អ្នកនាំពាក្យគណបក្សប្រឆាំងបាននិយាយកាលពីម្សិលមិញថា លោក កឹម សុខា អនុប្រធាន គណបក្សសង្គ្រោះជាតិកំពុងពិចារណាស្នើឲ្យអាជ្ញាធរស៊ើបអង្កេតស្វែងរកការពិតពីការគំរាមសម្លាប់ដែលគេបានបង្ហោះតាមសង្គមហ្វេសប៊ុក។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានមានប្រសាសន៍ថា អ្នកប្រើប្រាស់សង្គមហ្វេសប៊ុក ដែលបានប្រើឈ្មោះ ផេង វណ្ណៈ កាលពីថ្ងៃពុធបានបង្ហោះរូបថតកាំភ្លើងខ្លីមួយដើម និងគ្រាប់ចំនួនប្រាំពីរគ្រាប់នៅក្នុងបណ្ដាញទំនាក់ទំនងសង្គមនេះ ដោយនិយាយថា គ្រាប់កាំភ្លើងទាំងនេះគឺសម្រាប់លោក កឹម សុខា។
រូបថតដែលគេបង្ហោះនោះត្រូវបានផ្សព្វផ្សាយបន្តគ្នាជាច្រើន ហើយលោក ផេង វណ្ណៈ បានបដិ សេធថា លោកមិនបានបង្កើតរូបថតនេះទេ។ ដោយយកចំណុចសំខាន់នៃដងខ្លួនរបស់មេដឹកនាំគណបក្សប្រឆាំងរូបនេះធ្វើជាគោលដៅនោះ លោក វណ្ណៈ បានសរសេរនៅលើរូបថតដែលគេបានបញ្ជូនតៗគ្នានេះ ចាប់ផ្តើមពីដៃឆ្វេងរបស់លោក កឹម សុខា ហើយបញ្ចប់ដោយគ្រាប់កាំភ្លើងនៅត្រង់បេះដូង និងក្បាលរបស់លោក។
ក្រោយមក លោក វណ្ណៈ បានសរសេរអំពីរូបថតនេះថា “ខ្ញុំមិនដឹងអំពីបញ្ហានេះទេ”។ លោកបានសរសេរថា “បើទោះខ្ញុំមិនពេញចិត្តលោក កឹម សុខា ក៏ដោយ ក៏ខ្ញុំមិនបំភិតបំភ័យលោក កឹម សុខា ដែរ។ ខ្ញុំនឹងដាក់ពាក្យបណ្ដឹងទៅនគរបាលឲ្យស៊ើបអង្កេត រកអ្នកដែលបានកាត់ត និងកែរូបថតនោះហើយបន្លំដាក់ឈ្មោះរបស់ខ្ញុំដើម្បីបង្ខូចកេរ្តិ៍ឈ្មោះរបស់ខ្ញុំតាមហ្វេសប៊ុក”។
លោក បុញ្ញឫទ្ធិ បានមានប្រសាសន៍ថា គណបក្សសង្គ្រោះជាតិ នឹងធ្វើការស៊ើប អង្កេតផ្ទៃក្នុងអំពីបញ្ហានេះ នៅពេលលោក កឹម សុខា ត្រឡប់មកពីសហរដ្ឋអាមេរិកវិញនៅថ្ងៃច័ន្ទ ដើម្បីទៅរៃអង្គាសមូលនិធិ។ លោកបានមានប្រសាសន៍ថា គណបក្សត្រូវសម្រេចចិត្តថា តើការគំរាមនេះពិតមែនឬមិនមែនដោយសារលោក វណ្ណៈ បានដករូបនេះចេញវិញហើយនោះ ប៉ុន្តែលោកបានបន្ថែមថា ទោះយ៉ាងណារូបថតនេះគឺមានបំណងបំភិតបំភ័យតែម្តង។
លោកបានមានប្រសាសន៍ថា “ខ្ញុំគិតថា វាជាការគំរាមកំហែងពាក់ព័ន្ធនយោបាយ ដែលពួកគេមិនចង់ឲ្យមានអ្នកដែលស្រឡាញ់ លទ្ធិប្រជាធិបតេយ្យមាននៅក្នុងប្រទេសកម្ពុជាឡើយ”។
លោក បុញ្ញឫទ្ធិ បានបន្ថែមថា លោកសង្ឃឹមថា អាជ្ញាធរនឹងចាត់វិធានការរឹតបន្តឹងសន្តិសុខបន្ថែមទៀតអំឡុងការដើរក្បួនរបស់គណបក្សសង្គ្រោះជាតិក្នុងខេត្តសៀមរាប និងក្នុងរាជធានីភ្នំពេញនៅថ្ងៃអង្គារ ដែល ដឹកនាំដោយលោក កឹម សុខា និងលោក សម រង្ស៊ី ប្រធានគណបក្សសង្គ្រោះជាតិ ។
លោក ម៉ក់ ជីតូ ប្រធាននាយកដ្ឋាននគរបាលកណ្ដាលសន្តិសុខក្រសួងមហាផ្ទៃបានមានប្រសាសន៍ថា ការបង្ហោះរូបថតបែបនេះក្នុងហ្វេសប៊ុកជារឿងទូទៅទៅហើយ ហើយវាមិនពាក់ព័ន្ធនឹងអាជ្ញាធរទេ។ លោកឧត្តមសេនីយ៍ឯក ម៉ក់ ជីតូ បានមានប្រសាសន៍ថា “វាជាបញ្ហាតូចតាច ពីព្រោះយើងមិនមានច្បាប់ទាក់ទងនឹងហ្វេសប៊ុកទេ”។ លោកបានបន្ថែមថា អាជ្ញាធរមិនធ្វើការស៊ើបអង្កេតបញ្ហានេះទេ បើទោះជាគណបក្សសង្គ្រោះជាតិបានបញ្ជូនបញ្ហានេះមកពួកគេក៏ដោយ៕សារុន