 ប្រកាសត្រៀមខ្លួន ២៤ម៉ោងលើ ២៤ម៉ោង ប្រយុទ្ធជាមួយកម្ពុជា ដើម្បីធានាការពារទឹកដីថៃ និងដើម្បីដណ្តើមយកប្រាសាទតាក្របី និងប្រាសាទខ្នារ ដែលមានទីតាំងស្ថិតនៅភាគខាងកើតប្រាសាទតាក្របី ពីកម្ពុជា ត្រឡប់ទៅវិញ។){kind=link}
មេបញ្ជាការភូមិភាគទី២ របស់ថៃ លោក វីរ៉ាយុទ្ធ រ៉ាកស៊ីល (Weerayuth Raksilp) ប្រកាសត្រៀមខ្លួន ២៤ម៉ោងលើ ២៤ម៉ោង ប្រយុទ្ធជាមួយកម្ពុជា ដើម្បីធានាការពារទឹកដីថៃ និងដើម្បីដណ្តើមយកប្រាសាទតាក្របី និងប្រាសាទខ្នារ ដែលមានទីតាំងស្ថិតនៅភាគខាងកើតប្រាសាទតាក្របី ពីកម្ពុជា ត្រឡប់ទៅវិញ។
កាសែត The Nation របស់ថៃ នៅថ្ងៃទី១៣ ខែតុលា នេះ បានស្រង់សម្ដីមេបញ្ជាការយោធាភូមិភាគទី២ របស់ថៃ លោក វីរ៉ាយុទ្ធ រ៉ាកស៊ីល (Weerayuth Raksilp) ថា ផែនការដណ្តើមយកប្រាសាទទាំងពីរនេះមកវិញ ត្រូវបានរៀបចំរួចរាល់ហើយ និងត្រូវអនុវត្តនៅពេលសមស្របតាមលក្ខខណ្ឌប្រតិបត្តិការ ខណៈកងកម្លាំងទាំងអស់ដែលដាក់ពង្រាយតាមបណ្តោយព្រំដែន ក៏បានត្រៀមខ្លួនជាស្រេចក្នុងការប្រយុទ្ធគ្រប់ពេលដែរ។
ប្រភពដដែល អះអាងថា មេបញ្ជាការភូមិភាគទី២ ថៃ បានណែនាំកងទ័ពថៃ ទាំងអស់ ឲ្យឆ្លើយតបទៅនរណាក៏ដោយដែលចូលក្នុងទឹកដីថៃ ដោយមានអាវុធ និងរំលោភបំពានអធិបតេយ្យភាពរបស់ថៃ។ ជាងនេះទៀត ប្រសិនបើទាហានកម្ពុជា ឆ្លងចូលប្រទេសថៃ ដោយមានអាវុធ និងបំផ្លាញទ្រព្យសម្បត្តិ យោធាថៃមិនអាចអត់ឱនឲ្យបានឡើយ ទោះក្នុងកាលៈទេសៈណាក៏ដោយ។
មេបញ្ជាការយោធាភូមិភាគទី២ ថៃ រូបនេះ បញ្ជាក់ថា កងកម្លាំងថៃ ត្រូវបានអនុញ្ញាតឲ្យឆ្លើយតបតាមស្ថានភាពជាក់ស្តែងគ្រប់ពេល ខណៈកងកម្លាំងគ្រប់រូបនៅតែតាំងចិត្តការពារអធិបតេយ្យភាពជាតិ និងប្រជាជនរបស់ខ្លួនយ៉ាងម៉ឺងម៉ាត់ ដោយប្ដេជ្ញាមិនបោះបង់ទឹកដីថៃ សូម្បីតែមួយសង់ទីម៉ែត្រ។
លោក វីរ៉ាយុទ្ធ រ៉ាកស៊ីល ត្រូវបានតែងតាំងកាលពីថ្ងៃទី៥ ខែកញ្ញា ឆ្នាំ២០២៥ ជាមេបញ្ជាការភូមិភាគ២ ជំនួសតំណែងលោក ប៊ុនស៊ីន ផាតក្លាង (Boonsin Padklang) ដែលត្រូវចូលនិវត្តន៍កាលពីដើមខែតុលា នេះ។
ជុំវិញបញ្ហានេះ សារព័ត៌មានដែលស្និទ្ធនឹងរដ្ឋាភិបាលកម្ពុជា Fresh News បានរាយការណ៍នៅថ្ងៃទី១៣ តុលា នេះថា គណៈកម្មការចម្រុះព្រំដែនគោកកម្ពុជា-ថៃ (JBC) បានឯកភាពគ្នាជាគោលការណ៍ក្នុងការកំណត់កាលបរិច្ឆេទនៃកិច្ចប្រជុំពិសេស JBC នៅថ្ងៃទី២១ និងថ្ងៃទី២២ ខែតុលា ឆ្នាំ២០២៥ ខាងមុខ ដែលភាគីថៃ ធ្វើជាម្ចាស់ផ្ទះ។
ដំណាលពេលគ្នានេះ ប្រធានក្រុមអ្នកសង្កេតការណ៍អន្តរកាល IOT ឧត្ដមសេនីយ៍ត្រី Samsul Rizal Bin Musa ពីកងទ័ពជើងគោកប្រទេសម៉ាឡេស៊ី បានថ្លែងប្រាប់អ្នកកាសែតដោយសរសើរទាហានថៃ ដែលបានគោរពកិច្ចព្រមព្រៀងឈប់បាញ់គ្នាប្រកបដោយវិជ្ជាជីវៈខ្ពស់ មានវិន័យតាំងពីពលទាហាន ដល់នាយទាហានជាន់ខ្ពស់ឥតបន្លឹមបន្លំឡើយ។
ប្រភពជិតស្និទ្ធនឹងរាជរដ្ឋាភិបាលប្រទេសកម្ពុជា ដដែល បញ្ជាក់ថា កិច្ចប្រជុំពិសេសគណៈកម្មការចម្រុះព្រំដែនគោកកម្ពុជា-ថៃ (JBC) នេះ ធ្វើឡើងដើម្បីបន្តជជែកពិភាក្សា និងជំរុញការងារខណ្ឌសីមា និងបោះបង្គោលព្រំដែនគោករវាងប្រទេសកម្ពុជា និងប្រទេសថៃឡង់ដ៍ ដែលភាគីទាំងពីរឯកភាពគ្នានៅក្នុងកិច្ចប្រជុំគណៈកម្មការចម្រុះព្រំដែនគោកកម្ពុជា-ថៃ លើកទី៦ កាលពីថ្ងៃទី១៤ និងថ្ងៃទី១៥ ខែមិថុនា ឆ្នាំ២០២៥ កន្លងទៅ នៅរាជធានីភ្នំពេញ ដែលរាជរដ្ឋាភិបាលប្រទេសកម្ពុជា រៀបចំទទួលនាពេលនោះ៕
© 2025, ឌឹ ខេមបូឌា ដេលី. All rights reserved.