កាលពីម្សិលមិញ នៅក្នុងរាជធានីភ្នំពេញគេបានចាប់ផ្តើមសាងសង់ព្រះមេរុសម្រាប់បូជាព្រះបរមសពសម្តេចឪ ដែលនឹងត្រូវបូជានៅក្នុងខែកុម្ភៈ។
កម្មករនៅវាលព្រះមេរុនៅទល់មុខសារមន្ទីរជាតិ និងនៅក្បែរព្រះបរមរាជវាំង បានជីកកកាយមួយផ្នែកធំនៃតំបន់ដែលមានស្មៅក្រាស់នេះ។
ព្រះអង្គម្ចាស់ សុីសុវត្ថិធម្មិកោ ដែលជាប្រធានខុទ្ទកាល័យព្រះបរមសពសម្តេចឪបានមានបន្ទូលថា “ ពួកគេកំពុងជីកដីដើម្បីរៀបចំវាលព្រះមេរុសម្រាប់ពិធីបូជាព្រះបរមសព ដែលនឹងប្រព្រឹត្តទៅក្នុងខែកុម្ភៈ”។ ព្រះមហាវីរក្សត្រនរោត្តម សីហនុបានយាងចូលទិវង្គតដោយសារគាំងបេះដូងនៅក្នុងទីក្រុងប៉េកាំងកាលពីថ្ងៃទី១៥ ខែតុលាហើយព្រះបរមសពរបស់ព្រះអង្គ បច្ចុប្បន្នកំពុងតម្កល់នៅក្នុងព្រះបរមរាជវាំង។
អតីតព្រះមហាក្សតអង្គនេះ នឹងត្រូវបូជាក្នុងពិធីដ៏ល្អិតល្អន់មួយទៅតាមប្រពៃណីរបស់រាជវង្សខ្មែរ។ ព្រះរាជពិធីបុណ្យព្រះសពបែបនេះ មិនបានអនុវត្តចាប់តាំងពីឆ្នាំ១៩៦០មកម្លេ៉ះ។ ព្រះអង្គម្ចាស់ ធម្មិកោ បានមានព្រះបន្ទូលថា នៅពេលឆាប់ៗនេះកម្មករនឹងស្ថាបនា “ព្រះមេរុ” មួយនៅលើវាលព្រះមេរុ ដែលមានលក្ខណៈដូចគ្នានឹងព្រះមេរុបូជាព្រះបរមសពព្រះមហាក្សត្រសុរាម្រឹតកាលពីជាង៥០ឆ្នាំមុន។
ពិធីបូជាព្រះបរមសព ទៅតាមទំនៀមទម្លាប់ព្រះរាជវង្សខ្មែរ ត្រូវបានរៀបចំឡើងតំណាងឲ្យភ្នំព្រះសុមេរុនៅក្នុងទេវកថានៃសាសនាហិណ្ឌូ៕
ប្រែសម្រួលដោយចេវ ប៊ុននី