កាលពីម្សិលមិញ សាលាឧទ្ធរណ៍បានបើកសវនាការជំនុំជម្រះរឿងក្តីរបស់បុរសម្នាក់ដែលត្រូវបានផ្តន្ទាទោស ឲ្យជាប់ពន្ធនាគាររយៈពេលបួនឆ្នាំ ពីបទប៉ុនប៉ងគំរាមទាររបស់របរពីកូនស្រី របស់ឧត្តមសេនីយ៍នគរបាលជាតិម្នាក់។
កាលពីក្នុងខែមិថុនា សាលាដំបូងរាជធានីភ្នំពេញបានរកឃើញថា បុរសឈ្មោះ លឹមវិសាល អាយុ២៣ឆ្នាំ មានពិរុទ្ធភាព ដោយសារតែបុរសឈ្មោះនេះ បានបញ្ជូនសារជាអក្សរ ទៅឲ្យឈ្មោះ គឿន កន្និថា ជាអតីតមិត្តស្រីរបស់ខ្លួន ដោយទាមទារឲ្យនាងផ្តល់ម៉ូតូមួយគ្រឿង កុំព្យូទ័រយួរដៃមួយគ្រឿង និងទូរស័ព្ទស្មាតហ្វូនមួយគ្រឿង ដល់ខ្លួន បើទោះជាសារនោះមិនត្រូវបានបញ្ជាក់នូវអ្វីដែលឈ្មោះ វីសាល បានគំរាមបង្ខូចកេរ្តិ៍ឈ្មោះនាងក៏ដោយ។
កាលពីម្សិលមិញ ឈ្មោះ វិសាល បានបដិសេធម្តងហើយម្តងទៀតថា ខ្លួនមិនបានប៉ុនប៉ងគំរាមយករបស់របរពីនាង កន្និថា ទេ។ បុរសរូបនេះបាននិយាយថា “ ខ្ញុំមិនបានប្រព្រឹត្តបទល្មើស ដូចដែលពួកគេចោទប្រកាន់នោះទេ។ ខ្ញុំមិនបានគំរាមទារម៉ូតូ កុំព្យូទ័រ Laptop និងទូរស័ព្ទ iPhone ពីនាងទេ ពីព្រោះខ្ញុំមានរបស់ទាំងនោះហើយ”។
លោក ស យសថាវរៈ ព្រះរាជអាជ្ញាអមសាលាដំបូង បានមានប្រសាសន៍ថា សារដែលត្រូវបាន ឈ្មោះ វិសាល បញ្ជូនចេញនោះ បានបញ្ជាក់យ៉ាងច្បាស់។ លោកមានប្រសាសន៍ថា “ យើងមានភស្តុតាងគ្រប់គ្រាន់”។ លោក គិន វិបុល មេធាវីរបស់ ឈ្មោះ វិសាល បានលើកឡើងថា សារនោះមិនមានការគំរាមកំហែងទេ។ លោកមានប្រសាសន៍ថា “ សូមលោកចៅក្រមពិចារណា[រឿងក្តីនេះ] ដោយយោងតាមច្បាប់”។ លោកបានបន្ថែមថា ឪពុករបស់នាង កន្និថា គឺលោកឧត្តមសេនីយ៍ផ្កាយបួន ឌុល គឿន តាមពិត បានគំរាម វិសាល ដោយយកកាំភ្លើងភ្ជង់ក្បាលរបស់បុរសនេះ និងបានបញ្ជាឲ្យបុរសរូបនេះឈប់ទាក់ទង ជាមួយកូនស្រីរបស់ខ្លួន។ សាលដីកានឹងត្រូវបានប្រកាសនៅថ្ងៃទី ១១ ខែតុលា៕
ប្រែសម្រួលដោយ ចេវ ប៊ុននី