លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិកាលពីម្សិលមិញបានចូលរួមពិធីកាន់ទុក្ខដើម្បីសម្ដែងការគោរពដល់លោក ចាន់ សុវ៉េត អ្នកតស៊ូមតិសិទ្ធិមនុស្ស ដែលបានស្លាប់ដោយគាំងបេះដូងកាលពីថ្ងៃពុធ។
ពិធីដង្ហែសពអ្នកស៊ើបអង្កេតជាន់ខ្ពស់ដែលបម្រើការងារយូរអង្វែងនៅអង្គការសិទ្ធិមនុស្សក្នុងស្រុកអាដហុករូបនេះ ចាប់ផ្ដើមនៅព្រឹកនេះនៅវត្តគល់ទទឹង ស្ថិតក្នុងខណ្ឌច្បារអំពៅ រាជធានីភ្នំពេញ ដែលមានការចូលរួមពីមិត្តភក្ដិ ក្រុមគ្រួសារ និងមិត្តរួមការងារដើម្បីលាជាចុងក្រោយចំពោះសកម្មជនរូបនេះ។ ដោយមកដល់នៅម៉ោង១១និង៣០នាទីព្រឹក លោក សម រង្ស៊ី និងលោក កឹម សុខា បានអុជធូបមុនពេលគោរពវិញ្ញាណក្ខន្ធសពលោក ចាន់ សុវ៉េត។
លោក សម រង្ស៊ី បានមានប្រសាសន៍បន្ទាប់ពីទៅចូលរួមពិធីថា “លោក ចាន់ សុវ៉េត បានការពារសិទ្ធិមនុស្ស ដើម្បីជួយជនរងគ្រោះ និងអ្នកដែលទទួលរងបញ្ហាគ្រប់ប្រភេទទាំងអស់។ បើទោះជានៅក្នុងខេត្តដាច់ស្រយាលក៏ដោយ ក៏យើងឃើញលោក ចាន់ សុវ៉េត ចុះជួយការពារប្រជាជនដែលរងគ្រោះដែរ ដូច្នេះគាត់ជាគំរូដ៏ល្អមួយសម្រាប់យើងទាំងអស់គ្នា”។
លោក កឹម សុខា ក៏បានសម្ដែងការកោតសរសើរផងដែរចំពោះអ្នកធ្វើយុទ្ធនាការរូបនេះ។ លោកបានមានប្រសាសន៍ថា “ការវិភាគរបស់គាត់ គឺត្រឹមត្រូវ ហើយសកម្មភាពរបស់គាត់ល្អណាស់ ជាពិសេសក្នុងការស៊ើបអង្កេត គាត់និយាយផ្អែកលើច្បាប់ដើម្បីការពារជនរងគ្រោះទាំងអស់”។ សពលោក ចាន់ សុវ៉េត នឹងត្រូវបូជានៅព្រឹកនេះ៕ សារុន