កាលពីម្សិលមិញ លោកនាយករដ្ឋមន្ត្រី ហ៊ុន សែន បានអនុញ្ញាតឲ្យលោក George Yong Boon Yeo អតីតរដ្ឋមន្ត្រីការបរទេសសិង្ហបុរីចូលជួបសម្តែងការគួរសមនៅវិមានសន្តិភាពក្នុងរាជធានីភ្នំពេញ ដោយរូបថតអំពីជំនួបនោះចុះផ្សាយនៅលើគេហទំព័រព័ត៌មានក្នុងស្រុកបញ្ចប់ពាក្យចចាមអារ៉ាម ដែលថា លោក ហ៊ុន សែន បានដាច់សរសៃឈាមខួរក្បាលធ្ងន់ធ្ងរ។
យោងតាមលោក អៀង សុផាល្លែត ជំនួយការផ្ទាល់របស់លោក ហ៊ុន សែន បានឲ្យដឹងថា ឥឡូវនេះលោក Yeo ដែលជាប្រធានក្រុមហ៊ុន Kerry Logistics មានមូលដ្ឋាននៅទីក្រុងហុងកុង កំពុងស្វែងរកការគាំទ្រពីលោកនាយករដ្ឋមន្ត្រី ដើម្បីបើកក្រុមហ៊ុនរបស់លោកក្នុងប្រទេសកម្ពុជា និងដើម្បីនាំមកនូវការវិនិយោគ។ លោកបានមានប្រសាសន៍ថា “វាជាដំណើរទស្សនកិច្ចលើកទី៣របស់លោកចាប់តាំងពីឆ្នាំ១៩៩៩មក ហើយលោកបានមានប្រសាសន៍បន្ថែមទៀតថា ប្រទេសកម្ពុជាមានការអភិវឌ្ឍយ៉ាងច្រើនចាប់តាំងពីពេលនោះមក”។
ដោយបញ្ចប់ពាក្យចចាមអារ៉ាមជុំវិញបញ្ហាសុខភាពរបស់លោកនោះ លោក ហ៊ុន សែន មានសុខភាពល្អអាចធ្វើដំណើរបាន ហើយនឹងដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចផ្លូវការរយៈពេលពីរថ្ងៃនៅប្រទេសបង់ក្លាដែស នៅថ្ងៃច័ន្ទ នេះបើយោងតាមសេចក្តីប្រកាសព័ត៌មានដែលបានចេញកាលពីម្សិលមិញដោយក្រសួងការបរទេស៕ សារុន