កាលពីថ្ងៃច័ន្ទ សាលាឧទ្ធរណ៍បានចាប់ផ្តើមបើកសវនាការជំនុំជម្រះរឿងក្តីលោកមុឹកដារា៉ នាយនគរបាលប្រឆាំងគ្រឿងញៀននិងមន្ត្រីក្រោមឱវាទរបស់គាត់ឈ្មោះ ជាឡេង តាមការចោទប្រកាន់២៥ករណី ពីបទជួញដូរគ្រឿងញៀននិងអំពើពុករលួយ។
កាលពីក្នុងខែមករា នៅចុងបញ្ចប់នៃសវនាការកាត់ទោសបទគ្រឿងញៀនដ៏ធំបំផុតក្នុងប្រវត្តិសាស្ត្រកម្ពុុជា ចុងចោទទាំងពីរ បានទទួលទោសជាប់ពន្ធនាគារអស់មួយជីវិត រីឯចុងចោទទី៣ ដែលជាមន្ត្រីនគរបាលម្នាក់ទៀតឈ្មោះ ម៉ន ឌឿន ដែលមិនទាន់បានចាប់ខ្លួននៅឡើយ ត្រូវបានផ្តន្ទាទោសដាក់ពន្ធនាគាររយៈពេល២៥ឆ្នាំ។
ការកាត់ទោសនៅសាលាដំបូងខេត្តបន្ទាយមានជ័យបានប្រើពេលជិតមួយខែ និងបានបង្ហាញនូវបទល្មើសដ៏ស្មុគស្មាញមួយ ដែល នៅក្នុងនោះជនទាំងបីនាក់នេះបានទទួលប្រាក់រាប់សែនដុល្លារ ដោយអនុញ្ញាតឲ្យអ្នកជួញដូរនិងចែកចាយគ្រឿងញៀនរាប់រយនាក់មានសេរីភាព ក្នុងអំឡុងពេលបីឆ្នាំ។
សវនាការសាលាឧទ្ធរណ៍នេះជំនុំជម្រះពីបទចោទប្រកាន់ភាគច្រើនក្នុងចំណោមបទចោទប្រកាន់ចំនួន៣២ករណី ចំពោះជនជាប់ចោទទាំងពីរនាក់ ហើយមានការរំពឹងថា ត្រូវប្រើពេលយ៉ាងតិចមួយសប្តាហ៍។ នៅ ក្នុងបណ្តឹងឧទ្ធរណ៍នេះ ក្រុមមេធាវីរបស់ចុងចោទពីររូប ស្នើឲ្យមានការកែប្រែទោសទាំងអស់នេះប៉ុន្តែតុលាការបានបដិសេធរួចហើយមិនកែប្រែបទចោទប្រកាន់ណាមួយឡើយ។
នៅក្នុងតុលាការកាលពីថ្ងៃច័ន្ទ លោក មុឹកដារា៉និងលោកជាឡេង នៅតែបដិសេធយ៉ាងដាច់អហង្ការថា មិនបានធ្វើអ្វីខុសឡើយ។
អ្នកទាំងពីរបានបញ្ជាក់ម្តងហើយម្តងទៀតថា ពួកគាត់គ្មានកំហុសទេ បើទោះជាមានភស្តុតាងរឹងមាំប្រឆំាងពួកគាត់ រាប់ទាំងសក្ខីកម្មពីសាក្សីរាប់រយនាក់ក៏ដោយ។ នៅពេលត្រូវបានសួរអំពីការចាប់គ្រឿងញៀនក្នុងខែមិថុនា ឆ្នាំ២០០៧ ដែលក្នុងនោះអ្នកទាំងពីរ ត្រូវបានចោទប្រកាន់ថា មិនបានរាយការណ៍គ្រប់គ្រាន់អំពីចំនួនកូកាអុីនដែលរឹបអូសបាន ហើយក្រោយមកយកថ្នាំញៀននោះទៅលក់ដោយខ្លួនឯងនោះលោកមុឹកដារា៉បាននិយាយត្រង់ចំណុចមួយថា “ ខ្ញុំសូមបដិសេធចំពោះសេចក្តីសម្រេចរបស់តុលាការដែលបានចោទខ្ញុំថា បានរួមគំនិតជាមួយ ជាឡេង”។ មន្ត្រីនគរបាលម្នាក់ ដែលផ្តល់សក្ខីកម្មកាលពីម្សិលមិញបាននិយាយថាការចាប់គ្រឿ្ងញៀនសម្ងាត់យ៉ាងហោចណាស់ទទួលបានហេរ៉ូអីុនប្រាំគីឡូក្រាម ប៉ុន្តែក្រោយមកលោកជា ឡេង បានបញ្ជូនតែមួយគីឡូក្រាមប៉ុណ្ណោះទៅតុលាការ។
ចំណែកលោកជាឡេងបានបដិសេធថាមិនបានជាប់ពាក់ព័ន្ធទេ ដោយនិយាយថា “ ខ្ញុំមិនបានយកគ្រឿងញៀនទាំងនោះទេ គ្មានសាក្សីនិយាយថា ពួកគេបានឃើញខ្ញុំយកគ្រឿងញៀនទាំងនោះទេ”។អតីតមេរបស់គាត់ចូលចិត្តទម្លាក់កំហុសមកលើគាត់។
លោកមុឹកដារ៉ា បានប្រាប់តុលាការថា “ ខ្ញុំមិនគាំទ្រជាឡេងទេ។ប្រសិនបើ ជាឡេងបានយកគ្រឿងញៀនមែនវាមិនសមហេតុសមផលឡើយ។ សូមឲ្យព្រះធរណីស្រូបខ្ញុំមួយពាន់ជាតិចុះ ប្រសិនបើខ្ញុំសម គំនិតជាមួយជា ឡេង”។
អំឡុងការសាកសួររយៈពេលបួនម៉ោងដោយលោកឆាយច័ន្ទតារាវណ្ណចៅក្រមជំនុំជម្រះ មេធាវីចុងចោទ និងតំណាងអយ្យការ អតីតនាយនគរបាលទាំងពីរបានអះអាងថា ខ្លួនគ្មានកំហុសទេ ហើយបានបដិសេធម្តងហើយម្តងទៀតថា ខ្លួនមិនដឹងអ្វីទាំងអស់ ឬចង្អុលដាក់អ្នកផ្សេងទៀត។
លោកមុីវណ្ណាឌីមេធាវីម្នាក់ក្នុងចំណោមមេធាវីបីរូប តំំណាងឲ្យលោកមុឹក ដារ៉ាបានមានប្រសាសន៍មុនពេលបដិសេធមិនអត្ថាធិប្បាយបន្ថែមទៀតថា “ រឿងក្តីនេះ មានគំនិតខុសគ្នាជាច្រើន”៕
ប្រែសម្រួលដោយ ចេវប៊ុននី