មេដឹកនាំបក្សកាន់អំណាច លោក ហ៊ុន សែន អះអាងថា ប្រទេសថៃ បានបង្កសង្គ្រាមរំលោភបំពានយ៉ាងកំរោលមកលើបូរណភាពទឹកដីកម្ពុជា នៅតាមបណ្ដោយព្រំដែន ក្រោមលេសការពារសន្តិសុខ និងអធិបតេយ្យរបស់ថៃ ដែលបង្កនូវមហន្តរាយយ៉ាងធំធេងដល់ប្រជាពលរដ្ឋខ្មែរដែលកំពុងរស់នៅសុខសាន្ត។
ឆ្លៀតឱកាសក្នុងថ្ងៃខួបទី៤៧ នៃថ្ងៃជ័យជម្នះ ៧មករា របស់គណបក្សប្រជាជនកម្ពុជា នៅថ្ងៃទី៧ ខែមករា ឆ្នាំ២០២៦ ប្រធានព្រឹទ្ធសភា លោក ហ៊ុន សែន ថ្លែងថា នៅក្នុងសកម្មភាពរំលោភបំពាននេះ កងយោធាថៃ ប្រើប្រាស់អាវុធធំតូច និងទំនើបគ្រប់ប្រភេទ ទាំងជើងគោក ជើងទឹក និងជើងអាកាសបាញ់ប្រហារមកលើកងទ័ពកម្ពុជា ដែលកំពុងស្ថិតក្នុងទីតាំងលើដែនអធិបតេយ្យប្រទេសកម្ពុជា និងវាយប្រហារលើគោលដៅស៊ីវិលនានាឥតរើសមុខឡើយ។
ប្រធានព្រឹទ្ធសភាកម្ពុជា រូបនេះអះអាងថា សកម្មភាពទាំងនេះគឺជាការរំលោភយ៉ាងធ្ងន់ធ្ងរបំផុតលើអធិបតេយ្យ និងបូរណភាពទឹកដីកម្ពុជា រួមទាំងបំពានធម្មនុញ្ញអង្គការសហប្រជាជាតិ បំពានធម្មនុញ្ញអាស៊ាន និងមិនគោរពស្មារតីនៃសហគមន៍អាស៊ានយ៉ាងធ្ងន់ធ្ងរផងដែរ។
ម្យ៉ាងទៀត សកម្មភាពបែបនេះក៏ជាការរំលោភយ៉ាងធ្ងន់ធ្ងរលើច្បាប់មនុស្សធម៌អន្តរជាតិ និងកាតព្វកិច្ចអន្តរជាតិក្នុងការការពារជនស៊ីវិល ទ្រព្យសម្បត្តិវប្បធម៌ជាតិ និងបេតិកភណ្ឌពិភពលោកថែមទៀត ព្រោះថៃ បានពង្រីកសកម្មភាពវាយប្រហារកាន់តែធំឡើងៗ ដែលផ្ទុយនឹងបទឈប់បាញ់ព្រមទាំងសេចក្តីថ្លែងការណ៍រួមទីក្រុងកូឡាឡាំពួរ ដែលភាគីទាំងពីរបានឯកភាពគ្នានោះ។
លោក ហ៊ុន សែន អំពាវនាវឱ្យប្រជាពលរដ្ឋខ្មែរគ្រប់ទិសទី បន្តរួបរួមសាមគ្គីជាធ្លុងមួយដោយជឿជាក់លើរដ្ឋាភិបាល និងបន្តលើកកម្ពស់ស្មារតីស្នេហាជាតិ ប្រឹងឈរដោយខ្លួនឯង ខិតខំខ្លួនឯង និងពង្រឹងភាពម្ចាស់ការដោយខ្លួនឯង ដើម្បីធានាការពារ និងកសាងជាតិសម្រាប់មាគ៌ាទៅថ្ងៃមុខទៀត។
ពលរដ្ឋខ្មែរមួយចំនួនធំបានឆ្លៀតប្រើបណ្ដាញសង្គមសរសេរ និយាយដៀមដាមផ្លែផ្កាថា លោក ហ៊ុន សែន ថ្លែងអំពីសាមគ្គីភាព ស្មារតីស្នេហាជាតិឲ្យខ្មែរគ្រប់រូបរួបរួមជាមួយរដ្ឋាភិបាលលោកនោះ គឺគ្រាន់តែទៅជួយពង្រឹងអំណាចតវង្សត្រកូលរបស់លោកតែប៉ុណ្ណោះ។
សង្គ្រាមកម្ពុជា-ថៃ បានផ្ទុះឡើងចំនួន ២លើក គឺលើកទី១ នៅថ្ងៃទី២៤ រហូតដល់ថ្ងៃទី២៨ ខែកក្កដា ឆ្នាំ២០២៥ ចំណែកលើកទី២ នៅថ្ងៃទី៧ រហូតដល់ថ្ងៃទី២៧ ខែធ្នូ ឆ្នាំ២០២៥ ខណៈសង្គ្រាមទាំងពីរលើកនេះ ភាគីថៃ បានចោទថា កម្ពុជាបើកការវាយប្រហារលើថៃ មុន ប៉ុន្តែខាងកម្ពុជា ក៏បានចោទថា ថៃគឺជាអ្នកវាយប្រហារលើកម្ពុជា មុនដែរ។
ជុំវិញបញ្ហានេះ កាសែតថៃ ខៅស៊ុត (Khaosod) ស្រង់សម្ដីនាយករដ្ឋមន្ត្រីថៃ លោក អនុធីន ឆានវីរៈគុល កាលពីថ្ងៃទី២៣ ខែធ្នូ ឆ្នាំ២០២៥ ថា ថៃមិនដែលឈ្លានពានកម្ពុជា ទេ ព្រោះថៃ ជាភាគីដែលត្រូវបានឈ្លានពាន និងវាយប្រហារមុនពីកម្ពុជា ហើយអ្វីដែលថៃ បានធ្វើ គឺជាកាតព្វកិច្ចដើម្បីការពារអធិបតេយ្យជាតិ សន្តិសុខជាតិ និងបូរណភាពទឹកដីប្រទេសថៃឡង់ដ៍ តែប៉ុណ្ណោះ។
យ៉ាងណាក៏ដោយ ថ្លែងក្នុងពិធីប្រកាសការផលិតនាវាចម្បាំងខ្នាតយក្សថ្មីជាមួយរដ្ឋមន្ត្រីក្រសួងសង្គ្រាម និងរដ្ឋមន្ត្រីកងទ័ពជើងទឹកអាមេរិក កាលពីថ្ងៃទី២២ ខែធ្នូ ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានចោទថា ប្រទេសថៃ ជាអ្នកចាប់ផ្តើមសង្គ្រាមមុនទៅលើប្រទេសកម្ពុជា។
ទោះជាយ៉ាងណាក៏ដោយ ហេតុការណ៍ពិត គឺភាពរកាំរកូសគ្នារវាងលោក ហ៊ុន សែន និងអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ ជាបងប្អូនធម៌ ការបែកធ្លាយពាក្យសម្ដីត្មះដៀលមេទ័ពថៃ រួមទាំងការបង្ក្រាបបណ្ដាញឆបោកជាប្រព័ន្ធចេញពីប្រទេសកម្ពុជា ដែលប៉ះពាល់ដល់មនុស្សជិតស្និទ្ធរកប្រយោជន៍ឲ្យត្រកូល ហ៊ុន មានឧកញ៉ា កុក អាន និងឧកញ៉ា លី យ៉ុងផាត់ ជាដើម ព្រមទាំងឧកញ៉ាក្មេង ចេន ហ្ស៊ី ដែលជាទីប្រឹក្សាលោក ហ៊ុន សែន ផ្ទាល់ផងដែរ។
ព័ត៌មានដោយឡែកវិញ ទាហានការពារព្រំដែនថៃ កាលពីថ្ងៃទី៦ មករា បានឃាត់ខ្លួនជនជាតិចិន ៣នាក់ដែលព្យាយាមដើរឆ្លងចម្ការអំពៅចូលទឹកដីប្រទេសកម្ពុជា ក្នុងខេត្តស្រះកែវ។ អាជ្ញាធរប្រាប់កាសែតថា ជនជាតិចិន ទាំង ៣នាក់ គ្មានលិខិតឆ្លងដែនទេ ហើយថាគេចេញពីប្រទេសភូមា មក។
អាជ្ញាធររកឃើញមានជាប់នឹងខ្លួនជនល្មើស ស៊ីមកាត ឬឈិបដាក់ទូរសព្ទដៃជិត ១ម៉ឺនចំណិត ដែលគេអាចប្រើសម្រាប់បង្វែងដានអំពើឧក្រិដ្ឋពីអាជ្ញាធរមានសមត្ថកិច្ច។
ជុំវិញបញ្ហាសង្គ្រាមរវាងប្រទេសកម្ពុជា និងប្រទេសថៃឡង់ដ៍ កន្លងទៅនេះវិញ ក្រសួងមហាផ្ទៃ បានចេញសេចក្តីប្រកាសព័ត៌មាននៅថ្ងៃទី៧ មករា នេះថា បើគិតចាប់ពីថ្ងៃទី៧ ខែធ្នូ ឆ្នាំ២០២៥ មកការខូចខាតទ្រព្យសម្បត្តិឯកជនខាងកម្ពុជា រួមមាន៖
- ផ្ទះជាង ៣០០ខ្នង (៣៣៦ខ្នង)
- អគារស៊ីវិលឯកជនចំនួន ៧
- សណ្ឋាគារ ១០
- ស្ថានីយប្រេង ៣
- ផ្សារឯកជន ១
- រថយន្ត ៣៤គ្រឿង
- ម៉ូតូ ៨គ្រឿង
- លានទិញដំឡូង ១កន្លែង
- អគារឃ្លាំងទំនិញ ១កន្លែង
- បង្គោលអង់តែនទូរសព្ទ ៣កន្លែង
- អាងទឹក និងប្រព័ន្ធទឹកស្អាត ៦កន្លែង
- ជង្រុកស្រូវ ១
- និងសត្វព្រៃ ២ក្បាលថែមទៀត។
ក្រសួងមហាផ្ទៃ បញ្ជាក់ថា ការខូចខាតទ្រព្យសម្បត្តិសាធារណៈសរុប រួមមាន៖
- សាលារៀន ២៥កន្លែង
- មន្ទីរពេទ្យ ៩កន្លែង
- សំណង់អគារចំនួន ៤២កន្លែង
- វត្តអារាម ១៧កន្លែង
- សាលាឆទាន ១
- រូបសំណាក ១
- រថយន្ត ១គ្រឿង
- ប្រាសាទបុរាណចំនួន ៤កន្លែង
- ស្ពាន ៥កន្លែង
- ផ្សារ ១កន្លែង
- ផ្លូវ ៣២ខ្សែ
- ប្រព័ន្ធផ្គត់ផ្គង់អគ្គិសនី ១ទីតាំង
- និងបណ្ដាញបញ្ជូនអគ្គិសនី ៣កន្លែងផងដែរ។
ចំណែកឯខាងប្រទេសថៃឡង់ដ៍ វិញ ស្រុក-ភូមិក្នុងខេត្ត៤ គឺសុរិន្ទ បុរីរម្យ ស៊ីសាកេត និងឧប៊ុនរាជធានី បានរងការខូចខាតប្រហាក់ប្រហែលគ្នា ទាំងមនុស្ស ទាំងទ្រព្យសម្បត្តិ មានសាលារៀន មន្ទីរពេទ្យ ទីប្រជុំជន ស្ថានីយប្រេងជាដើម ក្រោមគ្រាប់រ៉ុក្កែត BM-21 Grad កងទ័ពខ្មែរបាញ់ផ្លោងស្រោចចូលដីថៃ៕
© 2026, ឌឹ ខេមបូឌា ដេលី. All rights reserved.