អ្នកឃ្លាំមើលសង្គមព្យាករថា អតីតមេបញ្ជាការយោធភូមិភាគទី២ របស់ថៃ ឧត្ដមសេនីយ៍ឯក ប៊ុនស៊ីន ផាតក្លាង នឹងចូលឆាកនយោបាយថៃ ហើយវត្តមាននេះមិនត្រឹមតែជាបេក្ខជនតំណាងរាស្ត្រទេ ប៉ុន្តែគឺជាបេក្ខជននាយករដ្ឋមន្ត្រីថៃ ដែលតំណាងឱ្យអំណាចនយោបាយរាជវាំងថៃ តែម្តង។
អតីតមេធាវីសាលាក្ដីខ្មែរក្រហម លោក កង ឫទ្ធិគិរី សរសេរលើគណនីហ្វេសប៊ុករបស់ខ្លួននៅថ្ងៃទី២ មករា នេះថា តាមរយៈនៃការអង្កេតលើមូលហេតុពិតនៃការផ្ទុះសង្គ្រាមកម្ពុជា-ថៃ ទាំងពីរលើករហូតមានបទឈប់បាញ់ទាំងពីរលើក និងការផ្អាកជម្លោះបណ្ដោះអាសន្ននាពេលនេះ គឺជាសង្គ្រាមដែលមានការព្រាងទុករបស់ប្រទេសថៃ ជាយូរមកហើយ។
ប្រភពដដែលអះអាងថា អ្នកបង្កើត និងចូលរួមផែនការសង្គ្រាមជាមួយកម្ពុជា នាពេលនេះ គឺផ្តើមចេញមកពីអ្នកនយោបាយ និងឈ្មួញទុច្ចរិតនៃប្រទេសទាំងពីរដែលត្រូវបានដាក់ឱ្យសម្ដែងដោយទាហានទាំងសងខាង ហើយជាលទ្ធផលចុងក្រោយបណ្ដោះអាសន្ន បង្ហាញឱ្យឃើញថា ថៃចំណាយច្រើនជាងខ្មែរ ប៉ុន្តែទទួលបានផលតិច។
លោកថា លទ្ធផលបណ្ដោះអាសន្ននៃសង្គ្រាមនេះ បង្ហាញឱ្យឃើញពីសមត្ថភាពប្រយុទ្ធថ្មីរបស់ទាហានខ្មែរទល់នឹងទាហានថៃ ក្នុងសម័យទំនើបផងដែរ ខណៈតំបន់ដែលត្រូវទាហានថៃ កាន់កាប់បានតិចតួចតាមព្រំដែននៅពេលនេះ ក៏គ្រាន់តែជាលទ្ធផលបណ្ដោះអាសន្នប៉ុណ្ណោះ មិនមែនជាការកាន់កាប់ផ្លូវការឡើយ។
អ្នកច្បាប់រូបនេះបញ្ជាក់ថា សរុបសេចក្ដីមក អ្វីៗគឺស្ថិតក្នុងសភាពបណ្ដោះអាសន្នទាំងអស់ រួមទាំងសន្តិភាពក្រោយបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ កន្លងទៅផងដែរ ប្រសិនបើបញ្ហាព្រំដែនមិនត្រូវបានដោះស្រាយតាមសន្ធិសញ្ញាបារាំង-សៀម ទេនោះ។
ការអះអាងនេះ ធ្វើឡើងស្របពេលដែលសង្គ្រាមកម្ពុជា-ថៃ កំពុងស្ងប់ស្ងាត់ក្រោយកិច្ចព្រមព្រៀងបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ កន្លងទៅនេះ។
សង្គ្រាមកម្ពុជា-ថៃ បានផ្ទុះឡើងកាលពីថ្ងៃទី២៤ ខែកក្កដា ឆ្នាំ២០២៥ ប៉ុន្តែសង្គ្រាមនេះបានផ្អាកទៅវិញក្រោយបទឈប់បាញ់ដែលផ្ដួចផ្ដើមដោយប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី២៨ ខែកក្កដា ឆ្នាំ២០២៥ កន្លងទៅ។
យ៉ាងណាក៏ដោយ សង្គ្រាមនេះបានផ្ទុះឡើងសាជាថ្មីនៅថ្ងៃទី៧ ខែធ្នូ ឆ្នាំ២០២៥ ប៉ុន្តែក៏បានផ្អាកទៅវិញម្តងទៀតដែរ ក្រោយការចរចាឱ្យមានបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ នាពេលថ្មីៗនេះ ហើយសង្គ្រាមទាំងពីរលើកនេះ គឺផ្តើមចេញមកពីជម្លោះព្រំដែននៅតំបន់មុំបីកាលពីថ្ងៃទី២៨ ខែឧសភា ឆ្នាំ២០២៥ កន្លងទៅនោះ។
កាលពីព្រឹកព្រលឹមថ្ងៃទី២៨ ខែឧសភា ឆ្នាំ២០២៥ វេលាម៉ោង ០៥ និង ៤៥នាទី កងទ័ពកម្ពុជា និងកងទ័ពថៃ បានប៉ះទង្គិចគ្នារយៈពេល ១០នាទីនៅចំណុចព្រំដែនចុងបូក ខេត្តអ៊ូប៊ុនរ៉ាត់ថានី ប្រទេសថៃ ទល់នឹងចំណុចព្រំដែនមុំបី ភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ របស់កម្ពុជា។
ក្រសួងការពារជាតិកម្ពុជា បានចេញសេចក្តីប្រកាសព័ត៌មានភ្លាមៗថា ក្នុងហេតុការណ៍ផ្ទុះអាវុធនេះ បានបណ្តាលឱ្យទាហានខ្មែរម្នាក់ឈ្មោះ សួន រោន អាយុ ៤៨ឆ្នាំ មានទីលំនៅក្នុងភូមិកំពេញ ឃុំយាង ស្រុកជាំក្សាន្ត ខេត្តព្រះវិហារ ស្លាប់ភ្លាមៗនៅនឹងកន្លែង ដោយសារការបាញ់ប្រហារពីសំណាក់យោធាថៃ។
ជុំវិញសង្គ្រាមនេះ កាសែតថៃ The Nation បានស្រង់សម្ដីមេបញ្ជាការយោធភូមិភាគទី២ របស់ថៃ លោក Boonsin Padklang កាលពីអំឡុងខែមិថុនា ឆ្នាំ២០២៥ ថា ថៃនឹងមិនដោះបញ្ហាព្រំដែននៅតុលាការយុត្តិធម៌អន្តរជាតិ (ICJ) ជាមួយកម្ពុជា ឡើយ ប៉ុន្តែថៃ ចង់ធ្វើសង្គ្រាមជាមួយកម្ពុជា ដើម្បីកាន់កាប់ទឹកដី ជាពិសេសតំបន់ទាំង៤ គឺតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី។
ជាងនេះទៀត កាលពីថ្ងៃទី១៤ ខែធ្នូ ឆ្នាំ២០២៥ កាសែត Thai PBS បានស្រង់សម្ដីនាយសេនាធិការកងទ័ពជើងគោកថៃ លោក ឆៃយ៉ាព្រឹក ឌួងប្រាផាត (Chaiyapruek Duangpraphat) ថា គោលដៅចុងក្រោយរបស់កងទ័ពថៃ ជុំវិញសង្គ្រាមជាមួយកម្ពុជា គឺថៃ ត្រូវតែបន្សាបសមត្ថភាពយោធារបស់កម្ពុជា ឱ្យបានក្នុងរយៈពេលយូរ ហើយដើម្បីសម្រេចគោលដៅនេះ ប្រទេសថៃ ចាំបាច់ត្រូវតែបំផ្លាញបរិក្ខារ និងហេដ្ឋារចនាសម្ព័ន្ធយោធារបស់កម្ពុជា ទាំងអស់។
នៅថ្ងៃសុក្រ ទី២ ខែមករា ឆ្នាំ២០២៦ នេះ សារព័ត៌មានភាសាអង់គ្លេសថៃ Thai Examiner ផ្សាយអត្ថបទមួយបន្ទាប់ពីពលទាហានថៃ រកឃើញរូងក្រោមដីចោះលុងផ្ទាំងថ្មដ៏ជ្រៅខ្វាត់ខ្វែងនៅម្តុំព្រំប្រទល់ដែនខ្មែរ-ថៃ ក្នុងខេត្តព្រះវិហារ និងខេត្តឧប៊ុន ដែលមេទ័ពថៃ គិតថាលោក ហ៊ុន សែន និងលោក ហ៊ុន ម៉ាណែត បានត្រៀមរៀបចំធ្វើសង្គ្រាមរយៈពេលយូរអង្វែងជាមួយប្រទេសថៃ។
ជុំវិញបញ្ហានេះ ប្រធានព្រឹទ្ធសភាកម្ពុជា លោក ហ៊ុន សែន បានអះអាងកាលពីថ្ងៃទី២៦ ខែមិថុនា ឆ្នាំ២០២៥ ថា ជម្លោះព្រំដែនកម្ពុជា-ថៃ មានមូលហេតុចេញពីជម្លោះផ្ទៃក្នុងក្នុងប្រទេសថៃ ហើយចោទថារាល់ពេលដែលផ្ទៃក្នុងថៃ កើតមានជម្លោះ ពួកគេតែងតែផ្ទេរជម្លោះនោះមកកម្ពុជា ជាពិសេសគឺការឈ្លានពានទឹកដីខ្មែរតែម្តង។
ផ្ទុយទៅវិញ សារព័ត៌មានថៃ The Nation ផ្សាយថ្ងៃទី១១ ខែកក្កដា ឆ្នាំ២០២៥ ថា ពលរដ្ឋថៃ ត្រេកអរសម្បើមនៅពេលកម្លាំងភ្នាក់ងារមានសមត្ថកិច្ចថៃ បង្ក្រាបបណ្ដាញឆបោកអនឡាញទាក់ទងនឹងសេដ្ឋីជិតស្និទ្ធនឹងលោក ហ៊ុន សែន ព្រមទាំងគ្រួសារ ដូចជា ឧកញ៉ា កុក អាន ឧកញ៉ា លី យ៉ុងផាត់ ក្មួយប្រសា កុក អាន ជាដើម ដែលបង្កើតមណ្ឌលឆបោកក្នុងប្រទេសថៃឡង់ដ៍។
ពលរដ្ឋថៃ ប្រាប់កាសែតថា បើលោក ហ៊ុន សែន មិនប្រេះស្រាំគ្នានឹងលោក ថាក់ស៊ីន ស៊ីណាវ៉ាត់ ដែលកំពុងជាប់គុក ទំនងជាអាជ្ញាធរថៃ មិនអាចបង្ក្រាបបាននៅឡើយទេមកទល់ពេលនេះ៕
© 2026, ឌឹ ខេមបូឌា ដេលី. All rights reserved.