មន្ត្រីរដ្ឋាភិបាលនិងមន្ត្រីទទួលបន្ទុកជនភៀសខ្លួនមិនបញ្ចេញព័ត៌មានទេកាលពីថ្ងៃសុក្រ បន្ទាប់ពីកិច្ចពិភាក្សាបិទទ្វារជិតនៅក្នុងទីក្រុងភ្នំពេញរវាងលោក ស្គុត ម៉ូរីសុន រដ្ឋមន្ត្រីក្រសួងអន្តោប្រវេសន៍អូស្ត្រាលី និងលោក ស ខេង រដ្ឋមន្ត្រីក្រសួងមហាផ្ទៃកម្ពុជាកាលពីថ្ងៃព្រហស្បតិ៍។
កាលពីខែកុម្ភៈ លោកស្រី ជូលី ប៊ីសប់ រដ្ឋមន្ត្រីក្រសួងការបរទេសអូស្ត្រាលីបានស្នើឲ្យកម្ពុជាពិចារណាទទួលយកអ្នកស្វែងរកសិទ្ធិជ្រកកោននៅក្នុងប្រទេសអូស្ត្រាលី។
មន្ត្រីកម្ពុជាបួនរូប គឺលោក តាន់ សុខវិជ្ជា ដែលជាប្រធានការិយាល័យជនភៀសខ្លួនរបស់រដ្ឋាភិបាល លោក កុយ គួង អ្នកនាំពាក្យក្រសួងការបរទេស ឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ និងលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីសុទ្ធតែបាននិយាយថា ពួកគាត់មិនមានព័ត៌មានអំពីកិច្ចពិភាក្សានេះ។
ស្ថានទូតអូស្ត្រាលី និងការិយាល័យរបស់លោក ម៉ូរីសុន បានចេញសេចក្ដីថ្លែងការណ៍ដូចគ្នា ដោយលើកឡើងថា កិច្ចពិភាក្សានេះបន្តពិភាក្សាអំពីកិច្ចសហប្រតិបត្តិការក្នុងតំបន់ស្ដីពីបញ្ហារត់ពន្ធ។
សមាជិកព្រឹទ្ធសភា សារ៉ាហានសុន យ៉ុង អ្នកនាំពាក្យផ្នែកអន្តោប្រវេសន៍របស់គណបក្សបៃតងអូស្ត្រាលីបានលើកឡើងនៅក្នុងសេចក្ដីថ្លែងការណ៍មួយថា សំណើសុំយកជនភៀសខ្លួនមកទម្លាក់ចោលនៅកម្ពុជា គឺជាការមិនមានការទទួលខុសត្រូវនិងមិនសមហេតុផល ហើយថា ប្រទេសកម្ពុជាកំពុងទទួលនូវកែវស្រាពុលក្នុងការទទួលយកជនភៀសខ្លួនទាំងនេះ។
លោកស្រី ដេននីស ខូកឡែន ប្រធានអង្គការសេវាជនភៀសខ្លួនព្រះយេស៊ូ បាននិយាយថា លោកស្រីមានកង្វល់ធំៗពីរប្រសិនបើកិច្ចព្រមព្រៀងនេះត្រូវជាប់គាំង។ “កង្វល់មួយ គឺថា អូស្ត្រាលីដែលមានលុយនិងដីទំនេរច្រើនកំពុងយកមនុស្សទៅបោះចោលនៅក្នុងប្រទេស ដែលប្រជាពលរដ្ឋរបស់ខ្លួនកំពុងរស់ក្រោមបន្ទាត់នៃភាពក្រីក្រនិងមិនមានដីទំនេរច្រើន”។
លោកស្រីបាននិយាយថា លោកស្រីក៏ព្រួយបារម្ភដែរថា ស្ថានភាពនយោបាយនិងសិទ្ធិមនុស្សនៅកម្ពុជាមិនល្អទេ ហើយថា នេះគ្រាន់តែជាការបន្ថែមមនុស្សមួយក្រុមទៀត ដែលភាគច្រើនមិនចង់ទៅរស់នៅកម្ពុជា ឲ្យទៅរស់នៅលាយឡំគ្នានៅទីនោះ។
នេះកំពុងធ្វើឲ្យភាពតានតឹងរបស់រដ្ឋាភិបាលដែលមានបញ្ហារួចហើយកាន់តែធ្ងន់ធ្ងរទៅៗ។ កាលពីមុនប្រទេសកម្ពុជាបានបញ្ជូនជនជាតិភាគតិចវីហ្គួត្រឡប់ទៅប្រទេសចិន និងបញ្ជូនកុលសម្ព័ន្ធភ្នំម៉ុងតាញ៉ា ត្រឡប់ទៅប្រទេសវៀតណាម ដែលនៅទីនោះ ក្រុមជនភៀសខ្លួនទាំងពីរត្រូវបានធ្វើទុកបុកម្មេញ៕ គឹមហឿន