មន្ត្រីតុលាការបានឲ្យដឹងថា កាលពីម្សិលមិញ សាលាដំបូងខេត្តកំពង់ចាមបានចោទប្រកាន់មន្ត្រីសហជីពម្នាក់ កម្មកររោងចក្រចំនួនពីរនាក់ និងអ្នកបើករថយន្តចំនួនពីរនាក់ពីបទបង្កអំពើហិង្សា និងបំផ្លិចបំផ្លាញទ្រព្យសម្បត្តិដោយសារពួកគេចូលរួមនៅក្នុងការតវ៉ាមួយដែលប្រែក្លាយជាអំពើហិង្សាកាលពីថ្ងៃសៅរ៍ នៅរោងចក្រស្បែកជើង Juhui។
លោក ហាក់ តាំងប៊ុន ក្រឡាបញ្ជីរបស់ចៅក្រមសើុបសួរ ប៉ុក សុវណ្ណមុនី បានបញ្ជាក់ថា ជនសង្ស័យទាំងនោះរួមមានដូចជា ឃុន សុខុម អាយុ៣១ឆ្នាំជាមន្ត្រីម្នាក់នៅសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (សីុខៅឌូ) ម៉ុន សារ៉ែម អាយុ២៩ឆ្នាំជាកម្មករដែលគេបណ្តេញចេញពីការងារ និងជាអតីតតំណាងសហជីពនៅរោងចក្រ និង បៀន សារីម អាយុ៣៥ឆ្នាំ ជាកម្មករដែលគេបណ្តេញចេញពីការងារម្នាក់ផ្សេងទៀត។មនុស្សដែលក៏ត្រូវបានចោទប្រកាន់ដែរនោះ គឺ នេត ពិសី អាយុ២២ឆ្នាំ និង កង សាវុធ អាយុ២៤ឆ្នាំជាអ្នកបើករថយន្តដែលដឹកកម្មកររោងចក្រ។
លោក តាំងប៊ុន បានមានប្រសាសន៍ថា “តុលាការបានចោទប្រកាន់ពួកគេទាំងអស់។ យើងបានបញ្ជូនពួកគេទៅឃុំខ្លួនជាបណ្តោះអាសន្ននៅពន្ធនាគារខេត្តនៅរសៀលនេះ”។
នៅខាងក្រៅរោងចក្រកាលពីម្សិលមិញ កម្មករប្រមាណ៤០០នាក់ដែលជាចំនួនមួយក្នុងចំណោមកម្មករប្រមាណ៥.០០០នាក់ដែលបានបន្តធ្វើកូដកម្មកាលពីខែមុន ដើម្បីទាមទារដំឡើងប្រាក់ខែ និងលក្ខខណ្ឌការងារល្អ បានធ្វើពិធីសាសនាមួយដើម្បីតវ៉ាប្រឆាំងនឹងការចាប់ខ្លួនមនុស្សទាំង១០នាក់ដែលរួមទាំងមនុស្សចំនួនប្រាំនាក់ដែលត្រូវបានដោះលែងវិញកាលពីថ្ងៃច័ន្ទផងដែរ។
លោក ប៊ុត ប៊ុនឈាន តំណាងសហជីពបាននិយាយថា “យើងបាននិមន្តព្រះសង្ឃមកប្រោះព្រំដើម្បីបណ្តេញឧបទ្រពចង្រៃចេញពីមនុស្សទាំងប្រាំនាក់ ដែលត្រូវដោះលែងកាលពីម្សិលមិញ និងដើម្បីបួងសួងឲ្យមានការដោះលែងមនុស្សចំនួនប្រាំនាក់ផ្សេងទៀតដែលអាជ្ញាធរកំពុងឃុំខ្លួននៅឡើយ។ យើងចង់បង្ហាញឲ្យអាជ្ញាធរឃើញថា យើងមិនបានបង្កអំពើហិង្សាទេ”។
ប៉ុន្តែ នគរបាលបានលើកឡើងថា ខ្លួនកំពុងតាមចាប់ខ្លួនសមាជិកសហជីពផ្សេងៗទៀតដោយសារការពាក់ព័ន្ធរបស់ពួកគេនៅក្នុងការប៉ះទង្គិចគ្នាកាលពីថ្ងៃសៅរ៍ ដែលបណ្តាលឲ្យកម្មកររាប់សិបនាក់រងរបួស នៅពេលអំពើហិង្សាបានផ្ទុះឡើង បន្ទាប់ពីមន្ត្រីនគរបាលបានព្យាយាមបំបែកការតវ៉ានៅខាងក្រៅរោងចក្រ។
លោក សាន សុភា នាយនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា “យើងកំពុងតាមចាប់ខ្លួនមនុស្សបន្ថែមទៀតដែលពាក់ព័ន្ធនៅក្នុងករណីនេះរួមមានដូចជាអ្នកធ្វើឲ្យមានការផ្ទុះអំពើហិង្សា និងជនល្មើសជាដើម”។
លោក ហិុត ហ៊ុន តំណាងសហជីពមួយរូបដែលនគរបាលកំពុងតាមចាប់ខ្លួនបានឲ្យដឹងថា ឥឡូវនេះគាត់កំពុងរត់គេចខ្លួន។ លោកបាននិយាយថា “ខ្ញុំព្រួយបារម្ភអំពីសុវត្ថិភាពរបស់ខ្ញុំ។ ពួកគេបានចាប់ខ្លួនសមាជិកសហជីព ហើយកំពុងគំរាមកំហែង ដើម្បីបញ្ឈប់សកម្មភាពរបស់យើង។ យើងមិនអាចធ្វើអ្វីទៀតបានឡើយនៅពេលឥឡូវនេះ”៕ស៊ុយឈាង