លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) បានឲ្យដឹងកាលពីម្សិលមិញថា គណៈកម្មាធិការជាតិរៀបចំការបោះឆ្នោត នឹងបន្ថែមពេលវេលា រយៈពេលបីថ្ងៃទៀតសម្រាបើការចុះឈ្មោះអ្នកបោះឆ្នោត នៅ២០០ឃុំ នៅក្នុងខេត្តចំនួន១០ ដែលរងផលប៉ះពាល់ដោយសារទឹកជំនន់។
សកម្មភាពចុះឈ្មោះបោះឆ្នោតប្រចាំឆ្នាំ បានចាប់ផ្តើមកាលពីថ្ងៃទី១ ខែតុលា និងគ្រោងនឹងបញ្ចប់នៅថ្ងៃទី២០ខែតុលា ប៉ុន្តែលោក ទេព នីថា បានឲ្យដឹងថា ទឹកជំនន់បានបង្កការលំបាក សម្រាប់ប្រជាជនទៅកាន់ទីស្នាក់ការគណះកម្មាធិការរៀបចំការបោះឆ្នោតខេត្ត។
លោកបានមានប្រសាសន៍ថា “គេប្រាប់យើងថា ២០០ឃុំនៅក្នុង១០ខេត្ត រងប៉ះពាល់ដោយសារទឹកជំនន់។ យើងសូមបន្ថែមបីថ្ងៃសម្រាប់ ការចុះឈ្មោះបោះឆ្នោត។ លោកបានឲ្យដឹងបន្ថែមទៀតថាមកទល់ពេលនេះ អ្នកបោះឆ្នោតថ្មីជាង៦៨.០០០នាក់បានមកចុះឈ្មោះបោះឆ្នោត បើតចាប់តាំងពីថ្ងៃទី១១ ខែតុលា ក៏ប៉ុន្តែ គ.ជ.ប. រំពឹងថា មានអ្នកបោះឆ្នោតជាង៣៣៧.០០០នាក់នឹងចុះឈ្មោះ ក្នុងរយៈពេលចុះឈ្មោះនេះ។ការបោះឆ្នោតបន្ទាប់មិនទាន់កំណត់ពេលទេ រហូតដល់ឆ្នាំ២០១៨។
លោក ហ៊ី គឹមសេង ប្រធានគណៈកម្មការរៀបចំការបោះឆ្នោត ខេត្តបន្ទាយមានជ័យ បានឲ្យដឹងថា ចំនួនប្រជាជនដែលចុះឈ្មោះនៅក្នុងខេត្តរបស់លោក រងប៉ះពាល់ខ្លាំងដោយសារទឹកជំនន់ ហើយជាង៥០ឃុំត្រូវទឹកជន់លិច ដោយសារតែភ្លៀងធ្លាក់ខ្លាំង។ លោកបន្តថា “ប្រជាជនតែ២.០០០នាក់ប៉ុណ្ណោះបានមកចុះឈ្មោះនៅក្នុងខេត្តខ្ញុំ។ [គណៈកម្មាធិការរៀបចំការបោះឆ្នោតខេត្ត] កំពុងពិនិត្យ និងតាមដានសភាពការណ៍នេះនៅឡើយ។ យើងបានបន្ថែមរយៈពេលចុះឈ្មោះបោះឆ្នោត សម្រាប់ឃុំដែលរងប៉ះពាល់ដោយសារទឹកជំនន់ ពីព្រោះប្រជាជនត្រូវបានជម្លៀស ទៅទីទួលមានសុវត្ថិភាព”៕
ប្រែសម្រួលដោយ ចេវ ប៊ុននី