ក្រុមមន្ត្រីបានឲ្យដឹងកាលពីម្សិលមិញថា អ្នកទោសម្នាក់ដែលបានលួចរត់ចេញជាមួយអ្នកទោសប្រាំនាក់ទៀតពីពន្ធនាគារខេត្តរតនគិរីកាលពីសប្ដាហ៍មុននោះ ត្រូវនគរបាលចាប់បានវិញនៅក្នុងខេត្តក្រចេះកាលពីថ្ងៃសុក្រ។
លោក ទិត្យ សាឃឿន ស្នងការរងនគរបាលខេត្តរតនគិរីទទួលបន្ទុកព្រហ្មទណ្ឌកម្រិតធ្ងន់បានមានប្រសាសន៍ថា នគរបាលទទួលបានតម្រុយកាលពីថ្ងៃសុក្រថា អ្នកទោសម្នាក់ក្នុងចំណោមអ្នកទោសទាំងនោះគឺឈ្មោះ ស៊ី ណយ អាយុ៣៥ឆ្នាំបានស្នាក់នៅផ្ទះសំណាក់មួយក្នុងស្រុកឆ្លូង ខេត្តក្រចេះ។
លោកបានមានប្រសាសន៍ថា ” យើងមានបណ្ដាញផ្ដល់ព័ត៌មានដែលធ្វើឲ្យយើងឈានទៅចាត់វិធានការនេះ”។
លោក សាឃឿន បានបន្ថែមថា នាយកដ្ឋានរបស់លោកបានសហការជាមួយនគរបាលខេត្តក្រចេះ ដែលបានចាប់ខ្លួនអ្នកទោសឈ្មោះ ស៊ី ណយ នៅម៉ោង១០យប់ក្នុងព្រះសំណាក់ហាន់ជ័យ៤ស្ថិតក្នុងឃុំហាន់ជ័យ។
អ្នកទោសទាំងប្រាំមួយនាក់នេះបានលួចរត់កាលពីថ្ងៃព្រហស្បតិ៍នៅវេលាព្រឹកព្រលឹមស្រាងៗ ដោយពួកគេប្រើរណាអារដែកអាររបាដែកបង្អួចបន្ទប់ឃុំខ្លួនរបស់ពួកគេ និងដង្កាប់ ដើម្បីកាត់របងលួសបន្លាដែលព័ទ្ធជុំវិញបរិវេណពន្ធនាគារនោះ។
អ្នកទោសប្រាំនាក់ទៀតដែលកំពុងរត់គេចខ្លួននៅឡើយគឺឈ្មោះ ចាន់ សារ៉ស់ អ៊ុក ចន្ធូ លឹម ស៊ីថា ឡាស់ សារ៉េត និង អ៊ុន សុភាព។ អ្នកទោសទី៧ឈ្មោះ វ៉ន ប្រុស ត្រូវមន្ត្រីពន្ធនាគារម្នាក់ចាប់បានអំឡុងពេលលួចរត់ចេញនោះ។
បន្ទាប់ពីសាកសួរអ្នកទោសដែលចាប់បានវិញនេះ លោក សាឃឿន បានមានប្រសាសន៍ថា នគរបាលបានកំណត់ថា ឈ្មោះ សារ៉ស់ ដែលកំពុងអនុវត្តទោសពីបទប្លន់នោះ ជាមេគំនិតនៃផែនការលួចរត់នេះ។
លោកបានបន្ថែមថា នគរបាលមិនទាន់ដឹងថា តើអ្នកទោសទាំងនេះបានរណាអារដែក និងដង្កាប់តាមវិធីណាឡើយ។
លោក សាឃឿន បានមានប្រសាសន៍ថា ” វាអាចថា ពួកគេបានឧបករណ៍ទាំងនេះពីខាងក្រៅមក ពីព្រោះពួកគេបានទាក់ទងជាមួយអ្នកដទៃនៅខាងក្រៅ”។ លោកបានបន្ថែមថា អ្នកទោសមានសិទ្ធិនិយាយទូរស័ព្ទទាក់ទងទៅសាច់ញាតិ។
យោងតាមលោក ទិន សុវណ្ណី ប្រធានពន្ធនាគារបានឲ្យដឹងថា អ្នកទោសឈ្មោះ ស៊ី ណយ ដែលត្រូវបានចាប់ខ្លួនកាលពីខែកញ្ញាពីបទជួញដូរគ្រឿងញៀននោះ ត្រូវបានបញ្ជូនទៅពន្ធនាគារខេត្តរតនគិរីវិញហើយ៕ សារុន