ប្រធានាធិបតីរុស្ស៊ី លោក វ្ល៉ាឌីមៀ ពូទីន ចេញសារព្រមានប្រទេសមហាអំណាចនៅអឺរ៉ុប ដែលលោកថា ប្រសិនបើអឺរ៉ុបបង្កសង្គ្រាមជាមួយរុស្ស៊ី ទីក្រុងមូស្គូ នឹងវាយបកវិញភ្លាម ហើយសង្គ្រាមអាចផ្ទុះនៅពេលនេះក៏បានដែរ។
លោក ពូទីន ព្រមានថា អឺរ៉ុបមុខជានឹងទទួលបរាជ័យយ៉ាងអាម៉ាស់បំផុត រហូតដល់ថ្នាក់គ្មាននៅសល់អ្នកដែលអាចមកចរចាកិច្ចព្រមព្រៀងសន្តិភាពជាមួយរុស្ស៊ី ឡើយ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នាថ្ងៃពុធ ទី៣ ខែធ្នូ ឆ្នាំ២០២៥។
សង្គ្រាមនៅអ៊ុយក្រែន ដែលជាសង្គ្រាមឈ្លានពានរបស់រុស្ស៊ី បានកំពុងបន្តអូសបន្លាយជិត ៤ឆ្នាំហើយ។ វាជាសង្គ្រាមដ៏ធំបំផុតនៅអឺរ៉ុប ចាប់តាំងពីសង្គ្រាមលោកលើកទី២។ សង្គ្រាមជាមួយប្រទេសជិតខាងមួយនេះ មហាអំណាចរុស្ស៊ី នៅមិនទាន់អាចវាយបំបាក់ និងយកឈ្នះលើអ៊ុយក្រែន ដែលជាប្រទេសតូច និងទន់ខ្សោយជាងខ្លួនបាននៅឡើយ។
តែយ៉ាងណា អ៊ុយក្រែនកំពុងស្ថិតនៅក្រោមការជួយយ៉ាងខ្លាំងពីមហាអំណាចធំៗនៅអឺរ៉ុប និងសហរដ្ឋអាមេរិក។ អ៊ុយក្រែន និងក្រុមមហាអំណាចអឺរ៉ុប បានព្រមានថា ប្រសិនបើលោក ពូទីន ឈ្នះសង្គ្រាមនៅអ៊ុយក្រែន នោះលោកប្រធានាធិបតីរុស្ស៊ី អាចនឹងវាយប្រហារលើសមាជិកណាមួយរបស់អង្គការណាតូ (NATO)។
នៅពេលត្រូវបានសាកសួរដោយអ្នកសារព័ត៌មានពីការចុះផ្សាយមួយរបស់ប្រព័ន្ធផ្សព្វផ្សាយរុស្ស៊ី ដែលថារដ្ឋមន្ត្រីការបរទេសហុងគ្រី លោក Peter Szijjarto បានព្រមានថា អឺរ៉ុបកំពុងត្រៀមធ្វើសង្គ្រាមប្រឆាំងរុស្ស៊ី លោក ពូទីន បានឆ្លើយថា រុស្ស៊ីមិនចង់ផ្ទុះសង្គ្រាមជាមួយអឺរ៉ុបទេ តែលោក ពូទីន ព្រមានថាប្រសិនបើអឺរ៉ុបចង់បើកសង្គ្រាមជាមួយរុស្ស៊ី ហើយចាប់ផ្តើមវាយរុស្ស៊ី មុន រុស្ស៊ីនឹងកម្ទេចអឺរ៉ុបយ៉ាងធ្ងន់ធ្ងរបំផុត។ លោក ពូទីន ថាសង្គ្រាមនោះនឹងបញ្ចប់ទៅយ៉ាងឆាប់រហ័សបំផុត ព្រោះអឺរ៉ុបបរាជ័យ មិនអាចសុំចរចាសន្តិភាពជាមួយក្រុងមូស្គូ បានឡើយ។
លោក ពូទីន បានអះអាងថា សង្គ្រាមនៅអ៊ុយក្រែន មិនមែនសង្គ្រាមពេញទំហឹងនោះទេ ព្រោះជាប្រតិបត្តិការសឹកពិសេសប៉ុណ្ណោះ។ តាមមេដឹកនាំវិមានក្រឹមឡាំង មកទល់ពេលនេះ រុស្ស៊ី មិនទាន់បានបញ្ចេញសមត្ថភាពអស់ឡើយ តែបើអឺរ៉ុបហ៊ានតែវាយប្រហាររុស្ស៊ី អឺរ៉ុបត្រូវតែមានកំហុស។
លោក ពូទីន បានចោទមហាអំណាចអឺរ៉ុបថាកំពុងរាំងខ្ទប់ការខិតខំប្រឹងប្រែងរបស់លោកប្រធានាធិបតី ដូណាល់ ត្រាំ ដែលមានបំណងយ៉ាងខ្លាំងដើម្បីបញ្ចប់សង្គ្រាម។ លោក ពូទីន ថាលោកទទួលយកផែនការសន្តិភាពរបស់លោក ត្រាំ តែមិនទទួលយកសន្តិភាពរបស់អឺរ៉ុបឡើយ។
លោក ពូទីន ព្រមានអឺរ៉ុបឱ្យដើរចេញពីការតាំងខ្លួនជាភាគីទី៣ នៃដំណើរការសន្តិភាពរបស់លោក ត្រាំ។
តាមលោក ពូទីន ទីក្រុងមូស្គូ និងទីក្រុងគៀវ កំពុងរង់ចាំសន្តិភាពពីលោក ត្រាំ។
កាលពីខែកុម្ភៈ ឆ្នាំ២០២២ លោក ពូទីន បានបញ្ជាឱ្យលើកកងទ័ពរុស្ស៊ី ចំនួន ២៥ម៉ឺននាក់ជាមួយនឹងរថក្រោះ រថពាសដែក កាំភ្លើងធំ ជាង ៦០០០គ្រឿង អមនឹងយន្តហោះចម្បាំងរាប់សិនគ្រឿង វាយលុកចូលអ៊ុយក្រែន បង្កជាការប្រឈមមុខដ៏ធំបំផុតរវាងរុស្ស៊ី និងលោកខាងលិច គិតចាប់តាំងពីការបិទបញ្ចប់សម័យសង្គ្រាមត្រជាក់។ តែបើយោងតាមការវាយតម្លៃរបស់ក្រុមចារកម្មអឺរ៉ុប កងទ័ពរុស្ស៊ី ប្រមាណ ១លាន ២០ម៉ឺននាក់បានស្លាប់ និងរងរបួសក្នុងសង្គ្រាមនៅអ៊ុយក្រែន ជិត ៤ឆ្នាំហើយនេះ។
យ៉ាងណា ក្រុមសមាជិកសភាសហភាពអឺរ៉ុប បានឈានដល់កិច្ចព្រមព្រៀងមួយជំហានទៀតក្នុងការហាមឃាត់ទាំងស្រុងនូវការនាំចូលប្រេង និងឧស្ម័នរបស់រុស្ស៊ី ដោយបិទបញ្ចប់ត្រឹមរដូវស្លឹកឈើជ្រុះឆ្នាំ២០២៧ ដែលជាវិធានការទណ្ឌកម្មចុងក្រោយរបស់សហភាពអឺរ៉ុប រាំងខ្ទប់ប្រភពចំណូលដ៏សំខាន់ ដែលទីក្រុងមូស្គូ យកទៅទ្រទ្រង់សង្គ្រាមរបស់ខ្លួនឈ្លានពានអ៊ុយក្រែន។
ក្រោមកិច្ចព្រមព្រៀងនេះ នឹងត្រូវហាមឃាត់ប្រទេសអឺរ៉ុបទាំងអស់ឱ្យឈប់ទិញប្រេង និងឧស្ម័នពីរុស្ស៊ី ចាប់ពីថ្ងៃទី៣០ ខែកញ្ញា ឆ្នាំ២០២៧ ហើយយូរបំផុតនៅថ្ងៃទី១ ខែវិច្ឆិកា ឆ្នាំ២០២៧។
ប្រធានគណៈកម្មការអឺរ៉ុប អ្នកស្រី Ursula von der Leyen សន្យារឹតបន្តឹងទណ្ឌកម្មលើទីក្រុងមូស្គូ កាន់តែខ្លាំងបន្ថែមទៀត។
នៅមុនសង្គ្រាមរបស់រុស្ស៊ី នៅអ៊ុយក្រែន អឺរ៉ុបជាក្រុមប្រទេសនាំប្រេង និងឧស្ម័នពីរុស្ស៊ី ដ៏ធំបំផុត គឺក្នុងមួយឆ្នាំមានពី ៥ពាន់លានដុល្លារទៅ ៦ពាន់លានដុល្លារ។ ឥឡូវនេះ ការនាំប្រេង និងឧស្ម័នពីរុស្ស៊ី មានប្រហែលជាងមួយពាន់លានដុល្លារ។ ក្រៅពីនេះ អឺរ៉ុបកំពុងដាក់ចុះនូវផែនការរឹបអូសទ្រព្យសម្បត្តិរបស់រុស្ស៊ី នៅអឺរ៉ុបក្នុងទំហំ ៣២៥ពាន់លានដុល្លារ ដើម្បីជួយស្ដារប្រទេសអ៊ុយក្រែន ឡើងវិញ។
មេដឹកនាំវិមានក្រឹមឡាំង នៃរបបលោក ពូទីន តែងតែហៅប្រទេសមហាអំណាចធំៗនៅអឺរ៉ុប មានដូចជា អង់គ្លេស បារាំង និងអាល្លឺម៉ង់ ជាសត្រូវទីពីរបន្ទាប់ពីអ៊ុយក្រែន។
ចំណែកប្រទេសមហាអំណាចអឺរ៉ុបទាំងបីនេះ ក៏បានមើលមុខលោក វ៉្លាឌីមៀ ពូទីន ជាមេខ្លោងបង្កអសន្តិសុខយ៉ាងខ្លាំងដល់អឺរ៉ុបតាមរយៈសង្គ្រាមឈ្លានពានប្រទេសអ៊ុយក្រែន។ ប្រទេសទាំងបីនេះនៅតែសន្យាជួយគាំទ្រ និងការពារអ៊ុយក្រែន ប្រយុទ្ធនឹងសង្គ្រាមរបស់រុស្ស៊ី រហូតសង្គ្រាមត្រូវបានបិទបញ្ចប់៕
© 2025, ឌឹ ខេមបូឌា ដេលី. All rights reserved.