នគរបាលបាននិយាយកាលពីម្សិលមិញថា មន្រ្តីរដ្ឋបាលព្រៃឈើខេត្តបាត់ដំបងបានចាប់ផ្តើមចាត់វិធានការបញ្ឈប់ការកាប់បំផ្លាញព្រៃសហគមន៍ ពីសំណាក់កងរាជអាវុធហត្ថនិងនគរបាល។
ក្នុងរយៈពេលជាងពីរខែមកនេះ ទាហាន នគរបាល និង កងរាជអាវុធហត្ថបានកាប់បំផ្លាញព្រៃត្រឡាច ដែលមានទំហំ១.៣៣៥ហិកតា នៅក្នុងស្រុករុក្ខគិរី ដែលត្រូវបានទទួលស្គាល់ជាព្រៃសហគមន៍ដោយក្រសួងកសិកម្ម ហើយត្រូវបានការពារចាប់តាំងពីឆ្នាំ ២០០៤មកម្លេ៉ះ។
លោក ពេជ្រ មា៉ឡៃ អភិបាលស្រុករុក្ខគិរីបានមានប្រសាសន៍ថា កាលពីថ្ងៃអង្គារ មន្រ្តីមូលដ្ឋានមួយក្រុមបានបញ្ឈប់ការកាប់ បំផ្លាញព្រៃឈើ និងបានរុះរើលំនៅដ្ឋានតូចៗរបស់កម្មករនៅក្នុងព្រៃនោះ។ លោកបានថ្លែងបន្តថា “យើងបានចុះទៅទីនោះជាមួយមន្ត្រីរដ្ឋបាលព្រៃឈើ ហើយបានប្រាប់ពួកគេឲ្យឈប់កាប់បំផ្លាញព្រៃឈើទៀត”។
លោកថ្លែងថា មានផ្ទៃដីតែ២៤ហិកតាប៉ុណ្ណោះត្រូវបានអ្នកភូមិប្រាំមួយឬប្រាំពីរនាក់ដែលធ្វើការឲ្យនគរបាលនិងមន្រី្តយោធាកាប់បំផ្លាញ។លោកបន្តថា “ពួកគេ(អ្នកកាប់ព្រៃទាំងនោះ)ត្រូវការដីដាំពោតនិងសណ្តែក”។ ក៏ប៉ុន្តែ បុគ្គលិកអង្គការក្រៅរដ្ឋាភិបាលនៅក្នុងតំបន់នោះបាននិយាយថា ផ្ទៃដីព្រៃត្រឡាចទំហំ២០០ហិកតា ត្រូវបានកាប់បំផ្លាញរួចហើយ និងដាំពោតបាន៤០ហិកតារួចហើយដែរ។
លោក អ៊ុយ រី អភិបាលរងខេត្តបាត់ដំបងបានអះអាងថា លោកមិនបានដឹងថានរណាជាអ្នកទទួលខុសត្រូវចំពោះការកាប់ព្រៃឈើនេះទេ។ លោក លី ជូបេង នាយខណ្ឌរដ្ឋបាលព្រៃឈើខេត្តបាត់ដំបងបានថ្លែងថា“ ខ្ញុំមិនដឹងថានរណាជាអ្នកកាប់ព្រៃនោះទេ។នៅពេលខ្ញុំទៅដល់ទីនោះ ដើមឈើជាច្រើនបានដួលរលំរួចទៅហើយ”។លោកបន្តថា លោកនឹងស៊ើបអង្កេតថា តើនរណាកាប់ព្រៃនេះ។
លោក ចន មេកគ្រីហ្គរ (John Macgregor) ជំនួយការប្រធានគម្រោងនៅអង្គការក្រៅរដ្ឋាភិបាល After the Flood ជាក្រុមអង្គការក្រៅរដ្ឋាភិបាលដែលធ្វើការនៅក្នុងព្រៃនេះបានមានប្រសាសន៍ថា ការកាប់បំផ្លាញព្រៃឈើនេះហាក់ដូចជាទើបតែឈប់នៅពេលថ្មីៗនេះ។លោកបានមានប្រសាសន៍ថា “យើងចង់ឲ្យការកាប់បំផ្លាញព្រៃឈើនោះឈប់ត្រឹមហ្នឹងទៅ ហើយយើងនឹងដាំឈើឡើងវិញនៅពេលដែលអ្នកកាប់ព្រៃឈើចាកចេញអស់ពីតំបន់នោះ”៕
ប្រែសម្រួលដោយ ព្រំ ម៉ារ៉ាឌី