ឧបករណ៍សម្រាប់បញ្ចាំងភាពយន្តពិសេសមកពីបារាំង និងភាពយន្តជាច្រើនរឿងមកពីទូទាំងពិភពលោក ត្រូវបានដឹកមកដល់កម្ពុជាដើម្បីដាក់បញ្ចាំងនៅមហោស្រពមរតកភាពយន្តអន្តរជាតិក្នុងរាជធានីភ្នំពេញ។
ដោយចាប់ផ្តើមនៅថ្ងៃសៅរ៍នេះ អ្នករៀបចំ មហោស្រពនេះមានប្រសាសន៍ថា ការបញ្ចាំងភាពយន្តនេះមានគោលបំណងលើកទឹកចិត្តឲ្យមានការចាប់អារម្មណ៍ក្នុងការអភិរក្សមរតកភាពយន្ត ជាពិសេសក្នុងចំណោមយុវជន។
លោកស្រី សេវើរីន វេម៉ារេ (Severine Wemaere) នាយកគ្រប់គ្រងមូលនិធិ Technicolor Foundation ដែលបានជួយរៀបចំមហោស្រពភាពយន្តរយៈពេលមួយសប្តាហ៍កន្លះនៅមជ្ឈមណ្ឌលបូផាណាក្នុងរាជធានីភ្នំពេញ និងនៅសាលសន្និសីទចតុមុខបានមានប្រសាសន៍ថា“វិស័យភាពយន្តកំពុងប្រឈមនឹងការបាត់បង់ជារៀងរហូតនៅទូទាំងពិភពលោក”។
លោកស្រី វេម៉ារេស បានមានប្រសាសន៍ថា ការបញ្ចាំងភាពយន្តដែលទំហំ៣៥មីល្លីម៉ែត្រដែលបានបាត់បង់យ៉ាងលឿនដោយសារតែការប្រើប្រព័ន្ធឌីជីថលនោះ គឺជាចំណុចសំខាន់របស់មហោស្រពនេះ។
លោកស្រីបានបន្ថែមថា ភាពយន្តប្រើកាយវិការប្រហែល៩០ភាគរយនៅទូទាំងពិភពលោកបានបាត់បង់ដោយសារការ ផ្លាស់ប្តូរ និងខ្វះការថែរក្សា។
លោក រិទ្ធី ប៉ាន់ នាយក និងជាស្ថាបនិកមជ្ឈមណ្ឌលបូផាណាបានមានប្រសាសន៍ថា ភាពយន្តដែលដាក់បញ្ចាំងនៅ មហោស្រពនេះភាគច្រើនផ្តោតលើការរាំរែក ហើយនឹងដាក់បញ្ចាំងដោយមិនមានការលក់សំបុត្រឡើយ ដើម្បីផ្តល់ឱកាសដល់ប្រជាពលរដ្ឋខ្មែរបានទស្សនាតាមអេក្រង់ដ៏ធំ ជំនួសឲ្យការទស្សនាតាមកំុព្យូទ័រយួរដៃ។
លោក រិទ្ធី ប៉ាន់ ដែលទទួលបានពានរង្វាន់សំខាន់មួយនៅមហោស្រពភាពយន្ត Cannes កាលពីសប្តាហ៍មុនបានមានប្រសាសន៍ថា“ ភាពយន្តនេះផ្តោតការយកចិត្តទុកដាក់ជាពិសេសលើការអប់រំពលរដ្ឋខ្មែរអំពីភាយន្តែដលទទួលបានជោគជ័យក្នុងអតីតកាល”៕
ប្រែសម្រួលដោយ សោម សារុន