មន្ត្រីធនាគារបានឲ្យដឹង កាលពីម្សិលមិញថា ក្រុមហ៊ុន អូរិក (Orix) ដែលជាក្រុមហ៊ុនពហុជំនួញជប៉ុនផ្នែកហិរញ្ញវត្ថុ នឹងទិញភាគហ៊ុន ក្នុងតម្លៃប្រហែល១១លានដុល្លារ នៅក្នុងធនាគារអេស៊ីលីដា ភីអិលស៊ី ដែលជាធនាគារធំបំផុតមួយក្នុងប្រទេសកម្ពុជា ហើយផែនការទិញភាគហ៊ុននេះនឹងត្រូវបានអនុវត្តនៅដំណាច់ឆ្នាំនេះ ក៏ប៉ុន្តែ ប្រធាននាយកប្រតិបត្តិនៅក្នុងវិស័យនេះបានលើកឡើងថា គម្រោងនេះហាក់ដូចជាគ្រាន់តែមានគោលបំណងសិក្សា ពីស្ថានភាពទីផ្សារប៉ុណ្ណោះ និងមិនទំនងជាគម្រោងវាយលុកទីផ្សារធនាគារខ្លាំងទេ។
ក្រុមហ៊ុន អូរិក បានឲ្យដឹងកាលពីម្សិលមិញនៅក្នុងសេចក្តីប្រកាសខ្លីមួយលើគេហ ទំព័ររបស់ខ្លួនថា “ក្រុមហ៊ុន អូរិក គ្រោងនឹងទិញភាគហ៊ុនចំនួន៦ភាគរយនៅក្នុងធនាគារអេស៊ីលីដា មុនដំណាច់ឆ្នាំនេះ បន្ទាប់ពីទទួលបានសេចក្តីអនុញ្ញាតឲ្យទិញភាគហ៊ុននេះ ពីធនាគារកណ្តាលកម្ពុជា”។
លោក អ៊ិន ចាននី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានឲ្យដឹងថា ក្រុមហ៊ុន អូរិក បានទៅដល់ការិយាធនាគាររបស់លោក ដើម្បីពិភាក្សាអំពីគម្រោងវិនិយោគនេះ ហើយថា ធនាគារអេស៊ីលីដា មិនបានខិតខំរកវិយោគិនទេ។ លោកបានមានប្រសាសន៍ថា “យើងជាធនាគារដ៏រឹងមាំមួយ ហើយយើងមិនដែលចាប់អារម្មណ៍វិនិយោគិនទេ ក៏ប៉ុន្តែ បើសិនជាពួកគេមករកឃើញ យើងនឹងពិភាក្សាជាមួយពួកគេ”។
ក៏ប៉ុន្តែ លោក អ៊ិន ចាន់នី បានបដិសេធមិនប្រាប់តម្លៃទីផ្សារក្នុងកិច្ចព្រមព្រៀងនេះ ក៏ប៉ុន្តែ តម្លៃនេះត្រូវបានគេរាយការណ៍ថា ស្ថិតក្នុងចន្លោះពី៥១លានដុល្លារទៅ៦១ដុល្លារ។ លោកបានមានប្រសាសន៍ថា “ខ្ញុំទុកឲ្យខាងអូរិកជាអ្នកប្រាប់អ្នកវិញ”។ ទោះបីជាយ៉ាងណា លោក អ៊ិន ចាន់នី បានឲ្យដឹងថា ភាគហ៊ុន៦ភាគរយរបស់ក្រុមហ៊ុន អូរិក នៅក្នុងធនាគារនេះ មិនស្ថិតក្នុងដើមទុន៥១ភាគរយនៅក្នុងធនាគារអេស៊ីលីដា ដែលត្រូវបានគ្រប់គ្រងដោយវិនិយោគិនក្នុងស្រុកទេ។ លោកបានមានប្រសាសន៍ថា “ ពួកគេកំពុងតែចូលខ្លួនក្នុងការគ្រប់គ្រងភាគហ៊ុនរបស់វិនិយោគិនប្រទេសបន្តិចម្តងៗ”។
លោក ហ្គ្រេន ណាក់ឃី (Grant Knuckey) ប្រធាននាយកប្រតិបត្តិធនាគារ អេអិនហ្សិត រ៉ូយ៉ាល់ បានមានប្រសាសន៍ថា “ពួកគេជាវិនិយោគិនដ៏គួរឲ្យចាប់អារម្មណ៍ និងមានយុទ្ធសាស្ត្រ សម្រាប់ធនាគារអេស៊ីលីដា ហើយខ្ញុំគិតថា ទំនាក់ទំនងនេះគឺជាដំណឹងល្អសម្រាប់ពួកគេ…។ ក៏ប៉ុន្តែ វាមិនមែនជាទំនាក់ទំនងធំ សម្រាប់វិស័យនេះទេ។ គម្រោងវិនិយោគក្នុងរូបភាពជាភាគរយនៃភាគហ៊ុន ជាទូទៅគឺជាគម្រោងវិនិយោគបែបសិក្សាទីផ្សារ ហើយអនុញ្ញាតឲ្យវិនិយោគិននេះសិក្សាអំពីទីផ្សារនេះ។ថា តើនេះគឺជាគម្រោងដែលមានគម្រោង ផ្សេងៗទៀតដើរតាមពីក្រោយ ឬក៏ធនាគារជប៉ុនផ្សេងៗដែលផ្តូរទម្រង់ទៅជាសាខា ឬយ៉ាងណានោះ យើងមិនអាចទាញសេចក្តីសន្និដ្ឋានបានទេនាពេលនេះ”។
ក្នុងរយៈពេលប្រាំឆ្នាំចុងក្រោយនេះវិនិយោទុនជប៉ុននៅក្នុងប្រទេសកម្ពុជា កំពុងតែកើនឡើងយ៉ាងខ្លាំង ដោយមានកំណើនទ្វេដងជារៀងរាល់ឆ្នាំ បើគិតរយៈពេលពីឆ្នាំ២០០៩ ដល់ឆ្នាំ២០១១ នេះបើយោងតាមតួលេខថ្មីបំផុត របស់ស្ថានទូតជប៉ុន។ ធនាគារធំៗទាំងបីមកពីប្រទេសជប៉ុន បានបើកការិយាល័យនៅកម្ពុជា ហើយកាលពីពេលថ្មីៗបំផុតកន្លងមកនេះ ធនាគារ មីហ្សូ៊ហូ (Mizuho Bank) បានបើកដំណើរការកាលពីខែកក្កដា។
មានមូលដ្ឋាននៅទីក្រុង តូក្យូ ក្រុមហ៊ុន អូរិក មានវិសាលភាពឆ្លងកាត់២៧ប្រទេស ដោយមានទ្រព្យសម្បត្តិជាង៦៩ពាន់លានដុល្លារ។ សេវាកម្មរបស់ក្រុមហ៊ុនរួមមាន សេវាកម្មធនាគារ ហិរញ្ញប្បទានក្រុមហ៊ុន ធានារ៉ាប់រងអាយុជីវិត និងអចលនទ្រព្យ៕ សុធា