ជើងហោះហើរផ្ទាល់លើកដំបូងរបស់ក្រុមហ៊ុនអាកាសចរណ៍អ៊ែរឆាយណា (Air China) ពីទីក្រុងប៉េកាំងមកកាន់ក្រុងសៀមរាប បានហោះហើរមកដល់មជ្ឈមណ្ឌលទេសចរណ៍នេះកាលពីថ្ងៃអាទិត្យ ខណៈពេលដែលក្រសួងទេសចរណ៍កំពុងតែបន្តជំរុញបង្កើនវិស័យទេសចរណ៍ពីប្រទេសចិន។
លោក គង់ សុភារក្ស ប្រធាននាយកដ្ឋានស្ថិតិនៃក្រសួងទេសចរណ៍បានមានប្រសាសន៍ថា “កាលពីសប្ដាហ៍មុន យើងបានបញ្ជូនមន្ត្រីចំនួន២០រូបមកពីក្រសួងទេសចរណ៍ ដើម្បីសិក្សាពី [ទីផ្សារទេសចរណ៍] និងវប្បធម៌របស់ចិន ហើយយើងកំពុងតែផលិតភាពយន្តឯកសារទេសចរណ៍សម្រាប់ការផ្សព្វផ្សាយជាភាសាចិន” ដែលនឹងត្រូវផ្សាយតាមស្ថានីយទូរទស្សន៍ខ្សែកាបស៊ីស៊ីធីវី ដែលគ្រប់គ្រងដោយរដ្ឋ។
ក្រសួងទេសចរណ៍មានបំណងបង្កើនវត្តមានរបស់កម្ពុជានៅឯពិព័រណ៍ទេសចរណ៍ជាបន្តបន្ទាប់ក្នុងពេលខាងមុខនៅក្នុងប្រទេសចិន ដោយរួមទាំងពិព័រណ៍ទេសចរណ៍ពិភពលោកក្នុងទីក្រុងសៀងហៃនៅខែឧសភា និងពិព័រណ៍ទេសចរណ៍អន្តរជាតិក្រុងប៉េកាំងនៅខែមិថុនា ផងដែរ។
លោក សូ វិសុទ្ធី ប្រធាននាយកដ្ឋានផ្សព្វ្ផ្សាយនិងទីផ្សារនៃក្រសួងទេសចរណ៍បានមានប្រសាសន៍ថា “នៅពេលយើង [មន្ត្រីក្រសួងទេសចរណ៍] ធ្វើដំណើរទៅកាន់ប្រទេសចិន យើងនឹងផ្សព្វផ្សាយវប្បធម៌របស់យើងតាមរយៈការសម្ដែងបែបប្រពៃណីអំឡុងពិធីនានានិងពិពណ៌ទេសចរណ៍”។ កាលពីខែមិថុនា ក្រសួងទេសចរណ៍នៃព្រះរាជាណាចក្រកម្ពុជា បានប្រកាសផែនការរយៈពេលប្រាំឆ្នាំថា នឹងនាំភ្ញៀវទេសចរចេញឲ្យបានចំនួន១,៣លាននាក់នៅក្នុងឆ្នាំ២០១៨ ជាហេតុនាំឲ្យមានការអំពាវនាវបង្កើតឆាយណាថោនក្នុងរាជធានីភ្នំពេញ ខេត្តសៀមរាប និងខេត្តព្រះសីហនុ ព្រមទាំងជើងហោះហើរផ្ទាល់បន្ថែមរវាងប្រទេសទាំងពីរផងដែរ៕ សុខុម