ក្រុមមន្ត្រីបាននិយាយថា នគរបាលបានចាប់ខ្លួនបុរសជនជាតិថៃពីរនាក់ ដែលប្រដាប់ដោយកាំភ្លើងច្នៃ និងគ្រាប់កង់សម្រាប់បាញ់សត្វជាង២០០គ្រាប់កាលពីព្រឹកម្សិលមិញ នៅក្នុងខេត្តព្រះវិហារ បន្ទាប់ពីទាហានកម្ពុជាបានឃើញពួកគេបាញ់សត្វដោយខុសច្បាប់។
លោក ឈួ ប៊ុនសុង មេបញ្ជាការកងរាជអាវុធហត្ថស្រុកជាំក្សាន្តបានមានប្រសាសន៍ថា ទាហានកម្ពុជាបានឃើញ ស៊ិន ឡា អាយុ៥៧ឆ្នាំ និង ហាក់ វិន អាយុ៣៤ឆ្នាំ កំពុងបាញ់សត្វព្រៃចម្ងាយ១គីឡូម៉ែត្រពីព្រំដែនកម្ពុជា-ថៃក្នុងឃុំជាំក្សាន្ត ស្រុកជាំក្សាន្ត កាលពីម្សិលមិញ ប៉ុន្តែពួកគេទាំងពីរនាក់អាចរត់គេចខ្លួនមុនពេលត្រូវបានចាប់ខ្លួនដោយកងរាជអាវុធហត្ថកម្ពុជា។
លោកវរសេនីយ៍ត្រី ប៊ុនសុង បានមានប្រសាសន៍ថា ” វាមិនមែនជាលើកទី១ទេ ដែលកម្លាំងរបស់យើងបានចាប់ខ្លួនអ្នកភូមិជនជាតិថៃ ដែលបានបរបាញ់សត្វ និងរកបន្លែព្រៃក្នុងទឹកដីកម្ពុជា”។
បន្ទាប់ពីការចាប់ខ្លួន នគរបាលបានរកឃើញ បុរសទាំងពីរនាក់នេះមានកំាភ្លើងច្នៃពីរដើម គ្រាប់កង់សម្រាប់បាញ់សត្វ២០០គ្រាប់ គ្រាប់ប្រាយ៣៧គ្រាប់ និងគ្រាប់រំសេវកន្លះដប។ លោក ប៊ុនសុង បានបន្ថែមថា លោកបានបញ្ជូនបុរសទាំងពីរនាក់នេះទៅនគរបាលអន្តោប្រវេសន៍ក្នុងស្រុកជាំក្សាន្ត។
លោក ជា គឹមសេង អភិបាលស្រុកជាំក្សាន្តបានមានប្រសាសន៍កាលពីម្សិលមិញថា នៅពេលមេបញ្ជាការកងយោធពលខេមរភូមិន្ទឈរជើងនៅប្រាសាទព្រះវិហារបានអះអាងថា បុរសទាំងពីរនាក់នេះមិនមែនជាទាហានថៃឬចារកម្មថៃឡើយ ហើយលោកបានរៀបចំបញ្ជូនពួកគេទៅប្រទេសថៃវិញនៅថ្ងៃនេះ៕ សារុន