អ្នកគាំទ្រគណបក្សសង្គ្រោះជាតិជាង៥.០០០នាក់ បានហែក្បួនកាត់ទីក្រុងភ្នំពេញកាលពីម្សិលមិញ បន្ទាប់ពីលោក សម រង្ស៊ី និងលោក កឹម សុខា មេដឹកនាំគណបក្សប្រឆាំងបានប្រកាសពីការចាប់ផ្ដើមធ្វើមហាបាតុកម្មឥតឈប់ រហូតដល់រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ស្នើឲ្យមានការបោះឆ្នោតថ្មី។
មន្ត្រីនគរបាលចរាចរមួយក្រុមតូចបានដើរនៅចម្ងាយប្រមាណ១០០ម៉ែត្រពីមុខក្រុមអ្នកតវ៉ា អំឡុងពេលហែក្បួនរយៈពេល១ម៉ោងនេះ ដែលបានព្យាយាមជៀសវាងពីអគាររដ្ឋាភិបាលធំៗនៅពេលហែតាមមហាវិថីព្រះមុនីវង្ស មហាវិថីកម្ពុជាក្រោម មហាវិថីនេរុហ៍ និងមហាវិថីសាលដឺហ្គោល មុនពេលត្រឡប់ទៅទីលានប្រជាធិបតេយ្យវិញ។
នគរបាលហាក់ដូចជាបានដឹងអំពីផ្លូវនៃការហែក្បួន ដែលមិនបានគ្រោងទុកនេះច្រើនជាងអ្នកតវ៉ា ដែលបានស្រែកថា “ហ៊ុន សែន ចុះចេញទៅៗ”។ ថ្វីបើអ្នកគាំទ្រគណបក្សសង្គ្រោះជាតិដើរតាមផ្លូវអំពាវនាវឲ្យលោក ហ៊ុន សែន ចុះចេញពីតំណែងក៏ដោយ ក៏ទីក្រុងភ្នំពេញមិនមានវត្តមានកងរាជអាវុធហត្ថ និងនគរបាលប្រឆាំងកុបកម្ម ដែលធ្លាប់មានវត្តមានច្រើនពេលគណបក្សសង្គ្រោះជាតិជួបជុំគ្នាលើកមុនៗនោះដែរ។
កាលពីសប្ដាហ៍មុន អាជ្ញាធរក្រុងភ្នំពេញបាននិយាយថា ពួកគេបានច្រានចោលសំណើរបស់គណបក្សសង្គ្រោះជាតិសុំហែក្បួនកាលពីម្សិលមិញ។
លោកស្រី មូរ សុខហួរ ប្រធានកិច្ចការសាធារណៈរបស់គណបក្សសង្គ្រោះជាតិ ដែលបានដើរក្បួននៅចន្លោះពីនគរបាលចរាចរ និងមេដឹកនាំគណបក្សមួយក្រុមតូច រួមទាំងលោក សម រង្ស៊ី និងលោក កឹម សុខា ដែរនោះបានមានប្រសាសន៍ថា ការងារផ្សេងៗបានដំណើរការរលូន ដោយសារមានកិច្ចសហការជិតស្និទ្ធជាមួយអាជ្ញាធរ។
លោកស្រីបានមានប្រសាសន៍ថា “ពួកគេដឹងថា យើងនឹងជួបជុំគ្នា ដូច្នេះខ្ញុំសូមអរគុណនគរបាលចរាចរចំពោះការរៀបចំដើម្បីឲ្យការហែក្បួននេះដំណើរការល្អដោយគ្មានការកកស្ទះចរាចរណ៍”។ លោកស្រីបានប្រាប់ថា លោក ហូ រ វ៉ាន់ តំណាងរាស្ត្រគណបក្សសង្គ្រោះជាតិបានប្រាប់អាជ្ញាធរអំពីផ្លូវហែក្បួនជាមុន។
ការជួបជុំគ្នាកាលពីម្សិលមិញនេះបានចាប់ផ្ដើមនៅទីលានប្រជាធិបតេយ្យនៅពេលព្រឹក ដោយអ្នកតវ៉ាមានការស្រងាកចិត្តចំពោះព័ត៌មានដែលលោក ហូរ វ៉ាន់ បានប្រាប់ពួកគេថា ទោះបីជាលោក សម រង្ស៊ី និងលោក កឹម សុខា នឹងមកបង្ហាញខ្លួននៅលើវេទិកាក៏ដោយ ក៏គ្មានការហែក្បួននៅក្នុងទីក្រុងដែរ។ បន្ទាប់ពីមានភ្លៀងធ្លាក់បន្ដិចបន្តួច ដែលបានធ្វើឲ្យអ្នកតវ៉ាមួយចំនួនរត់រកកន្លែងជ្រកនោះ លោក សម រង្ស៊ី និងលោក កឹម សុខា បានមកដល់វេទិកាក្រោយម៉ោង៣បន្ដិច និងបានប្រកាសថា ការធ្វើមហាបាតុកម្មប្រឆាំងនឹងលទ្ធផលបោះឆ្នោតផ្លូវការកាលពីថ្ងៃទី២៨ ខែកក្កដា នេះ ពេលនេះកំពុងឈានចូលដំណាក់កាលទី២ហើយ។
លោក កឹម សុខា បានប្រាប់អ្នកចូលរួមថា “គណបក្សសង្គ្រោះជាតិទាមទារឲ្យមានការបោះឆ្នោតឡើងវិញ ហើយចាប់ពីពេលនេះតទៅបាតុកម្មនិងធ្វើជារៀងរាល់ថ្ងៃ ហើយបន្តធ្វើធំទៅៗ”។ លោកបានបន្ថែមថា បាតុកម្មនឹងឈានទៅដល់ខេត្ត ហើយធ្វើដោយឥតឈប់រហូតដល់មានការបោះឆ្នោតសារជាថ្មី។
លោកបានមានប្រសាសន៍ថា យើងនឹងធ្វើយុទ្ធនាការទាមទាររយៈពេលបីខែឲ្យមានការបោះឆ្នោតថ្មី ហើយប្រសិនបើនៅតែមិនមានការឆ្លើយតបទេ យើងនឹងធ្វើបាតុកម្មដំណាក់កាលទី៣”។ ប៉ុន្តែលោកមិនបានប្រាប់លម្អិតថា ដំណាក់កាលចុងក្រោយនឹងអ្វីដូចម្តេចទេ។
លោក សម រង្ស៊ី បានប្រកាសពី ផែនការរបស់គណបក្សសង្គ្រោះជាតិសម្រាប់ការតវ៉ាឥតឈប់ឈរតាមរយៈទំព័រហ្វេសប៊ុករបស់លោក កាលពីយប់ថ្ងៃសុក្រ។ លោក សម រង្ស៊ី បានអំពាវនាវជាថ្មីកាលពីថ្ងៃអង្គារនៅសៀមរាប ឲ្យលោក ហ៊ុន សែនយកនាយករដ្ឋមន្ត្រីថៃលោកស្រី យីង ឡាក់ ស៊ីណាវ៉ាត្រា ធ្វើជាគំរូ ដែលនៅពេលថ្មីៗនេះបានស្នើឲ្យមានការបោះឆ្នោតថ្មីពេលមានមហាបាតុកម្ម។
លោក សម រង្ស៊ី ដែលបានរងការរិះគន់បន្ទាប់ពីលោបានហៅលោក ហ៊ុន សែន ថា “កុំឲ្យអន់ជាងស្ត្រី”នោះឲ្យ មានការប្រុងប្រយ័ត្នក្នុងការប្រើពាក្យសម្ដីកាលពីម្សិលមិញ។ មុនពេលធ្វើឲ្យអ្នកចូលរួមភ្ញាក់ផ្អើល ដោយការសួរពួកគេថា តើពួកគេចង់ហែក្បួនឬអត់នោះ លោកបានមានប្រសាសន៍ថា “កុំចាញ់ស្ត្រី [នាយករដ្ឋមន្ត្រី យីង ឡាក់] ដែលជាគំរូល្អគួរឲ្យគោរព”។ “យើងនឹងដើរស្រែកគ្រប់ផ្លូវថា “ហ៊ុន សែន ចុះចេញទៅ!”។
បន្ទាប់ ពីការហែក្បួននេះលោក កឹម សុខា និងលោក សម រង្ស៊ី បានបញ្ជាក់ឡើងវិញប្រាប់អ្នកគាំទ្រនៅទីលានប្រជាធិបតេយ្យថា ថ្នាក់ដឹកនាំគណបក្សនឹងមិនធ្វើការជាមួយគណបក្សប្រជាជនកម្ពុជាទេ ហើយនឹងទទួលយកតែការបោះឆ្នោតថ្មីៗប៉ុណ្ណោះ។
លោក កឹម សុខា បានមានប្រសាសន៍មុនពេលហុចក្បាលមីក្រូឲ្យលោក សម រង្ស៊ី បញ្ចប់ថា “ប្រសិនបើយើងទៅចរចាជាមួយគណបក្សប្រជាជនកម្ពុជា ហាក់ដូចជាយើងសម្លាប់ជាតិយើងអ៊ីចឹង។ លោក សម រង្ស៊ី បានសួរអ្នកគាំត្រថា “តើបងប្អូនអស់កម្លាំងទេ?”។
អ្នកគាំទ្របានស្រែកឆ្លើយតបវិញថា “អត់ទេ”។ លោកបានមានប្រសាសន៍ថា “ដូច្នេះយើងនឹងជួបជុំគ្នាជារៀងរាល់ថ្ងៃ បន្ទាប់ពីបងប្អូនចេញពីធ្វើការ និងបន្ទាប់ពីបងប្អូនចេញពីរៀន។ យើងនឹងជួបគ្នានៅទីលានប្រជាធិបតេយ្យជារៀងរាល់ថ្ងៃនៅម៉ោង៤ល្ងាច”៕ គឹមហឿន