នគរបាលបាននិយាយថា មនុស្សបួននាក់រួមទាំងក្មេងពីរនាក់ផង បានស្លាប់កាលពីរសៀលម្សិលមិញ ហើយមនុស្សប្រាំពីរនាក់ទៀតបានរងរបួស នៅពេលរថយន្តក្រុងមួយគ្រឿងបានបុកនឹងរថយន្តធុនតូចមួយគ្រឿងរបស់គ្រួសារជនជាតិកូរ៉េខាងត្បូងមួយគ្រួសារនៅលើកំណាត់ផ្លូវជាតិលេខ៦ក្នុងខេត្តកំពង់ធំ។
លោក យ៉ុង សោម អធិការនគរបាលស្រុកស្ទោង បានមានប្រសាសន៍ថា បុរសជនជាតិកូរ៉េខាងត្បូងម្នាក់ និងកូនពីរនាក់របស់ខ្លួនគឺកូនស្រីអាយុ៨ឆ្នាំ និងកូនប្រុសអាយុ១០ឆ្នាំបានស្លាប់នៅកន្លែងកើតហេតុ។
លោកមានប្រសាសន៍ទៀតថា “ សមាជិកបីនាក់នៃគ្រួសារជនជាតិកូរ៉េនេះបានស្លាប់ភ្លាមៗនៅកន្លែងកើតហេតុ ហើយបីនាក់ទៀតក្នុងគ្រួសារដដែលនេះបានរងរបួសធ្ងន់” ក្នុងនោះរួមទាំងប្រពន្ធរបស់អ្នកបើកបរ កូនស្រីម្នាក់របស់ពួកគេអាយុ១ឆ្នាំនិងកូនប្រុសម្នាក់ទៀតដែលមានអាយុ៨ឆ្នាំដែលជាកូនភ្លោះនឹងក្មេងប្រុសអាយុ៨ឆ្នាំដែលបានស្លាប់។
លោកលើកឡើងទៀតថា អ្នកបើកបររថយន្តក្រុងពីរនាក់ មកពីក្រុមហ៊ុនអូឡាំពិក អុិចប្រេស ដែលកំពុងធ្វើដំណើរពីសៀមរាបឆ្ពោះមករាជធានីភ្នំពេញ បានកៀបជាប់ក្នុងកាប៊ីនរហូតដល់ស្លាប់នៅក្នុងហេតុការណ៍បុកគ្នានោះ រីឯអ្នកបើកបរជនជាតិខ្មែរម្នាក់ទៀត អ្នកបកប្រែម្នាក់ និងភ្ញៀវទេសចរតៃវ៉ាន់ពីរនាក់បានរងរបួស។
លោក យ៉ុង សោម បានមានប្រសាសន៍អំពីគ្រោះថ្នាក់នេះថា គ្រោះថ្នាក់ចរាចរណ៍នេះបានកើតឡើងនៅម៉ោង២និង៣០នាទីរសៀល នៅពេលរថយន្តក្រុងបើកចូលទៅគន្លងផ្លូវរបស់រថយន្តហុងដាស៊ីអាវី (Honda CRV) របស់គ្រួសារជនជាតិកូរ៉េ ដែលកំពុងធ្វើដំណើរក្នុងទិសដៅបញ្ច្រាសគ្នាក្នុងឃុំចំណាក្រាម។
លោកបានមានប្រសាសន៍ទៀតថា ពេលនេះគេមិនទាន់ដឹងថា មូលហេតុអ្វីបានអ្នកបើកបររថយន្តក្រុងបើកចូលទៅគន្លងផ្លូវមកពីខាងមុខនោះទេ។ លោកបានមានប្រសាសន៍បន្ថែមទៀតថា “ ពួកគេ [អ្នករស់រាន] ស្រែកយំរៀបរាប់ជាភាសាបរទេសហើយយើងមិនយល់ថា ពួកគេនិយាយអ្វីខ្លះនោះទេ”។
អ្នកនៅរស់រានដែលរងរបួសទាំងប្រាំពីរនាក់ក្នុងហេតុការណ៍គ្រោះថ្នាក់ចរាចរណ៍នេះ ត្រូវបានបញ្ជូនទៅកាន់មន្ទីរពេទ្យបង្អែកស្រុក នេះបើតាមប្រសាសន៍របស់លោក ហ៊ុល ឈឿន ប្រធានមន្ទីរពេទ្យនេះ។
លោកវេជ្ជបណ្ឌិត ហ៊ុន ឈឿន បានមានប្រសាសន៍ថា “ ពេលនេះ យើងបានបញ្ជូនកុមារជនជាតិកូរ៉េខាងត្បូងទាំងពីរនាក់ទៅមន្ទីរពេទ្យគន្ធបុប្ផា ក្នុងខេត្តសៀមរាប សម្រាប់ការព្យាបាលសង្គ្រោះបន្ទាន់ ហើយយើងកំពុងបន្តព្យាបាលជនរងគ្រោះទាំងប្រាំនាក់ទៀតនៅឡើយ”។លោកមានប្រសាសន៍ទៀតថា អ្នករងរបួសបីនាក់ស្ថិតក្នងស្ថានភាពធ្ងន់ដោយប្រេះឆ្អឹង។ ចំណែកក្រុមហ៊ុនរថយន្តក្រុងអូឡាំពិកអិុចប្រេស វិញមិនអាចទាក់ទងសុំការបំភ្លឺបានទេ ទាក់ទងនឹងករណីនេះ៕
ប្រែសម្រួលដោយ តែម សុខុម