អង្គការមិនមែនរដ្ឋាភិបាលផ្នែកកសិកម្មអន្តរជាតិមួយ កំពុងរៀបចំបញ្ចេញគម្រោងមួយទូទាំងប្រទេស ក្នុងភាពជាដៃគូជាមួយក្រុមហ៊ុនផលិតឈិបកំព្យូទ័រ Intel ដែលធ្វើឲ្យកសិករជាង២៥.០០០នាក់នឹងអាចទទួលការណែនាំតាមកាលៈទេសៈផ្ទាល់អំពីវិធីធ្វើស្រែតាមរយៈកម្មវិធីស្មាតហ្វូន (Smartphone App)។
មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) បានធ្វើគម្រោងសាកល្បងនេះកាលពីសប្តាស៍មុននៅខេត្តកណ្តាល ដែលកសិករបានពិនិត្យស្រែរបស់ខ្លួន និងបានបញ្ចូលទិន្នន័យក្នុងទូរស័ព្ទ។ ក្រោយពីធ្វើការវិភាគព័ត៌មាននោះ កម្មវិធីទូរស័ព្ទនេះបញ្ចូនព័ត៌មានមកវិញអំពីវិធីធ្វើស្រែល្អប្រសើរដែលអាចផ្តល់ទិន្នផលខ្ពស់។
គម្រោងនេះជាដំបូងនឹងត្រូវណែនាំដល់កសិករនៅខេត្តកណ្តាល កំពត តាកែវ ព្រៃវែង និងខេត្តស្វាយរៀង ដោយមានការគាំទ្រពីបុគ្គលិកកសិកម្មដល់មូលដ្ឋាន១០០នាក់ ហើយប្រសិនបើមានជោគជ័យ កម្មវិធីនេះនឹងត្រូវពង្រីកដល់ខេត្តផ្សេងទៀត។
លោក ម៉េង សត្តិភូសិទ្ធ មន្ត្រីតំណាងរបស់អង្គការ IFAD នៅកម្ពុជា បានមានប្រសាសន៍ថា ការឆ្លើយតបនៅខេត្តកណ្តាលគឺវិជ្ជមាន ដោយកម្មវិធីស្មាតហ្វូនផ្តល់ចម្លើយពីអ្វីគ្រប់យ៉ាងពីប្រភេទដីដែលកសិករគួរប្រើដើម្បីព្យាបាលជំងឺដំណាំ។
ជាដំបូង អង្គការ IFAD នឹងផ្តល់ទូរស័ព្ទស្មាតហ្វូនដល់មន្ត្រីផ្សព្វផ្សាយកសិកម្មដែលនឹងទទួលបានការបណ្តុះបណ្តាលដើម្បីឆ្លើយតបទៅនឹងចម្ងល់របស់កសិករ។
លោក សត្តិភូសិទ្ធ បានមានប្រសាសន៍ថា “គម្រោងនេះនឹងជ្រើសរើសមន្ត្រីផ្សព្វផ្សាយកសិកម្មក្នុងចំណោមកសិករ អ្នករកស៊ី និងមន្ត្រីមូលដ្ឋាន ដែលធ្វើការក្នុងវិស័យអង្ករមកបណ្តុះបណ្តាលឲ្យធ្វើជាមន្ត្រីផ្សព្វផ្សាយកសិកម្ម”។
លោកបានបន្តទៀតថា “ដំបូងយើងនឹងទិញទូរស័ព្ទឲ្យពួកគាត់ប្រើ ប៉ុន្តែក្រោយមកពួកគាត់ត្រូវទិញដោយខ្លួនឯង ដោយប្រើមូលនិធិទទួលបានពីការបង់ថ្លៃសមាជិកភាព”។
លោកបានបញ្ជាក់ថា កសិករដែលចង់ចូលរួមក្នុងគម្រោងនេះនឹងត្រូវតម្រូវឲ្យបង់ប្រាក់ប្រហែល៤០.000រៀលក្នុង១ឆ្នាំដើម្បីចូលជាសមាជិក។
លោក នូ គម កសិករនៅខេត្តព្រៃវែង បានលើកឡើងថា ចំនួនទឹកប្រាក់នេះសមរម្យសម្រាប់លោក ពីព្រោះវាអាចជួយផ្តល់ព័ត៌មានក្នុងការកម្ចាត់សត្វល្អិត ដែលនាំឲ្យទិន្នផលរបស់លោកថយចុះ។
លោក នូ គម បានមានប្រសាសន៍ថា “បញ្ហាសំខាន់គឺនៅត្រង់ថា សត្វចង្រៃដូចជា ខ្យងក្រហម និងសត្វល្អិត វាទៅបំផ្លាញដំណាំ ហើយធ្វើឲ្យចុងស្រូវដែលមានពណ៌បៃតងចាស់ ក្លាយជាពណ៌លឿងវិញ។ ដូច្នេះ យើងត្រូវព្យាបាលដំណាំនេះ ប៉ុន្តែមានប្រជាជនតិចណាស់ដែលដឹងពីរបៀបព្យាបាល ហើយក៏មិនសូវមានសកម្មភាពផ្សព្វផ្សាយបានទូលំទូលាយដែរពីសំណាក់មន្ត្រីរដ្ឋ និងក្រុមហ៊ុនឯកជន”។
លោកបានមានប្រសាសន៍បន្ថែមទៀតថា “បច្ចេកវិជ្ជាបែបនេះនឹងជួយកាត់បន្ថយពេលវេលាក្នុងការដោះស្រាយបញ្ហា និងផ្តល់ទិន្នផលខ្ពស់ជាងមុន”៕មានិត