កាលពីម្សិលមិញ លោកនាយករដ្ឋមន្ត្រី ហ៊ុន សែន បានធ្វើការចោទប្រកាន់ខ្លាំងៗជាថ្មីចំពោះគណបក្សសង្គ្រោះជាតិ ដោយអះអាងថា គណបក្សនេះនឹងធ្វើតាមរបបខ្មែរក្រហម និងបិទធនាគារ ប្រសិនគណបក្សនេះទទួលបានជោគជ័យនៅក្នុងការបោះឆ្នោតជាតិនៅខែកក្កដាខាងមុខនេះ។លោក ហ៊ុន សែន លើកឡើងពេលថ្លែងសុន្ទរកថានៅក្រុងកែបថា “ ពួកគេបាននិយាយទាំងចំហនិងខ្សឹបៗថា នៅពេលពួកគេឈ្នះឆ្នោត ពួកគេនឹងលុបចោលបំណុលរបស់អ្នកគ្រប់គ្នា”។
លោកបានបន្តថា “ នេះជាអ្វីដែលខ្ញុំចង់និយាយ ខ្មែរក្រហមត្រឡប់មកវិញហើយ”។ របបនេះលុបបំបាត់លុយ បិទធនាគារជាតិ បន្ទាប់ពីបានចូលកាន់កាប់ក្រុងភ្នំពេញក្នុងឆ្នាំ១៩៧៥។
លោក ហ៊ុន សែន បានបន្តថា “ ពួកគេធ្វើដូច ប៉ុល ពត អ៊ីចឹង ហើយបំផ្លាញធនាគារ និងច្បាប់ទាំងអស់។ខ្មែរក្រហម នៅពេលចូលកាន់អំណាច និងចូលក្រុងភ្នំពេញ ពួកគេបានចូលទៅធនាគារកណ្តាលមុនគេ”។ លោកថ្លែងថា “ ពួកគេត្រូវបំផ្លាញធនាគារ ដើម្បីរំដោះអ្នកជំពាក់បំណុលគេ។ ម្យា៉ងវិញទៀត ប្រសិនបើពួកគេមិនធ្វើដូច្នោះទេ មានន័យថា ពួកគេភូតកុហកប្រជាពលរដ្ឋ”។
លោកនាយករដ្ឋមន្ត្រីក៏បានចោទគណបក្សសង្គ្រោះជាតិផងដែរថា បានយកប្រាក់ពីបេក្ខជនឈរឈ្មោះបោះឆ្នោតរបស់ខ្លួនម្នាក់ៗចំនួន៤០.០០០ដុល្លារដើម្បីបានឈរឈ្មោះបោះឆ្នោត និងបានអះអាងថា យ៉ាងតិចណាស់មានអនាគតសមាជិកសភាម្នាក់
ក្នុងចំណោមអនាគតសមាជិកសភាគណបក្សប្រឆាំង កំពុងតវ៉ាអំពីរឿងនេះ។
លោកនាយករដ្ឋមន្ត្រីបានអះអាងថា “ ពេលនេះ នៅក្នុងខេត្តកំពត បេក្ខជនមា្នក់របស់គណបក្សសង្គ្រោះជាតិ កំពុងតែក្បត់នឹងផែនការនេះ ពីព្រោះគាត់ត្រូវគេដាក់ក្នុងតំណែងមិនល្អ”។
លោក ហ៊ុន សែន ក៏បានចំអកដល់ការអត្ថាធិប្បាយម្តងហើយម្តងទៀតរបស់គណបក្សប្រឆាំងដែលថា លោកខ្លាចចាញ់ឆ្នោតដែលនឹងបញ្ចប់ការកាន់អំណាចរយៈពេលជិត៣០ឆ្នាំរបស់លោកក្នុងប្រទេសកម្ពុជាដែលជាការកាន់អំណាចយូរបំផុតក្នុងចំណោម
មេដឹកនាំនៅអាស៊ីនាសម័យនេះ។
លោក ហ៊ុន សែន សួរថា “ ខ្ញុំខ្លាចឬ? តើមុខខ្ញុំដូចមនុស្សភ័យខ្លាចទេ?តើនេះជាមុខភ័យខ្លាចរបស់អ្នកធ្លាប់ឆ្លងកាត់ សមរភូមិប្រយុទ្ធ
ចំនួន១០៥ឬ?”។ លោកធ្លាប់ធ្វើជាទាហានខ្មែរក្រហមមានឋានន្តរស័ក្តិកណ្តាលដែលក្រោយមក បានផ្តាច់ខ្លួនរត់ទៅប្រទេសវៀតណាម និងបានត្រឡប់មកផ្តួលរំលំ ប៉ុល ពត វិញ ក្នុងឆ្នាំ១៩៧៩។
លោក កឹម សុខា ប្រធានស្តីទីគណបក្សសង្គ្រោះជាតិ បានច្រានចោលការអះអាងរបស់លោក ហ៊ុន សែន ដែលថា គណបក្សរបស់លោកបានសន្យាលុបបំបាត់បំណុលរបស់ប្រជាពលរដ្ឋ ឬបិទធនាគារ។
លោក កឹម សុខា លើកឡើងអំពីការរិះគន់របស់លោកនាយករដ្ឋមន្ត្រី ហ៊ុន សែន ថា “ គាត់កំពុងនិយាយបំផ្លើសហើយ”។ លោកបានបន្តថា “ គណបក្សសង្គ្រោះជាតិ មិនដែលនិយាយដូច្នេះទេ។ យើងមិនដែលធ្វើការសន្យាណាមួយឡើយ”។ លោកក៏បានបដិសេធចំពោះការអះអាងរបស់លោកនាយករដ្ឋមន្ត្រីដែលថា បេក្ខជនគណបក្សប្រឆាំងត្រូវបង់ប្រាក់ឲ្យគណបក្សដើម្បីឈរឈ្មោះបោះឆ្នោត។
លោក កឹម សុខា ថ្លែងថា “គណបក្សសង្គ្រោះជាតិមិនដែលយកប្រាក់ពីសមាជិកដើម្បីឲ្យពួកគេកាន់តួនាទីជាសមាជិករដ្ឋសភាទេ។ ជាធម្មតា បេក្ខជនបានចំណាយប្រាក់របស់ខ្លួនផ្ទាល់សម្រាប់ធ្វើយុទ្ធនាការឃោសនាបោះឆ្នោតរបស់ខ្លួន”។
លោក ជា ប៉ូច បេក្ខជនម្នាក់ក្នុងចំណោមបេក្ខជនរបស់គណបក្សសង្គ្រោះជាតិប្រចាំខេត្តកំពត ដែលជាប្រធានក្រុមរបស់គណបក្សប្រឆាំងផងដែរ បានថ្លែងថា លោកនាយករដ្ឋមន្ត្រីអះអាងបែបនេះ ពីព្រោះគាត់ខ្លាច គណបក្សប្រជាជនកម្ពុជាបាត់បង់អាសនៈនៅពេលបោះឆ្នោត។ លោកបន្តថា “ នេះគ្រាន់តែជាសង្គ្រាមចិត្តសាស្ត្រប្រឆាំងគណបក្សសង្គ្រោះជាតិប៉ុណ្ណោះ។ គណបក្សសង្គ្រោះជាតិក្នុងខេត្តកំពត រឹងមាំណាស់។ យើងនឹងមិនចុះចូលជាមួយគណបក្សប្រជាជនកម្ពុជាទេ”៕
ប្រែសម្រួលដោយ ចេវ ប៊ុននី