អង្គភាពព័ត៌មាន និងប្រតិកម្មរហ័សរបស់រដ្ឋាភិបាល បានបដិសេធថា ខ្លួនមិនជាប់ទាក់ទងនឹងការផ្សព្វផ្សាយរូបភាពកាត់តមួយសន្លឹករបស់សមាជិកគណបក្សប្រឆាំង គឺលោកស្រី មូរ សុខហួរ ដែលបានលេចឡើងនៅលើគេហទំព័រភ្ជាប់បណ្ដាញទំនាក់ទំនងសង្គមហ្វេសប៊ុក កាលពីថ្ងៃសៅរ៍ទេ។
រូបភាពនេះបង្ហាញផ្ទៃមុខលោកស្រី មូរ សុខហួរ ដែលត្រូវបានយកទៅភ្ជាប់នឹងដងខ្លួនរបស់ស្ត្រីអាក្រាតពាក់កណ្ដាលកាយម្នាក់ និងដែលសំដៅលើលោកស្រីថា ជាអតីតមេបន និងការងាររបស់លោកស្រីជាសមាជិករបស់គណបក្សប្រឆាំង គឺគណបក្សសង្គ្រោះជាតិដែលមានលោក សម រង្សុី ជាប្រធាន។
លោកស្រី មូរ សុខហួរ បានឲ្យដឹងកាលពីម្សិលមិញថា លោកស្រីមានការខកចិត្តណាស់ដែលទំព័រហ្វេសប៊ុកប្រើឈ្មោះរបស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ស្ថិតក្នុងចំណោមអ្នកប្រើហ្វេសប៊ុករាប់សិបនាក់ដែលបានចែកចាយរូបភាពកាត់តនេះពីម្នាក់ទៅម្នាក់។
លោកស្រីមានប្រសាសន៍ថា “នៅពេលដែលខ្ញុំបានឃើញវាជាលើកដំបូង ខ្ញុំបានបង្ខំចិត្តមើលវា ប៉ុន្ដែខ្ញុំត្រូវរក្សាភាពរឹងមាំ និងគ្រប់គ្រងអារម្មណ៍ខ្លួនឯងក្នុងនាមជាស្ត្រីម្នាក់ ព្រោះខ្ញុំស្ថិតនៅក្នុងឆាកនយោបាយ។
មិនមែនគ្រាន់តែជាការរើសអើងភេទទេ គឺពួកគេមានចេតនាសំដៅលើថ្នាក់ដឹកនាំកំពូលរបស់គណបក្សសង្គ្រោះជាតិ។ សម្រាប់រូបខ្ញុំ រូបភាពបែបនេះស្ដែងឲ្យឃើញថា គូបដិបក្ខរបស់យើងកំពុងខ្លាចយើង”។
លោក ឯក ថា អ្នកនាំពាក្យរបស់អង្គភាពព័ត៌មាន និងប្រតិកម្មរហ័សមិនបានធ្វើអត្ថាធិប្បាយទេ នៅពេលត្រូវបានសួរអំពីទំព័រហ្វេសប៊ុកប្រើឈ្មោះអង្គភាពរបស់លោក និងដែលមានទាំងរូបភាពរបស់អ្នកនាំពាក្យទីស្ដីការគណៈរដ្ឋមន្ត្រី គឺលោក ផៃ ស៊ីផាន។
លោក ផៃ ស៊ីផាន បានអះអាងថា លោកគ្មានទំនាក់ទំនងអ្វីទាល់តែសោះជាមួយនឹងទំព័រហ្វេសប៊ុកដែលលោកបានហៅថា ជាការលួចប្រើអត្តសញ្ញាណរបស់អ្នកដទៃនេះ។
លោកបានមានប្រសាសន៍ថា “ខ្ញុំនឹងស្វែងរកអ្នកប្រព្រឹត្តបែបនេះ និងឲ្យអាជ្ញាធរបិទវាចោល។ វាមិនមែនជារបស់ខ្ញុំឡើយ វាគឺជាគណនីហ្វេសប៊ុកក្លែងក្លាយ”។
លោក ស៊ីផាន បានថ្លែងបន្ដថា “ រដ្ឋាភិបាលក៏មានជំហរប្រឆាំងអ្នកដែលកាត់តរូបភាពបែបនេះដែរ។ វាជាទង្វើគ្មានសីលធម៌ទេ” ដោយបានបន្ថែមថា រូបភាពរបស់លោកខ្លួនឯង រួមទាំងរូបថតរបស់លោកនាយករដ្ឋមន្ត្រី ហ៊ុន សែន និងភរិយារបស់លោក គឺលោកស្រី ប៊ុនរ៉ានី ហ៊ុន សែន ក៏ធ្លាប់ត្រូវបានកាត់តក្នុងន័យប្រមាថ ហើយត្រូវបានបង្ហោះតាមប្រព័ន្ធអុីនធើណិតក្នុងពេលកន្លងមកដែរ។
គិតត្រឹមល្ងាចថ្ងៃម្សិលមិញនេះ មនុស្ស៣៥នាក់បានចែករំលែករូបភាពប្រមាថនេះ ហើយមនុស្សជាង១០០នាក់ផ្សេងទៀតបានបញ្ចេញមតិរបស់ខ្លួន ភាគច្រើនគឺបានសម្ដែងកំហឹងចំពោះអ្នកផ្សព្វផ្សាយរូបភាពបែបនេះ ហើយបានសម្ដែងការគាំទ្ររបស់ខ្លួនចំពោះលោកស្រី មូរ សុខហួរ។
អ្នកបញ្ចេញមតិម្នាក់បានសរសេរនៅលើទំព័រនេះថា “លោកស្រី មូរ សុខហួរ គឺជាស្ត្រីខ្មែរ តើហេតុអ្វីបានជាអ្នកបង្ហោះរូបភាពបែបនេះ? ម្ដាយរបស់អ្នកក៏ជាស្រីដែរ។ ហេតុអ្វីបានជាអ្នកធ្វើដូច្នេះ”។
អ្នកបញ្ចេញមតិផ្សេងៗទៀតនៅលើទំព័រនេះបានសរសេរលេខប្រាំពីរ ដែលជាលេខរៀងរបស់គណបក្សសង្គ្រោះជាតិសម្រាប់ការបោះឆ្នោត នៅថ្ងៃទី២៨ ខែកក្កដាខាងមុខនេះ ដើម្បីបង្ហាញពីការសាមគ្គីគ្នា៕
(រាយការណ៍បន្ថែមដោយ ផន បុប្ផា)
ប្រែសម្រួលដោយ ស៊ុំ សុខភុំ