ជាមួយនឹងការប្រកួតប្រជែងនៅក្នុងទីផ្សារទូរគមនាគមន៍របស់ប្រទេសកម្ពុជា ក្រុមហ៊ុនទូរស័ព្ទចល័តធំចំនួនពីរបានប្រទាញប្រទង់គ្នាចំពោះបញ្ហាតម្លៃសេវាហៅចេញ ហើយកំពុងមាន ការខ្វែងគំនិតគ្នានៅក្នុងយុទ្ធសាស្ត្រដែលខ្លួនកំពុងប្រើ ដើម្បីទទួលបានចំណែកទីផ្សារ។
កាលពីថ្ងៃសុក្របញ្ញត្តិករទូរគមនាគមន៍កម្ពុជា បានចេញបទបញ្ជាឲ្យក្រុមហ៊ុនទូរស័ព្ទចល័តគោរពតាមច្បាប់ឆ្នាំ២០០៩ ដែលបានកំណត់តម្លៃហៅចេញអប្បបរមា។
ក្រុមហ៊ុនទូរស័ព្ទចល័តស្មាត (Smart) ដែលក្រុមហ៊ុនអាសៀតា គ្រុប ប៊ីអេចឌី (Axiata Group Bhd) នៅក្នុងប្រទេសម៉ាឡេស៊ី ជាអ្នកគ្រប់គ្រង លើកឡើងថា ការសម្រេចរបស់រដ្ឋាភិបាល គឺអយុត្តិធម៌ចំពោះអ្នកប្រើប្រាស់ និងផ្ទុយពីគំនិតទីផ្សារសេរី។ ប៉ុន្តែ ក្រុមហ៊ុនទូរស័ព្ទចល័តម៉ូប៊ីថែល ដែលគ្រប់គ្រងដោយក្រុមហ៊ុនរ៉ូយ៉ាល់ គ្រុប ជាក្រុមហ៊ុនដ៏ធំមួយក្នុងប្រទេសកម្ពុជា លើកឡើងថា ក្រុមហ៊ុនស្មាតបានផ្ដល់សេវាថោកជ្រុល ដែលវាមិនត្រឹមត្រូវឡើយក្នុងការធ្វើជំនួញ។
លោក អៀន វ៉ាតសុន (Ian Watson) នាយកប្រតិបត្តិក្រុមហ៊ុនម៉ូប៊ីថែល បានលើកឡើងកាលពីម្សិលមិញថា “ អ្វីដែលបានធ្វើឲ្យមានបញ្ហានោះ គឺប្រាក់បន្ថែម៥០០ភាគរយរបស់ក្រុមហ៊ុនស្មាត ដែលជាប្រាក់បន្ថែមឆ្កួតៗ។ ហើយអ្នកដែលត្រូវបន្ទោសចំពោះបញ្ហានេះគឺក្រុមហ៊ុនស្មាត”។
ទោះបីជាមានការលើកឡើងថា ក្រុមហ៊ុនម៉ូប៊ីថែលស្វាគមន៍ចំពោះការប្រកួតប្រជែងនៅក្នុងទីផ្សារក៏ដោយ ក៏លោក វ៉ាតសុន បានមានប្រសាសន៍ថា យុទ្ធសាស្ត្រដែលក្រុមហ៊ុនស្មាតប្រើប្រាស់មិនបានបង្កើតបរិយាកាសល្អសម្រាប់ក្រុមហ៊ុនទាំងអស់ ដែលប្រកួតប្រជែងគ្នានៅក្នុងទីផ្សារដែលមានការប្រកួតប្រជែងខ្លាំងនៅក្នុងប្រទេសកម្ពុជានោះទេ។
លោកបានមានប្រសាសន៍ថា “ អ្វីដែលពួកគេធ្វើ គឺជាការប្រកួតប្រជែងដោយមិនត្រឹមត្រូវ”។ កាលពីថ្ងៃច័ន្ទ ទាំងក្រុមហ៊ុនស្មាត និងក្រុម
ហ៊ុនម៉ូប៊ីថែលសុទ្ធតែបាននិយាយថា ខ្លួនបានយល់ព្រមដកចេញនូវការផ្ដល់ដ៏ពិសេសរបស់ខ្លួនដល់អតិថិជននេះ។
ចាប់តាំងពីពាក់កណ្ដាលខែកុម្ភៈមក ក្រុមហ៊ុនស្មាតបានផ្សាយពាណិជ្ជកម្មអំពីការថែមលុយ៥០០ភាគរយ៣០០ភាគរយសម្រាប់ការហៅទូរស័ព្ទចេញ
និងផ្ញើសារ ហើយ២០០ភាគរយទៀតសម្រាប់ប្រើអីុនធើណិត។ នៅដំណាច់ឆ្នាំ២០១២ ក្រុមហ៊ុនម៉ូប៊ីថែលបានចាប់ផ្ដើមផ្ដល់ប្រាក់បន្ថែមស្រដៀងនេះដែរ គឺអតិថិជនទទួលបានទឹកប្រាក់បន្ថែម១០០ភាគរយ។
ទោះបីជាគ្មានការលើកឡើងពីក្រុមហ៊ុនម៉ូប៊ីថែលចំៗឈ្មោះក៏ដោយ តែលោក ថូម៉ាសហាន់ (Thomas Hundt) នាយកប្រតិបត្តិរបស់ក្រុមហ៊ុនស្មាត បានមានប្រសាសន៍កាលពីម្សិលមិញថា ក្រុមហ៊ុនរបស់លោកមិនអាចត្រូវបានចោទប្រកាន់ពីបទប្រតិបត្តិការមិនត្រឹមត្រូវនោះឡើយ ហើយលើកឡើងថា វាអាស្រ័យលើក្រុមហ៊ុនផ្សេងៗ ដែលចង់ប្រកួតប្រជែងគ្នា។ លោកក៏មានប្រសាសន៍ដែរថា ជំនួសឲ្យការហាមក្រុមហ៊ុនមិនឲ្យផ្ដល់ប្រាក់បន្ថែម រដ្ឋាភិបាលគួរតែទុកឲ្យមានការប្រកួតប្រជែងក្នុងទីផ្សារសេរី។
បន្ទាប់ពីការប្រកាសផ្ដល់ប្រាក់បន្ថែម៥០០ភាគរយរបស់ក្រុមហ៊ុនស្មាត ត្រូវបានលុបចោល អតិថិជនរាប់ពាន់នាក់របស់ខ្លួន បានសម្ដែងការមិនពេញចិត្តចំពោះការសម្រេចរបស់ក្រុមហ៊ុននេះ នៅលើគេហទំព័របណ្ដាញទំនាក់ទំនងសង្គមហ្វេសប៊ុក។
ការបង្ហោះតាមហ្វេសប៊ុកជាច្រើនបានរិះគន់ក្រុមហ៊ុនម៉ូប៊ីថែលចំពោះការសម្រេចថ្មីៗរបស់បញ្ញត្តិករទូរគមនាគមន៍កម្ពុជា ដែលបានប្រាប់ឲ្យក្រុមហ៊ុនទូរស័ព្ទចល័តទាំងអស់ក្នុងប្រទេសកម្ពុជាគោរពតាមសេចក្តីប្រកាសឆ្នាំ២០០៩ ដែលបានកំណត់តម្លៃហៅចេញអប្បបរមា៤,៥សេនក្នុងមួយនាទីសម្រាប់ការហៅក្នុងប្រព័ន្ធ និង៥,៩៥សេនក្នុងមួយនាទីសម្រាប់ហៅឆ្លងប្រព័ន្ធ។
លោក ថូម៉ាស ហាន់ បានមានប្រសាសន៍ថា“ ការផ្ដល់យោបល់មកវិញរបស់អតិថិជន គឺបានលើកឡើងនៅក្នុងភាសាមួយយ៉ាងច្បាស់
លាស់។ គ្មាននរណាម្នាក់អាចស្ដីបន្ទោសយើងចំពោះការអនុវត្តមិនត្រឹមត្រូវនោះឡើយ”។
លោកបានបន្ថែមថា “ ប្រសិនបើការប្រកួតប្រជែងមិនដំណើរការដោយប្រសិទ្ធភាពដូចយើងនោះទេ អ៊ីចឹងពួកគេត្រូវតែធ្វើការឲ្យមានប្រសិទ្ធភាព”។
លោក ហាន់ មានប្រសាសន៍ថា ក្រុមហ៊ុន ស្មាត នឹងស្នើសុំឲ្យរដ្ឋាភិបាលត្រួតពិនិត្យប្រកាសកាលពីឆ្នាំ២០០៩ឡើងវិញ។
លោកមានប្រសាសន៍ថា“ យើងជាក្រុមហ៊ុនមានកេរ្តិ៍ឈ្មោះ និងគោរពច្បាប់។ យើងចង់ឲ្យរដ្ឋាភិបាលពិនិត្យឡើងវិញនូវប្រកាសនេះ ដើម្បីឆ្លុះបញ្ចាំងពីផលប្រយោជន៍របស់អតិថិជន ដែលនៅទីបញ្ចប់ គួរតែជាផលប្រយោជន៍ខ្ពស់បំផុត ដែលរដ្ឋាភិបាលគួរតែគោរពតាម”។
លោក វ៉ាតសុន បានបដិសេធថា ក្រុមហ៊ុនម៉ូប៊ីថែល គ្មានឥទ្ធិពលណាមួយលើសេចក្តីសម្រេចរបស់បញ្ញត្តិករទូរគមនាគមន៍កម្ពុជាក្នុងការកំណត់ទីផ្សារនោះទេ។
លោកមានប្រសាសន៍ថា “ គឺរដ្ឋាភិបាល មិនមែនក្រុមហ៊ុន ម៉ូប៊ីថែល នោះទេ។រដ្ឋាភិបាលជាអ្នកកំណត់ទីផ្សារនេះ។ ក្រុមហ៊ុន ម៉ូប៊ីថែល ត្រូវបានចាត់ទុកដូចគេដូចឯងដែរ គឺដូចជាប្រតិបត្តិករផ្សេងៗទៀតនៅក្នុងប្រទេសកម្ពុជាអ៊ីចឹង។ យើងមិនដឹងអំពីរឿងនេះទេ។ យើងមិនដែលដុតបញ្ឆេះឲ្យមានការប្រកួតប្រជែងតម្លៃនោះទេ។ យើងតែងតែអនុវត្តខ្លួនយើងឲ្យត្រូវតាមបទដ្ឋានខ្ពស់បំផុតនៅលើទីផ្សារ”។
វាមិនមែនជាលើកទី១ទេ ដែលក្រុមហ៊ុនម៉ូប៊ីថែល ផ្តោតលើក្រុមហ៊ុននានា ដែលផ្តល់ការបញ្ចុះតម្លៃខ្លាំងពេកនោះ។ កាលពីឆ្នាំ២០០៩ ក្រុមហ៊ុននេះបានរិះគន់ក្រុមហ៊ុន ប៊ីឡាញ ដែលនៅពេលនោះនៅក្រោមការគ្រប់គ្រងរបស់ក្រុមហ៊ុន វីមពែល អិលធីឌី ចំពោះការលក់សេវាក្រោមថ្លៃដែលបានកំណត់ ហើយបានចោទប្រកាន់ក្រុមហ៊ុន ប៊ីឡាញ ថាធ្វើអាជីវកម្មដោយមិនត្រឹមត្រូវ។ ដោយសារតែរឿងនេះ ក្រុមហ៊ុន ម៉ូប៊ីថែល បានបដិសេធមិនតភា្ជាប់បណ្តាញទូរស័ព្ទរបស់ខ្លួនជាមួយបណ្តាញទូរស័ព្ទរបស់ក្រុមហ៊ុន ប៊ីឡាញ។
កាលពីម្សិលមិញ លោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ថ្លែងការពារសេចក្តីសម្រេចរបស់រដ្ឋាភិបាលកាលពីថ្ងៃសុក្រ ដែលបានទទូចឲ្យក្រុមហ៊ុនបម្រើសេវាទូរស័ព្ទទាំងអស់គោរពតាមការកំណត់តម្លៃអប្បបរមាសម្រាប់ការហៅទូរស័ព្ទ។
លោកបានមានប្រសាសន៍ថា “ នេះមិនមែនជាការកាន់ជើង ឬលំអៀងទៅខាងណាមួយនោះទេ គឺសម្រាប់ផលល្អរបស់អ្នករាល់គ្នា។ យើងគ្រាន់តែចង់ឲ្យក្រុមហ៊ុនទាំងអស់ផ្តល់តម្លៃសមរម្យ និងអាចលៃលកបានសម្រាប់មនុស្សរាល់គ្នា ចង់ឲ្យបង្កើនគុណភាព និងសេវាកម្មរបស់ខ្លួន ហើយចង់ឲ្យពង្រីកបណ្តាញ
របស់ខ្លួនតែប៉ុណ្ណោះ”។
កាលពីខែកុម្ភៈ ក្រុមហ៊ុន ស្មាត ម៉ូបាយ និងក្រុមហ៊ុន ហេឡូ (Hello) ដែលគ្រប់គ្រងដោយក្រុមហ៊ុន អាស៊ីអាតា (Axiata) បានរួមបញ្ចូលគ្នា។ ក្រុមហ៊ុននេះបានដាក់យីហោឲ្យខ្លួនឯងឡើងវិញថា ក្រុមហ៊ុន ស្មាត ហើយបានអះអាងថា មានអតិថិជនជាង៥លាននាក់ ដែលធ្វើឲ្យខ្លួនក្លាយជាក្រុមហ៊ុនបម្រើសេវាទូរស័ព្ទធំជាងគេលំដាប់ថ្នាក់ទី២នៅក្នុងទីផ្សារ។
ក្រុមហ៊ុន មិតហ្វូន (Metphone) គឺជាក្រុមហ៊ុនទូរស័ព្ទចល័តធំជាងគេនៅក្នុងទីផ្សារ ចំណែកឯក្រុមហ៊ុនម៉ូប៊ីថែលវិញបានអះអាងថា ខ្លួនមានអតិថិជនចំនួន៤លាននាក់ដែលធ្វើឲ្យខ្លួនក្លាយជាក្រុមហ៊ុនធំជាងគេលំដាប់ថ្នាក់ទី៣នៅក្នុងប្រទេសកម្ពុជា នេះបើយោងតាមតួលេខរបស់រដ្ឋាភិបាល៕
ប្រែសម្រួលដោយ សា៊ ស៊ុយឈាង
និង ហួង កុកទៀន