កម្ពុជា បដិសេធរាល់សំណង់ថ្មីទាំងអស់របស់ថៃ ដែលបានសាងសង់លើទឹកដីខ្មែរ បន្ទាប់ពីពួកគេចូលទៅកាន់កាប់ដោយខុសច្បាប់ក្រោយសង្គ្រាមឈ្លានពានកាលពីចុងខែធ្នូ ឆ្នាំ២០២៥ កន្លងទៅ។
ក្រសួងការបរទេសកម្ពុជា បានចេញសេចក្តីប្រកាសព័ត៌មាននៅថ្ងៃទី១៨ មីនា នេះ ថា កងកម្លាំងប្រដាប់អាវុធថៃ បានប្រើប្រាស់គ្រឿងចក្រធុនធ្ងន់ជីកកកាយដី និងសាងសង់លេណដ្ឋានបេតុងថ្មីមួយបន្ថែមទៀតនៅតំបន់ភាគអាគ្នេយ៍នៃប្រាសាទតាមាន់ធំ ក្នុងខេត្តឧត្ដរមានជ័យ។ ចំណែកនៅតំបន់មុំបី ខេត្តព្រះវិហារ ម្តុំភ្នំ៤៦៩ ក៏ត្រូវបានកងកម្លាំងប្រដាប់អាវុធថៃ ធ្វើសកម្មភាពឈូសឆាយដីសាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន រួមទាំងសាងសង់រូបសំណាកព្រះពុទ្ធបដិមាផងដែរ។
ជាងនេះទៀត នៅទីតាំងភូមិថ្មដូន ស្រុកបន្ទាយអំពិល ខេត្តឧត្ដរមានជ័យ កងកម្លាំងប្រដាប់អាវុធថៃ បានធ្វើសកម្មភាពឈូសឆាយដី និងសាងសង់ផ្លូវ ព្រមទាំងរចនាសម្ព័ន្ធអចិន្ត្រៃយ៍មួយចំនួននៅភាគខាងលិចនៃតំបន់ដំណាក់ស្តេច។
រីឯនៅតំបន់អានសេះ ខេត្តព្រះវិហារ វិញ ក៏ត្រូវបានកងកម្លាំងប្រដាប់អាវុធថៃ ធ្វើសកម្មភាពឈូសឆាយដីសាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន ព្រមទាំងលើកទង់ជាតិថៃ ថែមទៀត។
ប្រភពដដែលអះអាងថា សកម្មភាពស្រដៀងគ្នានេះ ត្រូវបានគេសង្កេតឃើញកើតមាននៅទីតាំងជាច្រើនដែរ ដូចជា នៅម្តុំច្រកទ្វារព្រំដែនអន្តរជាតិអានសេះ អូរផ្កាស្នេហ៍ ភ្នំ៦៧៧ និងភ្នំ៥០០ ដែលកងកម្លាំងប្រដាប់អាវុធថៃ រួមជាមួយព្រះសង្ឃថៃ បានសាងសង់រូបសំណាកព្រះពុទ្ធមួយអង្គនៅទីនោះ។
ក្រសួងការបរទេសកម្ពុជា អះអាងថា ក្រៅពីនេះ នៅតំបន់តាថាវ ខេត្តព្រះវិហារ ក៏ត្រូវបានកងកម្លាំងប្រដាប់អាវុធថៃ ធ្វើសកម្មភាពឈូសឆាយដីសាងសង់ផ្លូវ និងសំណង់បេតុងអចិន្ត្រៃយ៍មួយចំនួន ខណៈនៅម្តុំតំបន់ប្រាសាទដូនទុន ភ្នំ៥០៥ ភ្នំ៣៣៣ និងតំបន់ច្រកតាថាវ ក៏ត្រូវពួកគេធ្វើសកម្មភាពដូចគ្នានេះដែរ។
ចំណែកឯតំបន់តាសឹម និងចាក់ច្រែង ខេត្តព្រះវិហារ ក៏ត្រូវបានកងកម្លាំងប្រដាប់អាវុធថៃ ឈូសឆាយដីសាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួនដែរ។ លើសពីនេះ ពួកគេបានសាងសង់រូបសំណាកព្រះពុទ្ធមួយចំនួននៅទីតាំងផ្សេងៗក្នុងទឹកដីកម្ពុជា រួមទាំងតំបន់តាថាវ និងភ្នំទ្រព្យ ខេត្តព្រះវិហារ តំបន់អូរស្មាច់ និងប្រាសាទខ្នា ខេត្តឧត្ដរមានជ័យ ដោយមានជំនួយពីព្រះសង្ឃថៃ។
ក្រសួងការបរទេស និងសហប្រតិបត្តិការអន្តរជាតិ បញ្ជាក់ថា សកម្មភាពយោធាថៃ ទាំងនេះ គឺជាការរំលោភបន្ថែមទៀតលើមាត្រា ៥ នៃអនុស្សរណៈនៃការយោគយល់គ្នារវាងកម្ពុជា-ថៃ ស្ដីពីការវាស់វែង និងបោះបង្គោលព្រំដែន ដែលបានចុះហត្ថលេខានៅថ្ងៃទី១៤ ខែមិថុនា ឆ្នាំ២០០០ ក៏ដូចជាចំណុចទី១ នៃសេចក្តីប្រកាសរួមរបស់គណៈកម្មាធិការព្រំដែនទូទៅ (GBC) កាលពីចុងខែធ្នូ ឆ្នាំ២០២៥ កន្លងទៅផងដែរ។
ក្នុងពេលចុងក្រោយនេះ ពលរដ្ឋខ្មែរបានចែកចាយសកម្មភាពយោធាថៃ ចូលទឹកដីខ្មែរជាហូរហែ ដូចជា ការចូលទៅគ្រប់គ្រងស្ថានីយក្រុមហ៊ុនប្រេងឥន្ធនៈយីហោ CE មួយកន្លែងដែលជារបស់ខ្មែរ ក្នុងតំបន់ថ្មដា ខេត្តពោធិ៍សាត់។
ពាក់ព័ន្ធនឹងបញ្ហានេះ កាសែត Thai Enquirer បានស្រង់សម្ដីអ្នកនាំពាក្យកងទ័ពថៃ លោក Withai Laithomya ដែលបាននិយាយកាលពីថ្ងៃទី១៧ ខែមីនា ថា ប្រទេសថៃ កំពុងដំណើរការគម្រោងសាកល្បងសាងសង់របងព្រំដែនអចិន្ត្រៃយ៍តាមបណ្តោយព្រំដែនថៃ-កម្ពុជា។
ប្រភពដដែលអះអាងថា ការសាងសង់របងអចិន្ត្រៃយ៍នេះ គ្រោងចាប់ផ្តើមនៅដើមខែមេសា ឆ្នាំ២០២៦ ខាងមុខនេះ ហើយរំពឹងថានឹងបញ្ចប់ក្នុងរយៈពេលប្រហែល ៤៥ថ្ងៃ ព្រោះការសម្របសម្រួលជាមួយកម្ពុជា បានបញ្ចប់ហើយ ខណៈភាគីកម្ពុជា ក៏កំពុងអភិវឌ្ឍផ្លូវស្របតាមផ្នែកព្រំដែនរបស់ពួកគេដែរ។
ការសាងសង់ដំណាក់កាលដំបូងមានប្រវែងប្រហែល ១,៣គីឡូម៉ែត្រ ចន្លោះបង្គោលព្រំដែនលេខ ៥២ ដល់បង្គោលព្រំដែនលេខ ៥៤៕
© 2026, ឌឹ ខេមបូឌា ដេលី. All rights reserved.