30 C
Phnom Penh

ការ​ធ្វើ​បាតុកម្ម​របស់​គណបក្ស​សង្គ្រោះ​ជាតិ​​ចូល​ដល់​​ថ្ងៃ​ទី​៣ហើយ​

ដោយ ឌឹ ខេមបូឌា ដេលី

បទវិភាគ

ការ​ធ្វើ​បាតុកម្ម​របស់​គណបក្ស​សង្គ្រោះ​ជាតិ ដើម្បីទាម​ទារ​ឲ្យ​លោក​នាយក​រដ្ឋមន្ត្រី ហ៊ុន សែន ចុះ​ចេញពីតំណែង ឬ​​រៀប​ចំការ​បោះឆ្នោ​ត​ថ្មី​​នោះ បាន​បន្ត​ដល់​ថ្ងៃ​ទី៣ហើយ​កាល​ពីម្សិលមិញ ដោយ​មាន​ពិធី​សូត្រធម៌​នៅ​ទីលាន​ប្រជា​ធិបតេយ្យ​ និង​ការហែ​ក្បួន​​ដោយ​ការ​ជិះ​យាន​យន្ត​រយៈពេល​ខ្លី​​នៅ​ក្នុង​ខណ្ឌ​ដូន​ពេញ​។

ក្រុម​បាតុ​ករ​ធ្វើកា​ដង្ហែ​ក្បួន​​​តាម​ដង​វិថីនា​នា​ក្នុង​រាជធា​នី​ភ្នំ​ពេញ កាល​ពី​ម្សិល​មិញ​។​ ស៊ីវ​ ចាន់ណា​​​
ក្រុម​បាតុ​ករ​ធ្វើកា​ដង្ហែ​ក្បួន​​​តាម​ដង​វិថីនា​នា​ក្នុង​រាជធា​នី​ភ្នំ​ពេញ កាល​ពី​ម្សិល​មិញ​។​ ស៊ីវ​ ចាន់ណា​​​

បន្ទាប់ពី​មាន​ភ្លៀ​ង​នៅ​ពេល​​ព្រឹក​ និង​​ភ្លៀង​​​​មួយ​ប្រាវនៅ​​​​ពេល​រសៀល​  លោក សម រង្ស៊ី ប្រធាន​គណបក្ស​សង្គ្រោះជាតិ និង​លោក កឹម សុខា អនុប្រធាន​គណបក្ស​​បាន​មក​ដល់​ទីលាន​ប្រជា​​​ធិបតេយ្យ​នៅ​ម៉ោង​៤និង​៣០​នាទី​ល្ងាច​ ហើយ​បាន​​ឡើង​ទៅលើ​វេទិកា​តូច​មួយ​នៅ​​ចំ​កណ្ដាល​ក្រុម​អ្នក​តវ៉ា​។

នៅ​កណ្តាល​​អ្នក​ចូល​រួម​ប្រហែល​ពីរ​បី​ពាន់​នាក់​ និង​​មាន​ការ​ចូល​រួមពី​សមាជិក​សភា​ជាប់​ឆ្នោត​របស់​គណបក្ស​សង្គ្រោះជាតិ គឺ​លោក គួយ ប៊ុនរឿន និង​លោកស្រី មូរ សុខហួរ​​ នោះ លោក សម រង្ស៊ី ​និង​លោក កឹម សុខា បាន​លុ​ត​ជង្គង់​ ពេល​មាន​ការ​សូត្រធម៌​មុន​ពេល​​ងាក​​មុខ​ទៅ​រក​ព្រះ​សង្ឃ​មួយ​ក្រុម​ដែលបាន​សូត្រ​ធម៌​តាម​មីក្រូហ្វូន​។ បន្ទាប់ពីការ​សូត្រ​ធម៌នោះ លោក កឹម សុខា ​​បាន​ចាប់​ផ្ដើម​និយាយ​ទៅកាន់​ក្រុម​អ្នក​តវ៉ា​។

លោក​ កឹម សុខា បាន​មាន​ប្រសាសន៍​អំពី​លោក ហ៊ុន សែន ថា “ប្រសិន​បើ​លោក​ឯង​មិន​ចង់​ឲ្យ​ប្រជា​ជន​ប្រើ​​កម្លាំង​បែប​នេះ​ដើម្បី​​ទាម​ទារ​យុត្តិធម៌ទេ ត្រូវ​រៀ​ប​ចំ​បោះ​ឆ្នោត​​ឡើង​វិញ”។ បន្ទាប់​មកលោក សម រង្ស៊ី បាន​ថ្លែង​សុន្ទរ​កថាខ្លី​មុនពេល​ប្រកាស​ពីការ​ចាប់​ផ្ដើម​​ការ​ហែក្បួន​លើកទី៣​របស់​គណបក្ស​សង្គ្រោះ​ជាតិ​​ក្នុង​រយៈពេល​បីថ្ងៃ​។

ឈរ​នៅ​លើ​រថយន្ត​តូ​ចមួយ​ និង​គ្រវី​ទង់​ជាតិ​កម្ពុជា​ មេដឹកនាំ​គណបក្ស​ប្រឆាំង​បាន​ដឹកនាំ​ការ​ហែក្បួន​ចេញពី​ទីលាន​ប្រជា​ធិប​តេយ្យ​ ហើយ​បន្ទាប់មក​បាន​បត់​ស្ដាំ​តាម​តីរ​វិថី​ព្រះ​ស៊ីសុវត្ថិ។ អ្នក​គាំទ្រ​ដែលហែក្បួន​​ដោយ​ថ្មើ​រជើង​ និងតាម​ម៉ូតូ​បាន​ស្រែក​ម្ដង​ទៀត​ថា “ហ៊ុន សែន ចុះចេញទៅ​” នៅ​ពេ​ល​ពួកគេ​ដង្ហែ​ក្បួន​​​ទៅដល់​ស្ពាន​ជ្រោយ​ចង្វា​ ហើយ​បន្ទាប​់​មក​បាន​បត់​ឆ្វេង​​តាម​រង្វង់​មូល​ស្តាត​ចាស់​ ហើយ​ត្រឡប់​មក​តាម​មហាវិថីព្រះមុនីវង្ស​មុន​ពេល​បត់​ចូល​​ទីលាន​ប្រជា​ធិបតេយ្យ​វិញ​។

នគរ​បាល​ប្រឆាំង​កុបកម្ម​ និង​កង​រាជ​អាវុធ​​​ហត្ថ​​ជា​ថ្មី​ម្ដង​ទៀត​មិន​មាន​វត្ត​មាន​​នៅ​តាម​ផ្លូវ​ក្នុង​ទីក្រុង​ទេ ប៉ុន្តែ​ក្រោយ​មក​គេឃើញ​មាន​ច្រើន​នៅ​​ខាង​ក្នុង​បរិវេណ​​សាលា​រាជ​ធានី​ ពេល​ដែល​គណបក្ស​ប្រឆាំង​ហែក្បួ​ន​កាត់​​តាម​នោះ​។ ពេល​ត្រឡប់​មកដល់ទីលាន​ប្រជា​ធិប​តេយ្យ​នៅ​ម៉ោង​ប្រហែល​៦​ល្ងាច​ លោក សម ​រង្ស៊ី និង​លោក កឹម សុខា បាន​អង្គុយ​ចុះ​​នៅ​ពេល​ដែល​អ្នក​គាំទ្រ​វ័យ​ក្មេង​ពីរ​នាក់​បាន​ច្រៀង​ចម្រៀង​ហ៊ី​ប​ហបពីរ​បទ​ ដែល​បន្ទរ​​ទៅ​តាម​សម្រែក​​ពីក្រុមអ្ន​ក​តវ៉ា​ថា “ហ៊ុន សែន ចុះចេញទៅ​”។

នៅពេល​លោក សម រង្ស៊ី បញ្ចប់​សុន្ទរ​កថា​​​នៅយប់​នោះ​ ដែល​មាន​​និយាយ​អំពីការ​រស់​នៅ​បែ​ប​និរទេស​ខ្លួន​នៅ​ក្នុង​ប្រទេស​បារាំង​នោះ លោក កឹម សុខា ​បាន​ព្រមាន​លោក ហ៊ុន សែន និង​គណបក្ស​ប្រជា​ជន​កម្ពុជា​​។ លោក កឹម សុខា ​បាន​មាន​ប្រសាសន៍​ថា “ថ្ងៃ​ណា​មួយ​នឹង​មាន​មនុស្សច្រើន​មក​ចូល​រួម​ ហើយ​យើង​នឹង​​អង្គុយ​បិទ​ផ្លូវ​  ប៉ុន្តែ​យើង​មិន​ដឹង​ថា នឹង​បិទ​ផ្លូវ​​​ណាមួយ​ទេ ប្រសិន​បើ​​គេ​មិន​ព្រម​​រៀប​​ចំបោះឆ្នោត​ថ្មី​ដើម្បី​រក​យុត្តិ​ធម៌​ទេនោះ​។ ​យើង​​សូម​​ប្រាប់​​​​ថា ​នៅ​ពេល​នេះ មាន​តែ​ផ្លូវពីរ​ប៉ុណ្ណោះ​​ គឺ​បោះ​ឆ្នោត​​​សា​ជា​ថ្មី​ ឬចុះ​ចេញ​។ តើ​ជ្រើស​រើស​យក​មួយ​ណា​?” ៕ គឹម​ហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស