កាលពីព្រឹកម្សិលមិញ នគរបាលខេត្តរតនគិរីបានលើកឡើងថា ពួកគេបានឃាត់ខ្លួនជនជាតិវៀតណាមយ៉ាងតិចបីនាក់ ដែលរស់នៅក្នុងប្រទេសកម្ពុជាដោយខុសច្បាប់ ប៉ុន្មានថ្ងៃបន្ទាប់ពីជនជាតិវៀតណាមប្រាំមួយនាក់ត្រូវបាននិរទេសទៅប្រទេសវៀតណាមវិញដោយសារការបន្តធ្វើជំរឿនលើជនបរទេសរបស់ក្រសួងមហាផ្ទៃ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា ជំរឿនដែលក្រុមមន្ត្រីបានលើកឡើងថា នឹងកាន់តែទូលំទូលាយ ហើយធំជាងអ្វីដែលយើងបានធ្វើពីមុននោះ នៅពេលឆាប់ៗនេះនឹងផ្ដោតលើជនបរទេសដែលមិនមែនជាជនជាតិវៀតណាម។
ក្រសួងមហាផ្ទៃបានបង្កើតអគ្គនាយកដ្ឋានអន្តោប្រវេសន៍កាលពីខែមករា ហើយបានដាក់លោក សុខ ផល ដែលពេលនោះជាអគ្គស្នងការរងនគរបាលជាតិឲ្យទទួលបន្ទុក។ ចាប់តាំងពីពេលនោះមក អគ្គនាយកដ្ឋាននេះបានសន្យាអនុវត្តច្បាប់អន្តោប្រវេសន៍ដែលមានស្រាប់ឲ្យបានល្អប្រសើរ។
នៅក្នុងខេត្តរតនគិរី លោក ជា ប៊ុនធឿន ស្នងការរងនគរបាលខេត្តបានមានប្រសាសន៍ថា អាជ្ញាធរបានរកឃើញជនជាតិវៀតណាមតែ១៩០គ្រួសារប៉ុណ្ណោះរស់នៅក្នុងខេត្តនេះកាលពីពីរសប្ដាហ៍កន្លងមក បើប្រៀបធៀបទៅនឹងជនជាតិវៀតណាមប្រហែល៣០០គ្រួសារអំឡុងការធ្វើជំរឿនកន្លងមកកាលពីឆ្នាំ២០១២។
លោកបានមានប្រសាសន៍ថា ជនអន្តោប្រវេសន៍ខុសច្បាប់ប្រាំមួយនាក់ត្រូវបានបញ្ជូនទៅប្រទេសរបស់ខ្លួនវិញកាលពីថ្ងៃទី២៩ ខែសីហា ហើយពីរបីនាក់ទៀតត្រូវបានឃុំខ្លួនកាលពីម្សិលមិញ។
លោក ប៊ុនធឿន បានមានប្រសាសន៍ថា ” យើងបានរកឃើញជនជាតិវៀតណាមបីទៅបួននាក់ទៀត ដែលទើបតែបានមករស់នៅទីនេះដោយខុសច្បាប់ប្រហែលកន្លះខែទៅមួយខែប៉ុណ្ណោះ បន្ទាប់ពីយើងបាននិរទេសជនជាតិវៀតណាមប្រាំមួយនាក់ទៅប្រទេសវៀតណាមវិញ។ ឥឡូវនេះ នគរបាលជំនាញរបស់យើងកំពុងសាកសួរពួកគេ”។
លោក ប៊ុនធឿន បានមានប្រសាសន៍ថា ការធ្វើជំរឿនបានរកឃើញថា ជនបរទេសភាគច្រើនដែលរស់នៅក្នុងខេត្តនេះ គឺជនជាតិវៀតណាម ប៉ុន្តែក៏មានជនជាតិឥណ្ឌា និងជនជាតិអាមេរិកដែរដែលធ្វើឲ្យចំនួនជនបរទេសមានច្រើន។
លោកបានមានប្រសាសន៍ថា “ប្រហែល៧០ទៅ៨០ភាគរយ គឺជាជនជាតិវៀតណាម។ មានជនជាតិវៀតណាមប្រហែល៦០០នាក់រស់នៅក្នុងខេត្តរតនគិរី”។
ឧត្តមសេនីយ៍ ខៀវ សុភ័គ បានមានប្រសាសន៍ថា ការធ្វើជំរឿនដែលកាលពីសប្ដាហ៍មុនក៏ឃើញមានការប្រគល់ប័ណ្ណអន្តោប្រវេសន៍ផ្លូវការដល់ជនជាតិវៀតណាម ដែលគ្មានឯកសារជាង១០០នាក់នៅក្នុងខេត្តកណ្ដាលផងដែរនោះ នៅពេលឆាប់ៗនេះនឹងពង្រីកទៅលើជនបរទេសផ្សេងទៀត ដែលមិនមែនជាជនជាតិវៀតណាម។
ឧត្តមសេនីយ៍ ខៀវ សុភ័គ បានប្រាប់អ្នកយកព័ត៌មានបរទេសតាមទូរស័ព្ទថា ” នៅពេលក្រោយអ្នកនឹងឃើញធ្វើនៅក្នុងរាជធានីភ្នំពេញ។ ឥឡូវនេះធ្វើតែលើជនជាតិវៀតណាមប៉ុណ្ណោះ ប៉ុន្តែបន្ទាប់មកធ្វើលើជនបរទេសផ្សេងទៀត។ មានផ្ទៃដីច្រើនណាស់ដែលប្រទេសកម្ពុជាត្រូវគ្របដណ្ដប់…។ វានឹងជាពេលវេលារបស់លោកអ្នក សូមកុំព្រួយ”។
អ្នកនាំាពាក្យរូបនេះបានមានប្រសាសន៍ថា អ្នកប្រមូលទិន្នន័យជំរឿនមានភារកិច្ចប្រមូលព័ត៌មានអំពីជនបរទេស។
លោកបានមានប្រសាសន៍ថា ” ទិន្នន័យទាំងអស់ដែលទាក់ទងទៅនឹងប្រជាជន គឺឈ្មោះ ថ្ងៃខែឆ្នាំកំណើត ទីកន្លែងកំណើត ឈ្មោះឪពុកម្ដាយ ប្រវត្តិរូបសង្ខេប កន្លែងដែលពួកគេធ្វើដំណើរមក តាមមធ្យោបាយណាជាដើម ទាំងអស់នេះគឺជាព័ត៌មាន”។
លោក មុំ ស៊ីថា នាយនគរបាលអន្តោប្រវេសន៍រាជធានីភ្នំពេញបានមានប្រសាសន៍ថា អាជ្ញាធរកំពុងរៀបចំធ្វើជំរឿននៅក្នុងរាជធានី ហើយអាចចាប់ផ្ដើមប្រមូលទិន្នន័យនៅដើមសប្ដាហ៍ក្រោយ។
ជំរឿនក៏កំពុងដំណើរការធ្វើនៅក្នុងខេត្តពោធិ៍សាត់ផងដែរ កន្លែងដែលមានជនជាតិវៀតណាមមួយចំនួនធំរស់នៅក្នុងភូមិនានាលើបឹងទន្លេសាប។
លោក បាន ហេង ស្នងការរងនគរបាលខេត្តបានមានប្រសាសន៍ថា រហូតមកទល់ពេលនេះ ការធ្វើជំរឿនមិនទាន់បានពង្រីកហួសក្រុងពោធិ៍សាត់ ស្រុកបាកាន និងស្រុកកណ្ដៀងស្ថិតនៅតាមបឹងទន្លេសាបនៅឡើយទេ ។
លោកបានមានប្រសាសន៍ថា “ខ្ញុំមិនអាចប្រាប់លទ្ធផលជំរឿនដល់អ្នកបានទេ ពីព្រោះយើងមិនទាន់បានបូកសរុបនៅឡើយ។ មិនមានបញ្ហាទាក់ទងការធ្វើជំរឿនទេ អ្វីៗប្រព្រឹត្តទៅតាមធម្មតា”។
លោក ប្រាក់ វុទ្ធី ស្នងការនគរបាលខេត្តកំពង់ឆ្នាំង បានបដិសេធមិននិយាយថា តើការធ្វើជំរឿនបានចាប់ផ្ដើមនៅក្នុងខេត្តរបស់លោក ដែលមានជនជាតិវៀតណាមមួយចំនួនធំរស់នៅតាមបឹងទន្លេសាបឬយ៉ាងណាឡើយ ។
លោក តុប សុវណ្ណ ស្នងការរងនគរបាលខេត្តកណ្ដាលបានមានប្រសាសន៍ថា ការធ្វើជំរឿនមិនទាន់បានចាប់ផ្ដើមនៅក្នុងដែនសមត្ថកិច្ចរបស់លោកទេ ប៉ុន្តែលិខិតស្នាក់នៅចំនួន១០០ត្រូវបានចែកកាលពីសប្ដាហ៍មុន។
លោក សុវណ្ណ បានមានប្រសាសន៍ថា លិខិតនោះដែលមានសុពលភាពពីរឆ្នាំ ត្រូវបានផ្ដល់ឲ្យជនជាតិវៀតណាមដែលបានកំណត់អត្តសញ្ញាណអំឡុងការធ្វើជំរឿនឆ្នាំ២០១២។
លោកឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ បានមានប្រសាសន៍ថា លោកមិននៅក្នុងប្រទេសទេ ប៉ុន្តែនឹងផ្ដល់ព័ត៌មានលម្អិតបន្ថែមទៀតថា តើជំរឿននេះត្រូវធ្វើដូចម្ដេចនោះ បន្ទាប់ពីលោកត្រឡប់មកវិញនៅចុងសប្ដាហ៍នេះ៕ សារុន
(រាយការណ៍បន្ថែមដោយ AlexWillemyns)