យោងតាមនគរបាលមូលដ្ឋានបានឲ្យដឹងថា កាលពីម្សិលមិញ អង្គភាពប្រឆាំងអំពើពុករលួយបានចាប់ខ្លួនមន្ត្រីនគរបាលស្រុកចំនួនពីរនាក់នៅក្នុងខេត្តកំពតពីបទសង្ស័យថា បានកឹបកេងប្រាក់ខែរបស់មន្ត្រីនគរបាលថ្នាក់ឃុំនិងថ្នាក់ស្រុកអស់រយៈពេលជាច្រើនឆ្នាំកន្លងមកហើយ។
លោក គឹម សុខន អធិការរងនគរបាលស្រុកបន្ទាយមាស បានបញ្ជាក់អត្តសញ្ញាណជនសង្ស័យទាំងពីរនាក់នោះដែលជានគរបាលដូចគ្នាថា មួយមានឈ្មោះ ម៉ក់ ហួត អធិការរងនគរបាលស្រុក និងម្នាក់ទៀតឈ្មោះ ស៊្រុន ឡាំ អធិការនគរបាលស្រុក ហើយលោកបានឲ្យដឹងថា សាលាដំបូងខេត្តកំពតនឹងសាកសួរជនសង្ស័យទាំងពីរនៅថ្ងៃនេះ។
លោក សុខន បានមានប្រសាសន៍ថា “ មន្ត្រីនគរបាលទាំងពីរនាក់នេះត្រូវបានអង្គភាពប្រឆាំងអំពើពុករលួយចាប់ខ្លួនពីបទកាត់យកប្រាក់ខែមន្ត្រីនគរបាលអស់រយៈពេលប្រាំឆ្នាំមកហើយ”។ ប៉ុន្តែលោកបានលើកឡើងថា លោកមិនបានដឹងថា តើប្រាក់ចំនួនប៉ុន្មានដែលពួកគេត្រូវបានចោទប្រកាន់ថា បានលួចអំឡុងរយៈពេលនោះឡើយ។
សាលាដំបូងខេត្តកំពត បានបញ្ជាក់ថា ជនសង្ស័យទាំងពីរកំពុងត្រូវបានសាកសួរហើយ។
លោក អុីវ ត្រាយ ព្រះរាជអាជ្ញារងអមសាលាដំបូងខេត្តកំពតបានមានប្រសាសន៍ថា “សាលាដំបូងបានសាកសួរមន្ត្រីនគរបាលទាំងពីរនាក់នេះ ហើយពួកគេត្រូវបានស៊ើបអង្កេតដោយអង្គភាពប្រឆាំងអំពើពុករលួយ”។
លោក ឱម យិុនទៀង ប្រធានអង្គភាពប្រឆាំងអំពើពុករលួយ បានបដិសេធមិននិយាយជាមួយអ្នកយកព័ត៌មានឡើយ រីឯលោក ឃាង សេង ប្រធានអនុវតន៍្តច្បាប់របស់អង្គភាពនេះបានលើកឡើងថា លោកមិនបានដឹងពីករណីនេះទេ។
លោក ថ្លុង ភិរិន ស្នងការនគរបាលខេត្តកំពត ក៏បានឲ្យដឹងដែរថា លោកក៏មិនបានដឹងថា មន្ត្រីក្រោមឱវាទរបស់លោកទាំងពីរនាក់នេះត្រូវបានចោទប្រកាន់ពីបទកឹបកេងប្រាក់ខែដែរ។
លោក យន់ ផល្លី អ្នកស្រាវជ្រាវពាក់ព័ន្ធនឹងពន្ធនាគារនៅអង្គការសិទ្ធិមនុស្សក្នុងស្រុកលីកាដូ បានឲ្យដឹងថា អង្គការរបស់លោកទទួលបានពាក្យបណ្តឹងអនាមិកមួយពីមន្ត្រីដែលធ្វើការនៅក្រោមឱវាទរបស់ជនសង្ស័យទាំងពីរ ដោយចោទប្រកាន់ជនទាំងពីរនេះថា បានកឹបកេងយកប្រាក់រង្វាន់លើកទឹកចិត្តរបស់ខ្លួនដែលគណបក្សប្រជាជនកម្ពុជាបានផ្តល់ឲ្យ។ លោកបានឲ្យដឹងទៀតថា អាជ្ញាធរត្រូវបានប្រាប់ឲ្យអំពីបញ្ហាកឹបកេងប្រាក់នេះប្រហែលបីឬបួនខែកន្លងមកហើយ៕ស៊ុយឈាង