សមាជិកចលនាយុវជនគណបក្ស សម រង្ស៊ីជាង ១.០០០នាក់ មានគម្រោងធ្វើការតវ៉ានៅសួនសេរីភាព ក្នុងរាជធានីភ្នំពេញ នៅថ្ងៃព្រហស្បតិ៍ ដើម្បីស្នើសុំឲ្យព្រះមហាក្សត្រ នរោត្ដម សីហមុនី ព្រះរាជទានលើកលែងទោសដល់សកម្មជន និងអ្នកទោសនយោបាយទាំងអស់រួមទាំងលោក សម រង្ស៊ី មេដឹកនាំគណបក្សប្រឆាំងផងដែរ។
លោក សួង សោភ័ណ ប្រធានចលនាយុវជនគណបក្ស សម រង្ស៊ី បានមានប្រសាសន៍ថា ក្រុមយុវជនគណបក្ស សម រង្ស៊ី មានគម្រោងដង្ហែក្បួនទៅកាន់ព្រះបរមរាជវាំង រដ្ឋសភា ក្រសួងយុត្តិធម៌ និងក្រសួងមហាផ្ទៃ ដើម្បីដាក់ញត្តិស្តីពីបញ្ហានេះ។
លោកបន្ដថា “ ការដង្ហែក្បួនរបស់យើងដើម្បីដាក់ញត្តិ ស្នើសុំឲ្យព្រះមហាក្សត្រ នរោត្ដម សីហមុនី ព្រះរាជទានលើកលែងទោសដល់អ្នកទោសនយោបាយ និងអ្នកការពារសិទ្ធិមនុស្សព្រមទាំងសកម្មជនសិទ្ធិដីធ្លីទាំងអស់ នឹងដំណើរការដូចការគ្រោងទុក ទោះបីជាសាលារាជធានីភ្នំពេញ ឬក្រសួង មហាផ្ទៃមិនអនុញ្ញាតឲ្យធ្វើការដង្ហែក្បួននេះក៏ដោយ”។
ទោះជាយ៉ាងណា លោក ឡុង ឌីម៉ង់ អ្នកនាំពាក្យសាលារាជធានីភ្នំពេញមានប្រសាសន៍ថា អាជ្ញាធរនឹងរារាំងក្រុមចលនាយុវជនគណបក្ស សម រង្ស៊ី មិនឲ្យធ្វើការហែក្បួនក្នុងរាជធានីទេ។លោកបានបន្ដថា“យើងនឹងអនុញ្ញាតឲ្យ ពួកគេធ្វើការតវ៉ានៅលើសួនសេរីភាព ប៉ុន្ដែ យើងមិនអាចអនុញ្ញាតឲ្យពួកគេហែក្បួនឡើយ”។
លោកថ្លែងបន្ដទៀតថា “ ប្រជាពលរដ្ឋកម្ពុជាកំពុងកាន់ព្រះរាជមរណទុក្ខសម្តេចឪដែលបានយាងចូលទិវង្គតនៅឡើយ ហើយ[ការដង្ហែហែក្បួន] ក្នុងរាជធានីភ្នំពេញវានឹងធ្វើឲ្យប៉ះពាល់ដល់សណ្តាប់ធ្នាប់សាធារណៈ”៕
ប្រែសម្រួលដោយ ឃិន ណៃ