អ្នកភូមិ និងអាជ្ញាធរបាននិយាយថា ប្រជាពលរដ្ឋប្រហែល៣០០គ្រួសារមកពីស្រុកព្រះនេត្រព្រះ ខេត្តបន្ទាយមានជ័យ ដែលបានជាប់ពាក់ព័ន្ធនឹងវិវាទដីធ្លីពីរករណីដាច់ដោយឡែកពីគ្នាជាយូរមកហើយជាមួយកងយោធ ពលខេមរភូមិន្ទនោះ កាលពីម្សិលមិញបានដាក់ពាក្យបណ្តឹងទៅអភិបាលខេត្ត ស្នើសុំការអនុញ្ញាតធ្វើស្រែបណ្តោះអាសន្នលើដីនេះសិន រហូតដល់មានការដោះស្រាយកម្មសិទ្ធិចប់សព្វគ្រប់។
លោក មាន សំអូន តំណាងអ្នកភូមិ៣៣ គ្រួសារមកពីភូមិចំនួនពីរក្នុងឃុំជប់វារី មានប្រសាសន៍ថា “ទាហានបានរារាំងពួកយើងមិនឲ្យធ្វើស្រែលើដីនេះទាំងស្រុងតែម្តង។ ហើយចាប់តាំងពីពេលនោះមក យើងមិនបានធ្វើស្រែចម្ការ និងដាំដំឡូងមីទៀតឡើយ។
ខ្លួនខ្ញុំផ្ទាល់ និងកូនៗមកពីគ្រួសារដទៃទៀតបានបង្ខំចិត្តស្វែងរកការងារខុសច្បាប់ក្នុងប្រទេសថៃ”។ យោងតាមលោក សំអូន បានឲ្យដឹងថា ក្នុងឃុំជប់វារី អ្នកភូមិបានធ្វើស្រែចម្ការលើផ្ទៃដីទំហំ២៦ហិកតានេះ ចាប់តាំងពីការដួលរលំរបបខ្មែរក្រហមក្នុងឆ្នាំ១៩៧៩មកម៉្លេះ។
លោកបានបន្ថែមថា ពួកគេបានរារាំងមិនឲ្យយើងធ្វើស្រែចម្ការបណ្ដោះអាសន្ន នៅពេលដែលកងកំាភ្លើងធំនៃកងយោធពលខេមរភូមិន្ទ បានផ្លាស់មកកាន់តំបន់នេះក្នុងឆ្នាំ១៩៨៨ ប៉ុន្ដែបានចាប់ផ្តើមធ្វើឡើងវិញ ក្រោយពីការដកកងកាំភ្លើងធំនេះចេញក្នុងឆ្នាំ១៩៩៤ រហូតដល់កងទ័ពនេះបានត្រឡប់មកវិញម្ដងទៀតកាលពីឆ្នាំមុន។
ក្នុងឃុំព្រះនេត្រព្រះ អ្នកភូមិ២៥៤គ្រួសារមានវិវាទលើដីទំហំ១៧៤ហិកតា ដែលពួកគាត់បានធ្វើស្រែចម្ការចាប់តាំងពីឆ្នាំ១៩៩៤មក គឺចាប់តាំងពីកងរថក្រោះនៃកងយោធពលខេមរភូមិន្ទ បានមកដល់ក្នុងឆ្នាំ២០០៨។
លោក មាស នី តំណាងអ្នកភូមិបានប្រាប់រឿងរា៉វស្រដៀងគ្នាអំពីគ្រួសារអ្នកភូមិ ដែលពឹងផ្អែកលើការធ្វើស្រែចម្ការដើម្បីរស់ ដោយត្រូវបង្ខំចិត្តឆ្លងដែនចូលប្រទេសថៃដោយខុសច្បាប់ ដើម្បីស្វែងរកការងារធ្វើ។ លោកនិយាយថា “ សំណើរបស់ពួកយើងគឺចង់ឲ្យអាជ្ញាធរយល់ព្រមឲ្យពួកយើងធ្វើស្រែចម្ការ និងដាំដំណាំផ្សេងៗទៀតបណ្ដោះអាសន្នសិន។ លោកបានបន្ថែមថា អ្នកភូមិបានដាក់ពាក្យបណ្ដឹងជាច្រើនលើកច្រើនសាទៅរដ្ឋាភិបាលថ្នាក់ខេត្ត តែគ្មានប្រយោជន៍ឡើយ ចាប់តាំងពីឆ្នាំ២០០៨មក។
លោក ចុង ភេទ អភិបាលរងខេត្តបានមានប្រសាសន៍កាលពីម្សិលមិញថា លោកមិនទាន់ទទួលបានពាក្យបណ្ដឹងថ្មីនេះនៅឡើយទេ តែលោកបានបន្ថែមថា លោកនឹងបញ្ជូនពាក្យបណ្ដឹងនោះទៅលោកអភិបាលខេត្ត ហើយស្វែងរកដំណោះស្រាយឆាប់ៗតាមដែលលោកអាចធ្វើទៅបាន។
លោក ចុង ភេទ បានមានប្រសាសន៍ថា “ ដីស្រែមានជីជាតិរបស់យើង គឺជារបស់ទាហានរថក្រោះ ដែលធ្វើឲ្យអ្នកភូមិរបស់យើងមានការភ័យខ្លាច និងកាន់តែក្រីក្រទៅ។ នោះជាមូលហេតុដែលនាំឲ្យមានការឆ្លងដែនខុសច្បាប់ពីសំណាក់ជនចំណាកស្រុកនៅទីនេះ”។
លោក ស៊ុម ចាន់គា អ្នកសម្របសម្រួលប្រចាំខេត្តរបស់អង្គការសិទ្ធិមនុស្សអាដហុក បានយល់ស្របថា វិវាទដីធ្លីដែលបន្តកើតមាននេះ ជាហេតុធ្វើឲ្យមានការធ្វើចំណាកស្រុកខុសច្បាប់។
លោកបានបន្ថែមថា “ នៅពេលវិវាទដីធ្លីកើតមានយូរអង្វែងដោយគ្មានដំណោះស្រាយសមរម្យនោះ អ្នកភូមិដែលរងផលប៉ះពាល់បានបង្ខំចិត្តធ្វើចំណាកស្រុកខុសច្បាប់ទៅស្វែងរកការងារក្នុងប្រទេសថៃ”។លោកឧត្តមសេនីយ៍ត្រី ឡាញ់ កៅ ដែលបានមានប្រសាសន៍ក្នុងពេលកន្លងមកថា កង
រថក្រោះត្រូវសាងសង់បន្ទាយក្នុងឃុំព្រះនេត្រព្រះ ដើម្បីការពារព្រំដែននោះ មិនអាចទាក់ទងសុំអត្ថាធិប្បាយបានទេ កាលពីម្សិលមិញ៕
ប្រែសម្រួលដោយ សោម សារុន