ក្រុមមន្ត្រីបាននិយាយកាលពីម្សិលមិញថា ប្រជាពលរដ្ឋរស់នៅក្នុងក្រុងភ្នំពេញគួរបន្តត្រៀមទប់ទល់នឹងការជន់លិចថែមទៀតអំឡុងរដូវភ្លៀងឆ្នាំនេះ ពីព្រោះមិនឃើញមានសភាពធូរស្រាលណាមួយនៅឡើយ។
ការជន់លិចនេះបានធ្វើឲ្យប៉ះពាល់មួយភាគធំនៃទីក្រុង បន្ទាប់ពីភ្លៀងធ្លាក់មួយមេធំកាលពីរសៀលម្សិលមិញ ដោយបានបង្កឲ្យមានការស្ទះចរាចរណ៍ ក្នុងពេលដែលយានយន្តគ្រប់ប្រភេទនាំគ្នាបើកបរតែលើផ្លូវសំខាន់ៗ ដើម្បីគេចចេញពីផ្លូវជន់លិច។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបន្ទោសប្រជាជនថាបានធ្វើឲ្យស្ទះលូបង្ហូរទឹកដោយការចោលសំរាម ឬ បិទបំពង់លូទឹកសម្អុយដើម្បីចៀសវាងក្លិនស្អុយ។
កាលពីខែសីហាឆ្នាំមុន សាលារាជធានីភ្នំពេញបានធ្វើយុទ្ធនាការមួយឲ្យប្រជាជនចោលសំរាមឲ្យបានត្រឹមត្រូវ ដើម្បីសម្រាលការជន់លិចរ៉ាំរៃនៅរដូវភ្លៀង។ ក្នុងយុទ្ធនាការនោះ សាលាក្រុងក៏បានសន្យាសម្អាតប្រព័ន្ធបង្ហូរទឹកក្នុងក្រុងបីដងនៅរដូវវស្សា ដើម្បីបន្ថយការជន់លិចប្រហែល៧០ភាគរយដែលបង្កឡើងដោយការស្ទះសំរាម។
លោក ឌី ម៉ង់ បានមានប្រសាសន៍ថា មិនទាន់មានការស្តារប្រព័ន្ធលូបង្ហូរទឹកនៅឡើយទេ ប៉ុន្តែបានរៀបចំធ្វើហើយ។
ការចោលសំរាមពាសវាលពាសកាលមានន័យថាការស្ថាបនាប្រព័ន្ធលូទឹកសម្អុយតម្លៃ៣៥០លានដុល្លាររបស់ទីភ្នាក់ងារសហប្រតិបត្តិការអន្តរជាតិជប៉ុនហៅកាត់ថា Jaica មិនអាចសម្រាលការជន់លិចក្នុងរាជធានីបានទេ។
លោក ដួង ច័ន្ទសារ៉ាត ប្រធានអង្គភាពលូទឹក-បូមទឹកនៅមន្ទីរសាធារណការនិងដឹកជញ្ជូនរាជធានី បានមានប្រសាសន៍ថា លោកចង់បានប្រព័ន្ធលូទឹកថ្មីទៀត ប៉ុន្តែវាអាស្រ័យលើថវិការបស់សាលារាជធានី។ លោកបានឲ្យដឹងថា “ប្រព័ន្ធលូបង្ហូរទឹកក្នុងរាជធានីមានតាំងពីសម័យអាណានិគមបារាំង។ ភាគច្រើននៅប្រើបាន ហើយប្រព័ន្ធផ្សេងទៀតយើងអាចជួសជុលបាន”។
ប៉ុន្តែនៅតាមមហាវិថីព្រះនរោត្តមកាលពីល្ងាចម្សិលមិញ អ្នកធ្វើដំណើរទាំងឡាយគិតតែជិះបញ្រ្ជៀតគ្នាដើម្បីឲ្យបានទៅដល់ ផ្ទះរបស់ពួកគេប៉ុណ្ណោះ។
គុច វាសនា អាយុ២៦ឆ្នាំ ជាអាជីវករនៅផ្សារទួលទំពូង បាននិយាយថា លោកចង់ឲ្យគេដោះស្រាយបញ្ហានេះ។ លោកបានបន្ថែមថា “ការជន់លិចក្នុងរាជធានីភ្នំពេញ ជាបញ្ហាមួយយូរមកហើយ។ វាពិតជាលំបាកណាស់ក្នុងការធ្វើដំណើរទៅណាម្តងៗ”។ មានិត