30 C
Phnom Penh

អ្នកទោស​ប្រាំមួយនាក់​លួច​រត់ចេញរួចពី​ពន្ធនាគារខេត្ត​រតនគិរី តែ​ម្នាក់ទៀតចាប់បាន​វិញ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា អ្នក​ទោស​​ប្រាំមួយ​នាក់​បាន​លួច​រត់​ចេញ​ពី​ពន្ធនាគារ​ខេត្ត​រតន​គិរី​នៅព្រឹកព្រលឹម​ស្រាងៗ​កាលពី​ម្សិលមិញ ចំណែក​ឯ​អ្នក​ទោស​ទី៧​ម្នាក់​ទៀត​ត្រូវ​បាន​មន្ត្រី​ពន្ធនាគារ​ចាប់បាន​​នៅ​នាទី​ចុង​ក្រោយ​។

ឆាយ ធី
ថតដោយលោក ឆាយ ធី​ អ្នកសម្របសម្រួលអង្គការសិទ្ធិមនុស្សប្រចាំខេត្តរតនគីរី

លោក ទិត សាឃឿន ស្នង​ការ​រង​នគរ​បាល​ខេត្ត​ទទួល​បន្ទុក​​ព្រហ្មទណ្ឌ​កម្រិត​ធ្ងន់​បាន​មាន​ប្រសាសន៍​ថា អ្នក​ទោស​ទាំង​នោះ​បាន​ប្រើ​រណាអារដែកអារ​ចម្រឹង​​បង្អួច​ និង​ដែក​កាប់​កាត់​​របង​លួស​បន្លា​ព័ទ្ធជុំវិញ​បរិវេណ​ពន្ធនាគារ​។

លោក សាឃឿន​ បាន​មាន​ប្រសាសន៍​ថា ឆ្មាំ​ពន្ធនាគារ​ទើបតែ​ដឹង​ពី​ការ​ព្យាយាម​លួច​រត់​នេះ​នៅ​ម៉ោង​ប្រហែល​៣ទៀប​ភ្លឺ​ប៉ុណ្ណោះ ប៉ុន្តែ​​​អាច​ចាប់​បានតែ​ វ៉ន​ ប្រុស ជា​អ្នកទោសទី​៧ និង​ជា​អ្នក​ចុង​ក្រោយ​ដែល​បាន​ដល់រូង​ដែល​បាន​ជីកខាងក្រោម​​របង​ប៉ុណ្ណោះ។

ដោយ​បាន​ចេញ​ឈ្មោះ​អ្នកទោសដែលបាន​​លួច​​រត់​រួច​ដោយ​ជោគជ័យគឺមាន​ឈ្មោះ ចាន់ សារ៉ស់ ស៊ី ណយ អ៊ុក ចន្ធូ លឹម ស៊ីថា ឡាស់ សារ៉េត ​និង​ អ៊ុន សុភាព នោះលោក សាឃឿន បាន​មាន​ប្រសាសន៍​ថា​ ” អ្នក​ទោស​ម្នាក់​ត្រូវចាប់​​បាន​វិញ​នៅ​ពេល​អ្នក​ទោស​រូបនេះ​បានព្យាយាម​លូន​ក្រោម​របង​លួស​បន្លា” ។

លោក សាឃឿន ​បាន​មាន​ប្រសាសន៍​ថា ឧបករណ៍ដែល​ប្រើ​ក្នុង​ការ​លួច​រត់​នេះ​មិន​មែនមក​ពី​ក្នុង​ពន្ធនាគារ​ទេ។ លោក​បាន​មាន​ប្រសាសន៍​ថា “យើង​រកឃើញដែក​កាប់​​តូច​មួយ​គូ​ និងរណាអារដែកបី​​។ យើង​មិន​ដឹង​ថា ឧបករណ៍​ទាំង​នេះ​បាន​មក​ពី​ណា​ទេ​”។

យោង​តាម​លោក ម៉ម វណ្ណដា ព្រះរាជអាជ្ញា​រង​អម​សាលា​ដំបូង​ខេត្ត​រតនគិរី​បាន​ឲ្យ​ដឹង​ថា អ្នក​ទោស​ប្រាំមួយ​នាក់​នេះកំពុង​​អនុវត្ត​ទោស​​ព្រហ្មទណ្ឌ​រួម​មាន អំពើ​ប្លន់ ការ​ជួញដូរ​ថ្នាំ​ញៀន និង​អំពើហិង្សា​ដោយ​ចេតនា។

លោក វណ្ណដា បាន​មាន​ប្រសាសន៍​ថា ” ខ្ញុំ​បាន​ចេញ​ដីកា​ចាប់​ខ្លួ​​ន​ពួកគេ​។ យើង​បាន​ជូន​ដំណឹង​ដល់​អាជ្ញាធរ​នៅ​ក្នុង​ស្រុក​ចំនួន​ប្រាំបួន”។

លោក ទិន​ សុវណ្ណី ប្រធាន​ពន្ធនាគារ​បាន​មាន​ប្រសាសន៍​ថា បន្ទាប់ពី​ការ​សាកសួរ​អ្នក​ទោស​ឈ្មោះ វ៉ន ប្រុស ជននេះ​បាន​និយាយ​ថា ក្រុម​នេះមាន​ជំនួយ​ពី​អ្នក​ខាងក្រៅ​ពន្ធ​នាគារ ដោយ​លើក​ឡើង​ថា មាន​គេគប់​ឧបករណ៍​ទាំង​នេះ​រំលង​របង​ខាង​ក្រៅ​ ដែល​មាន​កម្ពស់​ប្រហែល​៣ម៉ែត្រ។

ប៉ុន្តែ​បើ​តាម​លោក ឆាយ ធី អ្នក​សម្រប​សម្រួល​​អង្គការ​សិទ្ធិ​មនុស្ស​ប្រចាំ​ខេត្ត​នេះ​ ដែល​បាន​ចុះ​ទៅ​មើល​កន្លែង​ឃុំ​ឃាំង​នេះ​កាលពី​ម្សិលមិញបាន​ឲ្យដឹងថា លោក សុវណ្ណី បាន​បដិសេធ​មិន​ធ្វើ​អត្ថាធិប្បាយ​បន្ថែម​ទេ ហើយ​ប្រធាន​ពន្ធនាគារ​នេះអះអាង​ថា ខ្លួន​លោក​​បាន​រារាំង​ការ​លួច​រត់​របស់​អ្នក​ទោស​ឈ្មោះ ប្រុស នេះ។

លោក ឆាយ ធី បាន​មាន​ប្រសាសន៍​ថា ប្រធាន​ពន្ធនាគារ​បាន​លើក​ឡើង​ថា ខ្លួន​គាត​់​ផ្ទាល់​បាន​រត់ទៅ​ចាប់​​អ្នក​ទោស​ចុង​ក្រោយ​ដែល​បាន​ព្យាយាម​រត់នេះបាន​ ហើយ​បាន​ស្រែក​ឲ្យ​មន្ត្រី​ពន្ធនាគារ​មក​​អន្តរាគមន៍​ភ្លាម ពីព្រោះ​លោក​អាច​ចាប់​បាន​តែ​អ្នក​ទោស​ម្នាក់​ប៉ុណ្ណោះ​”។

ប្រព័ន្ធ​ផ្សព្វផ្សាយ​ក្នុង​ស្រុក​ក៏​បាន​រាយការណ៍​ពីការ​រៀបរាប់​ហេតុការណ៍​នោះរបស់​លោក សុវណ្ណី ផង​ដែរ​។

អ្នកទោស​បួននាក់​បាន​លួច​រត់ចេញ​ពីពន្ធនាគារ​ខេត្ត​រតនគិរី​នេះ​តាម​របៀប​ស្រដៀង​គ្នា​នេះ​កាលពី​ខែ​វិច្ឆិកា ឆ្នាំ​មុន ដោយបាន​កាត់​លួស​បន្លា​ ហើយ​លួច​រត់​។ លោក សាឃឿន បាន​មាន​ប្រសាសន៍​ថា ទី​បំផុត​ពួកគេ​ត្រូវ​ចាប់​បាន​ ហើយ​បញ្ជូន​​ទៅ​ពន្ធនាគារវិញ​។

យោង​តាម​មាត្រា ៥៦១ នៃ​ក្រមព្រហ្មទណ្ឌ អំពើលួច​រត់​ត្រូវ​ផ្ដន្ទាទោស​ដាក់​ពន្ធនាគារ​ពី​១ឆ្នាំ ទៅ​៣ឆ្នាំ និង​ពិន័យ​ជា​ប្រាក់​ពី​៥០០ដុល្លារ ទៅ​១.៥០០​ដុល្លារ​៕ សារុន​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស