ទីភ្នាក់ងារសហប្រតិបត្តិការអន្តរជាតិជប៉ុន (JICA) បានបង្ហាញផែនការរបស់ខ្លួនកាលពីម្សិលមិញ នូវគម្រោងផ្លូវល្បឿនលឿនពីរាជធានីភ្នំពេញទៅទីក្រុងហូជីមិញ ដោយកាត់បន្ថយរយៈពេលធ្វើដំណើរទ្វេដងរវាងទីក្រុងទាំងពីរ។
ក្នុងចំនួនទឹកប្រាក់ប៉ាន់ស្មាន២,២ពាន់លានដុល្លារ កាលបរិច្ឆេទកំណត់ដំបូងសម្រាប់បញ្ចប់គម្រោងផ្លូវល្បឿនលឿននេះ គឺនៅឆ្នាំ២០៣០ នេះបើយោងតាមសេចក្ដីប្រកាសដោយតំណាងអង្គការ JICA នៅក្នុងសន្និសីទមួយប្រារព្ធនៅសណ្ឋាគារឡឺរ៉ូយ៉ាល់ ក្នុងរាជធានីភ្នំពេញ។
អង្គការ JICA បានឲ្យដឹងថា ផ្លូវល្បឿនលឿនកម្រិតហាយវ៉េនេះ នឹងកាត់បន្ថយរយៈពេលធ្វើដំណើររវាងទីក្រុងទាំងពីរ ពី៦ម៉ោងមក៣ម៉ោង។ នៅក្នុងប្រទេសកម្ពុជាផ្លូវនេះនឹងត្រូវបានសាងសង់ដោយបែងចែកជាបីដំណាក់កាល គឺពីរាជធានីភ្នំពេញទៅអ្នកលឿង ដែលមានទីតាំងស្ថិតនៅលើទន្លេមេគង្គក្នុងខេត្តព្រៃវែង ពីអ្នកលឿងទៅក្រុងស្វាយរៀង និងពីក្រុងស្វាយរៀង ទៅក្រុងបាវិតនៅព្រំដែនវៀតណាម។
អង្គការ JICA រំពឹងថា ដំណាក់កាលដំបូងនៃគម្រោងផ្លូវល្បឿនលឿននេះនឹងចាប់ផ្ដើមដំណើរការប្រហែលជាក្នុងឆ្នាំ២០២០។ ផ្លូវប្រវែងសរុប១៧០គីឡូម៉ែត្រពីរាជធានីភ្នំពេញ ទៅក្រុងបាវិត ដោយមិនទាន់គិតប្រវែង៩០គីឡូម៉ែត្រនៅសល់ទៅកាន់ទីក្រុងហូជីមិញ ត្រូវបានរំពឹងថា នឹងបញ្ចប់មុនឆ្នាំ២០៣០។ គម្រោងផ្លូវបើកលឿននេះ គឺជាផ្នែកមួយនៃផែនការធំរបស់អង្គការ JICA សម្រាប់បង្កើតច្រករបៀងកាត់តំបន់អាស៊ីអាគ្នេយ៍ ដែលនឹងដាក់បញ្ចូលទីក្រុងបាងកកមកដល់ផ្លូវមកកាន់រាជធានីភ្នំពេញ។
នៅក្នុងរបាយការណ៍ដែលត្រូវបានចេញផ្សាយក្នុងពេលជាមួយគ្នានឹងសេចក្ដីប្រកាសនេះ អង្គការ JICA បានឲ្យដឹងថា ប្រទេសកម្ពុជា ដែលខិតខំធ្វើពិពិធកម្មលើវិស័យកាត់ដេរឲ្យចូលទៅក្នុងវិស័យឧស្សាហកម្មដែលមានតម្លៃបន្ថែមនោះ កំពុងតាមពីក្រោយប្រទេសដទៃទៀតនៅក្នុងតំបន់អាស៊ី ដោយសារប្រទេសនេះមានសមត្ថភាពដឹកជញ្ជូនទំនិញបានយ៉ាងលឿន។
អង្គការ JICA បានលើកឡើងថា “ឧស្សាហកម្មទំនើបដែលមានតម្លៃបន្ថែមខ្ពស់ ដូចជាឧស្សហកម្មផលិតរថយន្ត និងគ្រឿងអេឡិចត្រូនិចត្រូវការប្រព័ន្ធផ្គត់ផ្គង់គ្រឿងដំឡើងដែលមានប្រសិទ្ធភាពខ្ពស់ផ្នែកសន្និធិ និងល្បឿន ក៏ដូចជាស្ថិរភាពនៃសកម្មភាពដឹកជញ្ជូនទំនិញ។ កត្តាទំាងនេះត្រូវការផ្លូវល្បឿនលឿនមួយសម្រាប់ប្រើប្រាស់”។
គម្រោងផ្លូវនេះក៏មានគោលបំណងពង្រឹងកិច្ចសហប្រតិបត្តិការផ្នែកសេដ្ឋកិច្ចរវាងប្រទេសកម្ពុជា និងប្រទេសវៀតណាមដែរ។ ទំហំពាណិជ្ជកម្មរវាងប្រទេសទាំងពីរកើនឡើងដល់៣,៥ពាន់លានដុល្លារក្នុងឆ្នាំ២០១៣ពោលគឺបានកើតឡើង២៥ភាគរយ ពីមួយឆ្នាំទៅមួយឆ្នាំ។ ប្រជាជនវៀតណាមក៏បានចូលរួមយ៉ាងច្រើនធ្វើជាភ្ញៀវទេសចរមកទស្សនាប្រទេសកម្ពុជាផងដែរ ពោលគឺមានចំណែក២៣ភាគរយនៃចំនួនភ្ញៀវទេសចរអន្តរជាតិសរុបកាលពីឆ្នាំមុន។
លោក ហាតា ស៊ុនជិ (Hata Shunji) ទីប្រឹក្សាអង្គការ JICA បានលើកឡើងថា ការពន្លឿនដំណើរការគយរវាងប្រទេសទាំងពីរនឹងមានសារៈសំខាន់ខ្លាំងណាស់ចំពោះការសម្រេចឲ្យបាននូវជោគជ័យក្នុងគម្រោងផ្លូវបើកលឿននេះ។ លោកបានមានប្រសាសន៍ថា “ការពិនិត្យ និងសម្រេចឯកសារគយមានសារៈសំខាន់ខ្លាំងណាស់។ ប្រសិនបើដំណើរការនេះត្រូវប្រើពេលយូរ គម្រោងនេះមិនមានន័យទេ ដូច្នេះយើងរំពឹងថា ដំណើរការពិនិត្យ និងសម្រេចឯកសារគយ និងនៅព្រំដែននឹងត្រូវប្រើពេលវេលាតិចជាងមុន”៕ សុធា