរី បានលើកឡើងថា ថៃបានយកពាក្យថា កម្ពុជាចង់បានសន្តិភាព ធ្វើជាចំណាប់ខ្មាំងចាប់តាំងតែពីចុះកិច្ចព្រមព្រៀងសន្តិភាព នៅទីក្រុងកូឡាឡាំពួរ កាលពីចុងខែតុលា មក។
លោក កង ឫទ្ធិគិរី បញ្ជាក់ថា ស្ថានភាពនៅតាមព្រំដែនកម្ពុជា បានប្រែប្រួលពីស្ងប់ស្ងាត់មកជាតានតឹងកាន់តែខ្លាំង បន្ទាប់ពីទស្សនកិច្ចរបស់នាយករដ្ឋមន្ត្រីថៃ ទៅកាន់ប្រទេសចិន កាលពីពេលថ្មីៗនេះ ហើយការប្រែប្រួលស្ថានការណ៍ព្រំដែនកម្ពុជា-ថៃ នាពេលនេះ ក៏ទំនងជាមានភ្លើងខៀវពីចិន ដែរ៕
© 2025, ឌឹ ខេមបូឌា ដេលី. All rights reserved.