កាលពីម្សិលមិញ សាលាឧទ្ធរណ៍បានសម្រេចដោះលែងពាណិជ្ជកររុស្ស៊ី សេរហ្គេ ប៉ូឡុនស្គី ដែលកំពុងប្រឈមនឹងសវនាការនៅក្នុងប្រទេសកំណើតរបស់គាត់តាមការចោទប្រកាន់ពីបទកេងបន្លំប្រាក់ជាច្រើនលានដុល្លារ ហើយបានផ្អាកការធ្វើបត្យាប័នគាត់ទៅកាន់ទីក្រុងមូស្គូ ដោយលើកឡើងថាជាដំបូងម ហាសេដ្ឋីអភិវឌ្ឍន៍អចលនទ្រព្យវ័យ៤១ឆ្នាំរូបនេះត្រូវប្រឈមនឹងតុលាការកម្ពុជា សិនចំពោះការជាប់ពាក់ព័ន្ធរបស់គាត់នៅក្នុងសំណុំរឿងប្រើអំពើហិង្សាមួយកាល ពីឆ្នាំ២០១២។
លោក ប៉ូឡុនស្គី ដែលបានស្វាគមន៍សេចក្ដីសម្រេចរបស់តុលាការដោយក្ដីរីករាយ បានខិតខំពុះពារយ៉ាងខ្លាំង ដើម្បីជំទាស់នឹងការធ្វើបត្យាប័នគាត់ទៅប្រទេសរុស្ស៊ី ហើយបានសន្យាវិនិយោគទុនរាប់រយលានដុល្លារប្រសិនបើគាត់ត្រូវបានអនុញ្ញាតឲ្យស្នាក់នៅក្នុងប្រទេសកម្ពុជា។
ដោយរកប្រាក់ចំណេញបានយ៉ាងច្រើនក្រាស់ក្រែលនៅក្នុងវិស័យអចលនទ្រព្យក្នុងប្រទេសរុស្ស៊ី មុនពេលខាតបង់ប្រាក់រាប់ពាន់លានដុល្លារក្នុងរយៈពេលប៉ុន្មានឆ្នាំថ្មីៗនេះ លោក ប៉ូឡុនស្គី បានច្រានចោលការចោទប្រកាន់មកលើរូបគាត់នៅក្នុងប្រទេសរុស្ស៊ី ហើយបានលើកឡើងថា គាត់នឹងមិនទទួលបានសវ នាការយុត្តិធម៌ឡើយនៅទីនោះ ដោយសារតែពាក្យបណ្ដឹងទាំងនោះពាក់ព័ន្ធនឹងហេតុផលនយោបាយ។
មិនយូរប៉ុន្មានមុនពេលគាត់ត្រូវចាប់ខ្លួនកាលពីខែវិច្ឆិកា លោក ប៉ូឡុនស្គី បានបង្ហោះវីដេអូឃ្លីបមួយនៅលើទំព័រហ្វេសប៊ុកដោយបង្ហាញពីសកម្មភាពមន្ត្រីនគរបាលកម្ពុជាជាន់ខ្ពស់មួយរូប ទាមទារប្រាក់មួយលានដុល្លារ ដើម្បីជួយសម្រួលថា តើអាចអនុញ្ញាតឲ្យគាត់ស្នាក់នៅក្នុងប្រទេសកម្ពុជា និងគេចផុតពីការធ្វើបត្យាប័នបានឬយ៉ាងណា។
លោក សេង សីុវុត្ថា ចៅក្រមប្រធានក្រុមប្រឹក្សាជំនុំជម្រះនៅសាលាឧទ្ធរណ៍បានមានប្រសាសន៍កាលពីម្សិលមិញថា “យើងបានសម្រេចផ្អាកការធ្វើបត្យាប័នគាត់ ដោយសារតែយើងចង់ឲ្យដោះស្រាយសំណុំរឿងគាត់នៅក្នុងសាលាដំបូងខេត្តព្រះសីហនុ។ យើងទទួលបានដំណឹងថា តុលាការ [ខេត្តព្រះសីហនុ] នឹងបើកសវនាការជំនុំជម្រះរឿងក្តីនេះនៅដំណាច់ខែនេះ”។
កាលពីខែមករា ឆ្នាំ២០១៣ សាលាដំបូងខេត្តព្រះសីហនុ បានចោទប្រកាន់លោក ប៉ូឡុនស្គី និងជនរួមជាតិរុស្ស៊ីផ្សេងទៀតពីបទប្រើអំពើហិង្សា បន្ទាប់ពីពួកគេបានយកកាំបិតគំរាមប្រជាពលរដ្ឋកម្ពុជាប្រាំមួយនាក់ហើយបង្ខំឲ្យពួកគេលោតពីទូកទៅក្នុងសមុទ្រនៅឯនាយឆ្នេរខេត្តព្រះសីហនុកាលពីថ្ងៃទី៣០ ខែធ្នូ ឆ្នាំ២០១២។
លោក ប៉ូឡុនស្គី ត្រូវបានឃុំខ្លួនពីបទប្រព្រឹត្តអំពើអនាចារ ប៉ុន្តែត្រូវបានធានាឲ្យនៅក្រៅឃុំកាលពីខែមេសា។ កាលពីខែកក្កដា តុលាការមួយក្នុងប្រទេសរុស្ស៊ី បានចោទប្រកាន់លោក ប៉ូឡុនស្គី ដោយកំបាំងមុខចំពោះការជាប់ពាក់ព័ន្ធរបស់គាត់ក្នុងករណីកេងបន្លំប្រាក់ចំនួន១៧៦លានដុល្លារ ពីវិនិយោគិនប្រមាណ៨០នាក់នៅក្នុងគម្រោងសាងសង់មួយក្នុងទីក្រុងមូស្គូ។ គាត់បានជាប់ឈ្មោះក្នុងបញ្ជីជនដែលនគរបាលអន្តរជាតិអាំងទែប៉ូល ចង់ចាប់ខ្លួនបំផុតកាលពីខែតុលា និងត្រូវបានចាប់ខ្លួនពេលកំពុងព្យាយាមរត់គេចពីការចាប់ខ្លួននៅលើកោះរ៉ុង នៅឯនាយឆ្នេរខេត្តព្រះសីហនុ កាលពីខែវិច្ឆិកា។
អំឡុងសវនាការបិទទ្វាររយៈពេលប្រាំនាទីកាលពីម្សិលមិញ ដែលក្រុមអ្នកយកព័ត៌មានត្រូវអើតសម្លឹងមើលពីខាងក្រោយបង្អួច លោក ប៉ូឡុនស្គី ឈរនិងមិននិយាយអ្វីទាំងអស់ ប៉ុន្តែគាត់បានញញឹមពព្រាយ ខណៈពេលចៅក្រមប្រធានក្រុមប្រឹក្សាជំនុំជម្រះអានសាលដីការបស់តុលាការ។ ពេលចេញពីសាលសវនាការវិញ លោក ប៉ូឡុនស្គី ដែលស្លៀកពាក់ខោអាវឈុតធំពណ៌ប្រផេះ និងអាវកឹបឡេវពណ៌ស្វាយខ្ចីគ្មានក្រវ៉ាត់កក្នុងទឹកមុខសប្បាយរីករាយបាននិយាយថា គាត់គ្រោងនឹងចាប់ផ្ដើមគម្រោងអភិវឌ្ឍន៍ទ្រង់ទ្រាយធំមួយនៅក្នុងប្រទេសកម្ពុជា ពីព្រោះពេលនេះគាត់មានសេរីភាពវិញហើយ។
គាត់និយាយថា “ខ្ញុំរីករាយណាស់នៅថ្ងៃនេះ ខ្ញុំឈ្នះហើយ។ ពេលនេះខ្ញុំត្រូវការពេលវេលាខ្លះសម្រាប់គិតបន្តជំហានឆ្ពោះទៅមុខ។ ខ្ញុំនឹងស្នាក់នៅប្រទេសកម្ពុជា រង់ចាំសំណុំរឿងមួយផ្សេងទៀតចាប់ផ្ដើមដំណើរការ និតិវិធីហើយសម្រេចចាប់ផ្ដើមគម្រោងអភិវឌ្ឍន៍ដ៏ធំមួយនៅកម្ពុជា។ វាជាគម្រោងដ៏ធំជាមួយនឹងកោះចំនួនប្រាំបី និងមានតម្លៃជាទឹកប្រាក់យ៉ាងហោចណាស់ប្រហែល៨០០លានដុល្លារ។ ប្រហែលជាយ៉ាងយូរបំផុតពីរខែទៀត ខ្ញុំនឹងបង្ហាញគម្រោងនេះ”។ អំឡុងសវនាការដំបូងនៅសាលាឧទ្ធរណ៍កាលពីថ្ងៃព្រហស្បតិ៍ លោក ប៉ូឡុនស្គី និយាយថា ប្រសិនបើគាត់ត្រូវបានអនុញ្ញាតឲ្យស្នាក់នៅប្រទេសកម្ពុជា គាត់នឹងបោះទុនវិនិយោគនៅទីនេះរហូតដល់ទៅ១.០០០លានដុល្លារ។
កន្លងមក លោក ប៉ូឡុនស្គី បានរក្សាភាពស្ងាត់ស្ងៀមមិននិយាយពីការវិនិយោគរបស់គាត់នាពេលអនាគតទេ ប៉ុន្តែ គាត់បានលើកឡើងថា គាត់បាននិងកំពុងធ្វើកិច្ចការលើគម្រោងមួយដែលគេស្គាល់ថា Polonium ។
លោក បែនសុន សម័យ ដែលជាមេធាវីមួយរូបតំណាងឲ្យលោក ប៉ូឡុនស្គី បានមានប្រសាសន៍ថា កូនក្ដីរបស់លោកនឹងស្នាក់នៅបន្តក្នុងប្រទេសនេះ “ដើម្បីជួយដល់កម្ពុជា”។ លោកបានមានប្រសាសន៍ថា “គាត់នឹងស្នាក់នៅទីនេះដើម្បីជួយដល់កម្ពុជា ពីព្រោះគាត់ជាមនុស្សចិត្តល្អខ្លាំងណាស់ ហើយខ្ញុំនឹងជួយរកប្រពន្ធឲ្យគាត់នៅក្នុងប្រទេសកម្ពុជា”។ លោកបានលើកឡើងទៀតថា “ប្រទេសកម្ពុជាគ្មានសន្ធិសញ្ញាធ្វើបត្យាប័នជាមួយប្រទេសរុស្ស៊ីទេ ដូច្នេះតាមផ្លូវច្បាប់ កម្ពុជា មិនត្រូវបានតម្រូវឲ្យបញ្ជូនលោក ប៉ូឡុនស្គី ទៅកាន់ទីក្រុងមូស្គូឡើយ”៕ សុខុម