ប្រធានព្រឹទ្ធសភាកម្ពុជា លោក ហ៊ុន សែន ចាត់ទុកទង្វើកងទ័ពថៃ ដែលចល័តចូលមកចាប់ទាហានខ្មែរក្នុងបន្ទាយនៃទឹកដីកម្ពុជា ក្រោយពីកិច្ចព្រមព្រៀងបទឈប់បាញ់ចូលជាធរមាន គឺជាការបំពានលើកិច្ចព្រមព្រៀងនេះយ៉ាងធ្ងន់ធ្ងរ ដែលបានហាមប្រាមកងទ័ពនៃប្រទេសទាំងពីរមិនឱ្យធ្វើការចល័តកងទ័ព និងហាមបន្ថែមកងទ័ព ជាដើម។
មេដឹកនាំបក្សកាន់អំណាច លោក ហ៊ុន សែន សរសេរលើទំព័រហ្វេសប៊ុករបស់ខ្លួននៅថ្ងៃទី៤ សីហា នេះថា កម្ពុជាបានបន្តអនុវត្តដោយម៉ឺងម៉ាត់នូវបទឈប់បាញ់ និងពង្រឹងកិច្ចការពារខ្លួនប្រឆាំងនឹងការរំលោភគ្រប់រូបភាពពីភាគីម្ខាងទៀត។
យ៉ាងណាមិញ រឿងថារំលោភកិច្ចព្រមព្រៀងបទឈប់បាញ់គ្នាក្រោយមេដឹកនាំប្រទេសទាំងពីរជួបគ្នានៅរាជធានីប៊ុត្រាជ័យា ប្រទេសម៉ាឡេស៊ី គេមើលឃើញពីក្រៅតំបន់នេះថា មិនដឹងជាអ្នកណារំលោភមុននោះទេ ពីព្រោះសុទ្ធតែជារឿងចោទគ្នាទៅវិញទៅមក ខ្មែរចោទថៃ ថាបំពាន ឯថៃ ចោទខ្មែរថាបំពានដូចគ្នា។ គេរង់ចាំមើលសេចក្តីរាយការណ៍ពីក្រុមអ្នកសង្កេតការណ៍ផ្ទាល់នៅលើសមរភូមិ។
មេដឹកនាំបក្សកាន់អំណាចរូបនេះលើកឡើងថា រដ្ឋាភិបាលកម្ពុជាបានត្រៀមស្នើសុំទៅកាកបាទក្រហមអន្តរជាតិ ដើម្បីបំពេញតួនាទីជួយដល់កងទ័ពកម្ពុជា ចំនួន ១៨រូបដែលត្រូវទាហានថៃ ចល័តទ័ពចូលមកចាប់ខ្លួនក្នុងបន្ទាយនៃកងទ័ពកម្ពុជា ទោះកិច្ចព្រមព្រៀងឈប់បាញ់ចូលជាធរមានរយៈពេលប្រមាណ ៨ម៉ោងទៅហើយនោះ។
លោក ហ៊ុន សែន ចោទជាសំណួរថា តើមានហេតុផលអ្វីដែលថៃ មិនព្រមប្រគល់កងទ័ពកម្ពុជា ១៨រូបមកឲ្យកម្ពុជាវិញ?
សារព័ត៌មាន ខៅស៊ុត របស់ប្រទេសថៃ ចុះផ្សាយនៅថ្ងៃទី៤ សីហា នេះថា ថៃបានចាត់ទុកកងទ័ពខ្មែរដែលត្រូវពួកគេចាប់ខ្លួនជាអ្នកទោសសង្គ្រាម ដោយសំអាងថាទាហានខ្មែរទាំង ២០នាក់នោះបានចុះចាញ់ទាហានថៃ អំឡុងពេលប្រតិបត្តិការយោធា ប៉ុន្តែពួកគេនឹងត្រូវដោះលែងឱ្យត្រឡប់ទៅវិញនៅពេលសង្គ្រាមរវាងប្រទេសទាំងពីរត្រូវបានបញ្ចប់។
ប្រភពដដែលបន្តថា បច្ចុប្បន្ន ថៃរក្សាការឃុំឃាំងទាហានខ្មែរដែលចុះចាញ់សរុបចំនួន ១៨នាក់ ព្រោះទាហានខ្មែរ ២នាក់ក្នុងចំណោមទាហានទាំង ២០នាក់នោះ ត្រូវបានទាហានថៃ បញ្ជូនត្រឡប់ទៅប្រទេសកម្ពុជា វិញហើយ ដោយសារសុខភាពមិនល្អ។
ជុំវិញបញ្ហានេះ សកម្មជនក្នុងសហគមន៍ខ្មែរនៅទីក្រុងឡងប៊ិច លោក មួង ណារ៉េត លើកឡើងថា នៅទីបំផុត ថៃបានចាត់ទុកទាហានខ្មែរដែលពួកគេប្រើល្បិចចាប់ខ្លួនដោយខុសច្បាប់ថាជាឈ្លើយសឹកសង្គ្រាម ដូច្នេះ ថៃត្រូវតែដោះលែងកងទ័ពខ្មែរទាំងនោះជាបន្ទាន់ និងដោយឥតលក្ខខណ្ឌ ព្រោះទាហានថៃ ចាប់ខ្លួនអ្នកទាំងនោះក្រោយកិច្ចព្រមព្រៀងបទឈប់បាញ់ចូលជាធរមាន។
យ៉ាងណាក៏ដោយ ក្រោយបទឈប់បាញ់ចូលជាធរមាន គឺនៅថ្ងៃទី២៩ ខែកក្កដា ឆ្នាំ២០២៥ ទាហានថៃ បានប្រើល្បិចកលចាប់ទាហានកម្ពុជា ចំនួន ២០នាក់ ក្នុងនោះ ទាហានខ្មែរបានរត់រួចម្នាក់ ប៉ុន្តែ ២នាក់ទៀតត្រូវទាហានថៃ បាញ់សម្លាប់។
តាមព័ត៌មានផ្សាយពីពេលមុនកន្លងមក គេនិយាយអះអាងតាមគ្នាថា ទាហានខ្មែរចាញ់កលទាហានថៃ គេហៅទៅចាប់ដៃគ្នាថតទុកជាអនុស្សាវរីយ៍ រួចចាប់ដាក់ខ្នោះ ពោលគឺផ្ទុយពីការអះអាងថាទាហានថៃ ចូលមកចាប់ទាហានខ្មែរដល់ក្នុងបន្ទាយក្នុងទឹកដីខ្មែរ៕
© 2025, ឌឹ ខេមបូឌា ដេលី. All rights reserved.