យោងតាមតួលេខថ្មីបំផុតពីក្រសួងសុខាភិបាលឲ្យដឹងថា ការស្លាប់ដោយសារជំងឺគ្រុនឈាម និងគ្រុនចាញ់ បានធ្លាក់ចុះនៅក្នុងឆ្នាំនេះបើធៀបនឹងរយៈពេលដូចគ្នាកាលពីឆ្នាំ២០១២ ជាឆ្នាំដែលជំងឺគ្រុនឈាមមានការឆ្លងខ្ពស់នោះ។
លោក ង៉ាន ចន្ថា ប្រធានកម្មវិធីទប់ស្កាត់ជំងឺគ្រុនឈាមនៅក្រសួងសុខាភិបាលបានឲ្យដឹងថា ជំងឺគ្រុនឈាមបានសម្លាប់មនុស្សចំនួន៥៩នាក់ហើយបានឆ្លងទៅលើមនុស្សចំនួន១៧.៤៩១នាក់ អំឡុងរយៈពេល៤៩សប្តាហ៍ដំបូងនៅឆ្នាំនេះ។ ការស្លាប់និងការឆ្លងដោយសារជំងឺគ្រុនឈាមមានការធ្លាក់ចុះគួរឲ្យកត់សម្គាល់ពោលគឺ បានធ្លាក់ចុះពីការស្លាប់ចំនួន១៨៣ ករណីនិងការឆ្លងចំនួន៤១.៧១៦ករណី ដែលត្រូវបានកត់ត្រាក្នុងរយៈពេលដូចគ្នាកាលពីឆ្នាំ២០១២ ជាឆ្នាំដែលការឆ្លងនូវជំងឺគ្រុនឈាមមានការកើនឡើងខ្ពស់។ ការស្លាប់ដោយសារជំងឺគ្រុនឈាមនៅក្នុងឆ្នាំនេះក៏បានធ្លាក់ចុះបន្តិចពីករណីស្លាប់ចំនួន៥៦ករណីដែលត្រូវបានកត់ត្រាកាលពីឆ្នាំ២០០៨ ផងដែរ។
លោក ចន្ថា បានពន្យល់ថា ករណីឆ្លងនៃជំងឺគ្រុនឈាមដែលមានការកើនឡើងខ្ពស់អំឡុងឆ្នាំកើតមានជំងឺនេះច្រើននោះ វាអាចធ្វើឲ្យមានភាពសុំាសម្រាប់ពីរបីឆ្នាំក្រោយ។ ប៉ុន្តែលោកបានបន្ថែមថា ឪពុកម្តាយក្រនាំកូនៗដែលឈឺរបស់ខ្លួនទៅកាន់មន្ទីរពេទ្យ មុនពេលស្ថានភាពជំងឺធ្លាក់ក្នុងសភាពធ្ងន់ធ្ងរ។
លោកបានមានប្រសាសន៍ថា “ពួកគាត់នៅតែជឿជាក់លើគ្លីនិកឯកជន ហើយមិនបាននាំកូនៗរបស់ខ្លួនទៅកាន់មន្ទីរពេទ្យទាន់ពេលវេលាឡើយ”។
លោក ច ម៉េងជួ ប្រធានមជ្ឈមណ្ឌលជាតិគ្រប់គ្រងជំងឺគ្រុនចាញ់បានឲ្យដឹងថា ប្រទេសកម្ពុជាក៏នៅប្រឈមនឹងហានិភ័យនៅថ្ងៃអនាគតពីបណ្តាប្រទេសនៅក្នុងតំបន់ដែលករណីឆ្លងនៃគ្រុនឈាមមានការរីករាលដាលច្រើនផងដែរ។ លោកមានប្រសាសន៍ថា “ទោះបីជាហានិភ័យនៃការឆ្លងនៅក្នុងប្រទេសកម្ពុជាបានធ្លាក់ចុះក៏ដោយ ក៏ប្រទេសកម្ពុជាត្រូវតែចងចាំនៅក្នុងចិត្តដែរថា ប្រទេសកម្ពុជាគឺជាប្រទេសដែលស្ថិតនៅក្នុងតំបន់អាស៊ីអាគ្នេយ៍ជាតំបន់ដែលជំងឺ[គ្រុនឈាម] មានការផ្ទុះឡើងខ្លាំងនៅក្នុងពិភពលោក”។
ការស្លាប់និងការឆ្លងនៃជំងឺគ្រុនចាញ់ក៏មានការធ្លាក់ចុះដែរនៅក្នុងឆ្នាំនេះ។ យោងតាមមជ្ឈមណ្ឌលជាតិគ្រប់គ្រងជំងឺគ្រុនចាញ់បានឲ្យដឹងថា មេរោគដែលកើតចេញពីមូសដែកគោលបានសម្លាប់មនុស្សចំនួន៩នាក់ និងបានឆ្លងទៅលើមនុស្សចំនួន៣៧.២៨៧នាក់ អំឡុងរយៈពេល១១ខែដំបូងនៅក្នុងឆ្នាំនេះ បើធៀបនឹងការស្លាប់ចំនួន៣៩ករណីនិងការឆ្លងចំនួន៦៤.៣៧៦ករណី អំឡុងរយៈពេលដូចគ្នាកាលពីឆ្នាំ២០១២។
អ្វីដែលគួរឲ្យចាប់អារម្មណ៍ខ្លាំងនោះគឺនៅតាមព្រំដែនកម្ពុជាថៃភាគខាងលិច ព្រោះមិនមានការស្លាប់កើតឡើងឡើយ។ ក្រសួងសុខាភិបាលបានរកឃើញជំងឺដែលសុំានិងថ្នាំនេះនៅតាមព្រំដែនកម្ពុជាថៃនៅឆ្នាំ២០០៧ហើយចាប់តាំងពីពេលនោះមក ភាពសុំានៃជំងឺនេះកាន់តែមានសភាពខ្លាំងទៅៗ។ កម្មវិធីចែកមុងជ្រលក់ថ្នាំនៅតាមព្រំដែន ការបញ្ជូនមន្ត្រីសុខាភិបាលដែលមានជំនាញច្បាស់លាស់ទៅប្រចាំការនៅភូមិដែលមានការឆ្លងខ្លាំង និងការពារទាន់ពេលវេលា បានជួយកាត់បន្ថយករណីឆ្លងនិងករណីស្លាប់ដោយសារជំងឺគ្រុនចាញ់៕ ស៊ុយឈាង