នគរបាលបានឲ្យដឹងកាលពីម្សិលមិញថា គ្រូឱសថបុរាណម្នាក់ ដែលត្រូវបានចោទថាចេះអំពើអាបធ្មប់ ត្រូវបានវាយដល់សន្លប់នៅក្នុងស្រុកព្រៃកប្បាស ខេត្តតាកែវ កាលពីថ្ងៃសុក្រ បន្ទាប់ពីពាក់ព័ន្ធក្នុងជម្លោះបង្ករបួសស្នាមជាមួយអ្នកភូមិម្នាក់។
លោក ជុំ ហ៊ឺ នាយនគរបាលប៉ុស្តិ៍ឃុំអង្កាញ់បានឲ្យដឹងថា ឈ្មោះ ម៉ៅ ផន ជាគ្រូឱសថបុរាណអាយុ៥៧ឆ្នាំ ត្រូវបានវាយដោយឈ្មោះ វង្ស សំអុល អាយុ៣៧ឆ្នាំ ដែលសម្រុកចូលក្នុងផ្ទះរបស់គាត់ បន្ទាប់ពីបរាជ័យក្នុងការហៅឲ្យនគរបាលបណ្តេញ ម៉ៅ ផន ចេញពីភូមិ ដោយសារធ្វើឲ្យប្រជាជនជាច្រើននាក់ឈឺ តាមរយៈអាគមគាថា។លោក ហ៊ឺ បានមានប្រសាសន៍ថា “ជនសង្ស័យ បានយកកាំបិតផ្គាក់ កាប់ជនរងគ្រោះត្រូវចំក្បាល”។
លោក ទឺ នាង មេឃុំអង្កាញ់ បានមានប្រសាសន៍ថា អ្នកភូមិបានចោទប្រកាន់ ម៉ៅ ផន យូរហើយថា ចេះអំពើអាបធ្មប់។ លោកបានឲ្យដឹងទៀតថា “ ទាំ ងសាច់ញាតិរបស់គាត់ និងប្រជាជនផ្សេងទៀត នៅក្នុងភូមិនេះបានចោទគាត់ថា ចេះធ្វើអំពើអាបធ្មប់ បន្ទាប់ពីពួកគេធ្លាក់ខ្លួនឈឺ”។
លោក ជុំ ហ៊ឺ បានបន្ថែមថា អ្នកស្រុកបានធ្វើញត្តិទៅអាជ្ញាធរឃុំ ឲ្យបណ្តេញ ម៉ៅ ផន ចេញពីភូមិ ប៉ុន្តែនៅពេលសំណើនេះត្រូវបានបដិសេធ អ្នកស្រុកប្រហែល៥០នាក់បានធ្វើដំណើរទៅផ្ទះរបស់ ម៉ៅ ផន និងចាប់ផ្តើមចោលដុំថ្ម ហើយគំរាមចូលក្នុងផ្ទះ ប្រសិនបើគាត់មិនព្រមចេញ។បន្ទាប់នោះ លោក សំអុល បានចូលក្នុងផ្ទះនេះ ហើយក្រោយមកបានដណ្តើមយកកាំបិតពី ម៉ៅ ផន និងកាប់អ្នកចេះអំពើអាបធ្មប់នេះចំសៀតផ្កា មុនពេលចោលដុំថ្មលើគាត់។
នៅក្នុងផ្ទះនោះដែរ ឈ្មោះ ម៉ៅ ស្រីមុំ កូនស្រី អាយុ២៧ឆ្នាំ បានទាញពូថៅមួយកាប់ទៅលើលោក សំអុល ត្រូវចំដងខ្លួនផ្នែកខាងក្រោមរបស់គាត់ត្រូវបីកន្លែង ក្នុងស្វ័យការពារ ដោយបញ្ចប់ការឡោមព័ទ្ធផ្ទះនេះ ដោយអ្នកភូមិ។បុរសទាំងពីរនាក់ត្រូវបានបញ្ជូនទៅកាន់មន្ទីរពេទ្យដើម្បីព្យាបាលមុខរបួសរបស់ខ្លួន។
លោក អ៊ូ វណ្ណារិទ្ធ អធិការរងនគរបាលស្រុកព្រៃកប្បាសបានមានប្រសាសន៍ថា“ មនុស្សចំនួនប្រាំមួយនាក់ក្នុងចំណោមអ្នកចោលដុំថ្ម ត្រូវបានឃាត់ខ្លួនដើម្បីសាកសួរកាលពីថ្ងៃអង្គារ ហើយក្រោយមកត្រូវបានដោះលែងវិញ។លោកបានមានប្រសាសន៍ថា “យើងចាប់ខ្លួនបានមនុស្សចំនួនប្រាំមួយនាក់ ដែលស្ថិតក្នុងក្រុមអ្នកភូមិដើម្បីសួរនាំនៅអធិការដ្ឋាននគរបាល ក៏ប៉ុន្តែយើងដោះលែងពួកគេវិញ។ យើងគិតថា វាមានផលលំបាកក្នុងការស្វែងរកជនសង្ស័យ ពីព្រោះមនុស្សជាច្រើនដែលពាក់ព័ន្ធក្នុងការវាយប្រហារនេះ ពេលនេះកំពុងលាក់ខ្លួន”។
លោក វណ្ណារិទ្ធ បានមានប្រសាសន៍ថា រឿងក្តីនេះនឹងត្រូវបើកចំហនៅសាលាដំបូងខេត្តតាកែវថ្ងៃនេះ ដើម្បីធ្វើការស៊ើបអង្កេតថែមទៀតទៅលើជំលោះនេះ។ព័ត៌មានស្តីពីការវាយប្រហារនេះ បានកើតឡើងភ្លាមៗបន្ទាប់ពីអ្នកចេះអាបធ្មប់ម្នាក់ត្រូវបានគេកាត់ក្បាលកាលពីថ្ងៃសៅរ៍ ហើយម្នាក់ទៀត ត្រូវបានគេកាប់ស្លាប់កាលពីថ្ងៃអាទិត្យ ដោយសារអ្នកភូមិដែលខឹងសម្បារនៅក្នុងខេត្តកំពង់ស្ពឺ៕ ប៊ុននី