មន្ត្រីបញ្ញត្តិករទូរគមនាគមន៍កម្ពុជា (TRC) ម្នាក់បាននិយាយកាលពីម្សិលមិញថា បញ្ញត្តិករទូរគមនាគមន៍កម្ពុជាចង់ឲ្យក្រុមហ៊ុនទូរស័ព្ទចល័ត qb និងក្រុមហ៊ុនទូរស័ព្ទ Smart ដោះស្រាយជម្លោះក្រៅតុលាការ ហើយបានជូនដំណឹងដល់ក្រសួងប្រៃសណីយ៍ និងទូរគមនាគមន៍អំពីគោលបំណងរបស់ខ្លួនក្នុងការសម្របសម្រួលការចរចារវាងក្រុមហ៊ុនទាំងពីរនេះ។
លោក អ៊ុក ដូរ៉ានី (AukDorany) ជាសមាជិកទី២នៃ TRC បានមានប្រសាសន៍ថា ” យើងមិនចង់ដោះស្រាយរឿងនេះនៅតុលាការទេ។យើងចង់ព្យាយាមដោះស្រាយបញ្ហានេះជាមួយបញ្ញត្តិករ។ យើងមានផែនការធ្វើការចរចារវាងក្រុមហ៊ុន qb និងក្រុមហ៊ុន Smart”។
លោក ដូរ៉ានី បានឲ្យដឹងទៀតថា TRC បានបញ្ជូនលិខិតមួយច្បាប់កាលពីម្សិលមិញ ទៅក្រសួងប្រៃសណីយ៍ និងទូរគមនាគមន៍ ដោយជូនដំណឹងអំពីផែនការរបស់បញ្ញត្តិករក្នុងការដោះស្រាយជម្លោះនេះនៅក្រៅតុលាការ។ លោកបានមានប្រសាសន៍ថា “លិខិតផ្ញើទៅក្រសួងជូនដំណឹងដល់រដ្ឋមន្ត្រីថា យើងនឹងអញ្ជើញក្រុមហ៊ុនទាំងពីរមកចរចា។ លិខិតនោះចុះហត្ថលេខាដោយប្រធាន TRC នៅថ្ងៃនេះ និងត្រូវបញ្ជូននៅថ្ងៃនេះ”។
ក្រុមហ៊ុន qb ជាក្រុមហ៊ុនមួយក្នុងចំណោមក្រុមហ៊ុនទូរស័ព្ទចល័តតូចបំផុតនៅកម្ពុជាបានចោទប្រកាន់ក្រុមហ៊ុន Smart ដែលជាក្រុមហ៊ុនធំបំផុតទី២គិតតាមចំនួនអតិថិជននៅកម្ពុជា ថាបានបង្ខូចកិត្តិនាម និងធ្វើឲ្យខូចផលប្រយោជន៍ហិរញ្ញវត្ថុរបស់ខ្លួន បន្ទាប់ពីក្រុមហ៊ុនទាំងពីរនេះបានបញ្ចប់កិច្ចព្រមព្រៀងមានយូរមកហើយ ដែលអនុញ្ញាតឲ្យអតិថិជន qb “ ប្រើសេវា រូ៉មីង” តាមប្រព័ន្ធទូរស័ព្ទរបស់ក្រុមហ៊ុន Smart ។
មុនពេលមានការបញ្ចប់កិច្ចព្រមព្រៀងនេះ ក្រុមហ៊ុន qb បានចាប់ផ្តើមទទួលការហៅទូរស័ព្ទពីអតិថិជន ដែលបានប្រាប់ក្រុមហ៊ុននេះថា ក្រុមហ៊ុន Smart កំពុងតែទាក់ទងពួកគេឲ្យប្តូរទៅប្រើប្រព័ន្ធទូរស័ព្ទ Smart វិញ។
លោក ដូរ៉ានី បានមានប្រសាសន៍ថា ក្រុមហ៊ុន Smart បានបញ្ជូនលិខិតមួយច្បាប់ដែលមានចុះកាលបរិច្ឆេទថ្ងៃទី ២៩ ខែឧសភា និងចុះហត្ថលេខាដោយប្រធានប្រតិបត្តិរបស់ក្រុមហ៊ុននេះមក TRC ដោយជូនដំណឹងថា ខ្លួនមានឆន្ទៈចូលរួមក្នុងការចរចា។
លោក ដូរ៉ានី បានមានប្រសាសន៍ថា ” ក្រុមហ៊ុន Smart បានបញ្ជូនលិខិតមួយច្បាប់ទៅ TRC និងបានឲ្យដឹងថា ពួកគេចង់ចូលរួមការចរចា។ យើងជឿជាក់ថា ក្រុមហ៊ុនទាំងពីរនឹងអាចដោះស្រាយបញ្ហានេះបាន” ។
កាលពីពាក់កណ្តាលខែឧសភា បន្ទាប់ពីក្រុមហ៊ុន qb បានប្តឹងក្រុមហ៊ុន Smart ទៅ TRC បញ្ញត្តិករបានបញ្ជូនលិខិតមួយច្បាប់ទៅក្រុមហ៊ុន Smart ដោយជូនដំណឹងដល់ក្រុមហ៊ុននេះថា ក្រុមហ៊ុននេះអាចប្រឈមនឹងបណ្តឹង ហើយបានស្នើថា ត្រូវដោះស្រាយបញ្ហានេះ ” ជាបន្ទាន់” ។
លោក អាឡាន សីុនហ្វៀល (AlanSinfield) នាយកប្រតិបត្តិ qb បានមានប្រសាសន៍កាលពីម្សិលមិញថា ក្រុមហ៊ុនព្រមធ្វើការចរចាប្រសិនបើក្រុមហ៊ុន Smart ព្រមបង់សំណង។ លោកបានមានប្រសាសន៍ថា “ប្រសិនបើ បញ្ញត្តិករទទួលយកការផ្តួចផ្តើមនេះ ហើយប្រសិនបើ ក្រុមហ៊ុន Smart ព្រមសងដល់ការខូចខាតផលប្រយោជន៍ហិរញ្ញវត្ថុ ដូច្នេះយើងនឹងព្រមពិភាក្សាបញ្ហានេះ ប៉ុន្តែ បើមិនព្រមទេនោះ យើងនឹងស្វែងរកសំណងតាមរយៈតុលាការ”។ លោកបានបន្ថែមថា ” ពេលវេលាគឺសំខាន់ណាស់ ពីព្រោះយើងនឹងបន្តបណ្តឹងរដ្ឋប្បវេណីតាមរយៈតុលាការ”។
លោក ថូម៉ាស ហាន (Thomas Hundt) នាយកប្រតិបត្តិក្រុមហ៊ុន Smart មិនបានឆ្លើយតបទៅនឹងសំណើសុំការពន្យល់ទេ។ ក្រុមហ៊ុន Smart គឺជាសាខាក្រុមហ៊ុន AxiataGroupBerhad មានមូលដ្ឋាននៅប្រទេសម៉ាឡេស៊ី រីឯក្រុមហ៊ុន qb គឺជារបស់ក្រុមហ៊ុន CambodiaAdvanceCommunications គ្រប់គ្រងដោយអារ៉ាប៊ីសាអូឌីត៕មានិត