មន្ត្រីរដ្ឋាភិបាលកម្ពុជា ព្រមានថា សមរភូមិដែលថៃ នឹងបន្តឈ្លានពានបន្ទាប់ពីកម្ពុជា គឺប្រទេសឡាវ និងប្រទេសភូមា ប៉ុន្តែថៃ នឹងប្រើលេសប្តូរឈ្មោះពីសង្គ្រាមឈ្លានពាន ទៅជាសង្គ្រាមបំផ្លាញឧក្រិដ្ឋកម្មបោកប្រាស់តាមអនឡាញវិញ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា សរសេរលើគណនីហ្វេសប៊ុករបស់ខ្លួននៅថ្ងៃទី១៨ ធ្នូ នេះថា ថៃនឹងប្តូរឈ្មោះពីសង្គ្រាមឈ្លានពានទៅជាសង្គ្រាម Scam វិញ ដើម្បីឈ្លានពានប្រទេសឡាវ និងភូមា ប៉ុន្តែធាតុពិត គឺជាសង្គ្រាមឈ្លានពានដដែល គឺដូចដែលថៃ បានធ្វើមកលើកម្ពុជា ក្នុងពេលនេះ។
លោកអំពាវនាវឱ្យពលរដ្ឋខ្មែររក្សាសាមគ្គី និងឯកភាពជាតិឱ្យកាន់តែរឹងមាំ និងរួមចំណែកពង្រឹងសមត្ថភាពជាតិលើគ្រប់វិស័យក្នុងកាលៈទេសៈដ៏លំបាកនេះ នោះទើបកម្ពុជាអាចជៀសផុតពីការឈ្លានពាន ការប្រមាថ និងអំពើអយុត្តិធម៌ពីបរទេសដែលកំពុងឈ្លានពានមាតុភូមិរបស់ខ្លួនដ៏សាហាវឃោរឃៅក្នុងពេលនេះ។
ភាគីថៃ បានអះអាងថា សង្គ្រាមជាមួយកម្ពុជា អស់រយៈពេល ១២ថ្ងៃមកនេះ គឺជាការច្បាំងជាមួយទ័ពឆបោកប៉ុណ្ណោះ មិនមែនជាការច្បាំងជាមួយកងទ័ពខ្មែរឡើយ។
នៅថ្ងៃទី១៨ ខែធ្នូ នេះ កាសែតថៃ ខៅស៊ុត (Khaosod) បានរាយការណ៍សម្ដីកងទ័ពភូមិភាគទី២ ថៃ ថា យោធាថៃ មិនមែនច្បាំងជាមួយកងទ័ពកម្ពុជាទេ ប៉ុន្តែគឺច្បាំងជាមួយ «កងទ័ពឆបោក» (Scam Army) ប៉ុណ្ណោះ ព្រោះថៃ កំពុងប្រឈមមុខជាមួយឧក្រិដ្ឋកម្មសកល ហើយនេះក៏មិនមែនជាសង្គ្រាមព្រំដែនដែរ។
ប្រភពដដែល អះអាងថា បណ្ដាញឧក្រិដ្ឋកម្មឆ្លងដែនទាំងនេះ កំពុងបង្កការគំរាមកំហែងដោយផ្ទាល់ដល់ប្រព័ន្ធហិរញ្ញវត្ថុសកល និងសុវត្ថិភាពសាធារណៈនៅក្នុងប្រទេសជាច្រើន ខណៈផលប៉ះពាល់នៃ “កងទ័ពឆបោក” នេះ មិនមែនកម្រិតត្រឹមតែក្នុងតំបន់ណាមួយនោះទេ វាបានរីករាលដាលដល់ប្រជាជន អាជីវកម្ម និងប្រព័ន្ធសន្តិសុខជាតិនៅទូទាំងពិភពលោក។
ប៉ុន្តែអ្នកជំនាញចាត់ទុកសកម្មភាពរបស់ថៃ នៅពេលនេះ គឺជាសង្គ្រាមឈ្លានពានទឹកដីកម្ពុជា យ៉ាងពិតប្រាកដ។
ក្រសួងការពារជាតិកម្ពុជា បានចេញសេចក្តីប្រកាសព័ត៌មាននៅថ្ងៃទី១៨ ខែធ្នូ នេះថា ចាប់ពីម៉ោង ១ និង ១០នាទី រំលងអាធ្រាត្រ រហូតដល់ម៉ោង ០៣ និង ០០នាទី ថ្ងៃទី១៨ ខែធ្នូ ឆ្នាំ២០២៥ នេះ យោធាថៃ បានវាយប្រហារលើកម្ពុជា ចំនួន ១៨លើក ក្នុងរយៈពេល ១៥ម៉ោង។
ក្រសួងការពារជាតិ បញ្ជាក់ថា ក្នុងរយៈពេល ១៥ម៉ោង និងការវាយប្រហារទាំង ១៨លើកនេះ ទាហានថៃ បានប្រើប្រាស់អាវុធគ្រប់ធុនទៅលើតំបន់ជាច្រើននៃយោធភូមិភាគទី៤ និងយោធភូមិភាគទី៥ ក្នុងទឹកដីកម្ពុជា រួមមានយន្តហោះចម្បាំង អេហ្វ-១៦ (F-16) រ៉ុក្កែត ឌី.ធី.អាយ-២ (DTI-2) នាវាចម្បាំង ដ្រូនពិឃាត កាំភ្លើងធំ១០៥ មិល្លីម៉ែត្រ និង ១៥៥មិល្លីម៉ែត្រ រថពាសដែក គ្រាប់បែកចង្កោម និងផ្សែងពុល ជាដើម។
ជុំវិញបញ្ហានេះ ក្រសួងមហាផ្ទៃកម្ពុជា បានចេញសេចក្តីប្រកាសព័ត៌មាននៅថ្ងៃទី១៨ ធ្នូ នេះថា យោធាថៃ បានប្រើប្រាស់យន្តហោះ F-16 ទម្លាក់គ្រាប់ចំនួន ២គ្រាប់ក្នុងក្រុងប៉ោយប៉ែត និង ៣គ្រាប់ទៀតក្នុងក្រុងសិរីសោភ័ណ ខេត្តបន្ទាយមានជ័យ នៅអំឡុងម៉ោង ២រសៀល ថ្ងៃទី១៨ ធ្នូ នេះ ដែលបណ្ដាលឱ្យខូចខាតអគារ ១ខ្នង ដំបូលឃ្លាំងឧកញ៉ា វង្ស ដួង ផ្នែកខាងត្បូង និងសម្ភារៈមួយចំនួនទៀត ក្នុងនោះក៏មានអ្នករងរបួសស្រាល ២នាក់ផងដែរ។
ប្រភពដដែល អះអាងថា ទង្វើរបស់ថៃ ប្រព្រឹត្តមកលើកម្ពុជា នាពេលនេះ គឺជាការបង្កសង្គ្រាមបំផ្លិចបំផ្លាញប្រទេសកម្ពុជា ក្នុងបំណងបំផ្លាញទាំងហេដ្ឋារចនាសម្ព័ន្ធរូបវន្តផង និងសម្បត្តិបេតិកភណ្ឌពិភពលោកផងដែរ៕
© 2025, ឌឹ ខេមបូឌា ដេលី. All rights reserved.