នគរបាលបានឲ្យដឹងកាលពីម្សិលមិញថា ឈើប្រណីតជាងពីរម៉ែត្រគូបត្រូវបានរឹបអូសកាលពីថ្ងៃសុក្រ ពីផ្ទះរបស់អធិការរងនគរបាលស្រុកអណ្ដូងមាស ក្នុងខេត្តរតនគិរី។
លោក ឡាក់ វណ្ណរិទ្ធ បានគេចខ្លួនពីផ្ទះរបស់លោក អំឡុងពេលនគរបាលធ្វើប្រតិបត្តិការ ហើយគេមិនទាន់ដឹងកន្លែងលាក់ខ្លួនរបស់លោកនៅឡើយទេ។
លោក នៅ ដារ៉ា ប្រធាននគរបាលសេដ្ឋកិច្ចខេត្ត បានមានប្រសាសន៍ថា “យើងរឹបអូសបានឈើប្រណីតបីប្រភេទខុសគ្នាចំនួន៥៤ដុំពីផ្ទះរបស់អធិការរងស្រុករូបនេះ ដែលមានចំនួនសរុបត្រឹមជាងពីរម៉ែត្រគូប។ យើងជឿថា គាត់មានគម្រោងរត់ពន្ធឈើទាំងនេះទៅប្រទេសវៀតណាម”។
ឈើដែលត្រូវបានរឹបអូសទាំងនេះរួមមានឈើគ្រញូង និងឈើបេងត្រូវបានប្រគល់ទៅឲ្យរដ្ឋបាលព្រៃឈើ។
លោក ម៉ម វ៉ាន់ដា ព្រះរាជអាជ្ញារងអមសាលាដំបូងខេត្ត បានមានប្រសាសន៍ថា “តាមច្បាប់ព្រៃឈើលោក ឡាក់ វណ្ណរិទ្ធ ប្រឈមនឹងការពិន័យជាប្រាក់។ ទោះជាយ៉ាងណា ប្រសិនបើគាត់មិនអាចបង់ប្រាក់ពិន័យ គាត់នឹងប្រឈមការចោទប្រកាន់បទព្រហ្មទណ្ឌ”។
លោក ឆាយ ធី ជាមន្ត្រីឃ្លាំមើលរបស់អង្គការអាដហុកប្រចាំខេត្តនេះ បានមានប្រសាសន៍ថា លោកជឿថា របាយការណ៍ផ្លូវការរបស់នគរបាល បានរាយការណ៍តិចជាងចំនួនឈើដែលរឹបអូសបានជាងពាក់កណ្ដាល។ លោក ឆាយ ធី បានមានប្រសាសន៍ថា
“យើងកំពុងតាមដានករណីនេះយ៉ាងយកចិត្តទុកដាក់ ពីព្រោះវាពាក់ព័ន្ធនឹងមន្ត្រីអនុវត្តច្បាប់”៕
ប្រែសម្រួលដោយ អ៊ូច សូនី