28 C
Phnom Penh

អង្គការ​ក្លូបលវីតណេស​ ភ្ជាប់​ឧកញ៉ាឈ្មួញឈើ​ ទ្រី ភាព ទៅ​​នឹង​​របរ​កាប់​ឈើខុស​ច្បាប់​​ដ៏ធំនៅ​កម្ពុជា​

ដោយ ឌឹ ខេមបូឌា ដេលី

បទវិភាគ

នៅ​ក្នុង​របាយការណ៍​ថ្មីមួយ​ អង្គការ​​​ក្លូបលវីតណេស (Global Witness) ដែល​ជា​អង្គការ​សិទ្ធិ​បរិស្ថាន​របស់​ចក្រភព​អង់គ្លេស ​បាន​ដាក់​​ឧកញ៉ា​ឈ្មួញឈើ​ ទ្រី ភាព ឲ្យ​ស្ថិត​នៅ​ចំកណ្ដាល​នៃ​ប្រតិបត្តិ​ការ​​កាប់​ឈើ​ខុស​ច្បាប់​ដ៏ធំ​ដោយ​មានការ​ឃុប​ឃិត​ជាមួយ​មន្ត្រី​រដ្ឋាភិបាល និង​មន្ត្រី​យោធា ដែល​ធ្វើ​ឲ្យ​ឈើ​កម្រ​ៗ​បំផុត​របស់​កម្ពុជា​ជិត​ផុត​ពូជ​។Front

របាយការណ៍​ដែល​មាន​ឈ្មោះ​ថា “តម្លៃ​ឈើ​ប្រណីត​៖ ការ​ជួញដូរ​ឈើ​មាន​តម្លៃ​ខុស​ច្បាប់​របស់​កម្ពុជា​ជាមួយប្រទេស​​ចិន​” (The Cost of Luxury: Cambodia’s illegal trade in precious wood with China) ដែល​ត្រូវ​បាន​ចេញ​ផ្សាយ​​កាលពី​ម្សិលមិញ​ រៀបរាប់​សង្ខេប​​អំពី​ការ​​ស៊ើបការណ៍​សម្ងាត់​រយៈ​ពេល​៨ខែ​កាលពី​ឆ្នាំ​មុន​ដោយ​អង្គការ​នេះ ដែល​អំឡុង​ពេល​នោះ​ក្រុម​អ្នកស្រាវ​ជ្រាវ​របស់ខ្លួន​បាន​តាម​ដាន​ក្រុម​កាប់​ឈើ​ និង​រថយន្ត​ដឹកឈើ​របស់​លោក​ ទ្រី ភាព នៅ​ទូទាំង​ប្រទេស​ បាន​សម្ភាស​​កម្មករ​របស់​គាត់ និង​ឈ្មួញកណ្ដាល​​ ហើយ​បាន​តាម​ដាន​ការ​ដឹកជញ្ជូន​ឈើ​របស់​គាត់​ទៅ​ដល់​​ក្រុងហុងកុង ដោយ​ប្រើ​ប្រាស់​ឯកសារ​គយ​ដែល​បែក​ធ្លាយ​។

លោកស្រី មេហ្គែន ម៉ាកខិននីស (Megan MacInnes) ប្រធាន​​ក្រុម​ការ​ងារ​ទទួល​បន្ទុក​ផ្នែក​ដីធ្លី​របស់អង្គការ​ក្លូបលវីតណេស ​បាន​លើក​ឡើង​នៅ​ក្នុង​របាយការណ៍​នេះ​ថា “អ្នក​ទិញ​គ្រែមាន​ដំបូល​ និង​តុសម្អាង​​ដែល​មាន​តម្លៃ​ថ្លៃ​ៗ​នៅ​ក្នុង​ប្រទេស​ចិន​​​ប្រហែល​ជាមិន​ដឹង​ថា ប្រាក់​របស់​ពួកគេ​ហូរ​ចូល​ក្នុង​ហោបា៉វ​របស់​​ក្រុម​​ទុច្ចរិត​រក​ស៊ី​ឈើ​ឡើយ​។ ទ្រី ភាព និង​បណ្ដាញ​របស់​គាត់​កំពុង​បំផ្លិច​បំផ្លាញ​ព្រៃ​ចុង​ក្រោយ​របស់​កម្ពុជា​ និង​​បំផ្លាញ​របរ​ចិញ្ចឹម​ជីវិត​របស់​សហគមន៍​​ជនជាតិ​ដើមភាគតិច​។ ទន្ទឹម​នឹង​នេះ​ មន្ត្រី​នៅ​កម្ពុជា​​ដែល​គួរ​តែ​បញ្ឈប់​សកម្មភាព​ពួកគេ បែរ​ជា​រួម​សមគំនិត​​​​ជាមួយ​ពួកគេ​ដើម្បី​ជួយ​ឲ្យ​ឈើ​គេច​ពន្ធ​​ឆ្លង​កាត់​ដោយ​សុវត្ថិភាព​ និង​​ត្រូវ​បាន​នាំចេញ​ជាឈើ​ស្រប​ច្បាប់​ទៅ​វិញ​”។

ក្នុង​នាម​ជា​អតីត​ទីប្រឹក្សា​របស់​លោក​នាយករដ្ឋមន្ត្រី ហ៊ុន សែន លោក ទ្រី ភាព ​ទទួល​បាន​សម្បទានដី​ និង​សម្បទាន​រ៉ែ​ជាច្រើន​នៅ​ទូទាំង​ប្រទេស​ ហើយ​គាត់​ត្រូវ​​បរិច្ចាគ​​ប្រាក់​យ៉ាង​ច្រើន​ជួយ​ដល់​មូលនិធិ​សប្បុរសធម៌​របស់​ភរិយា​លោក ហ៊ុន សែន​ និង​ក្រសួង​មួយ​ចំនួនដែល​ទទួល​បន្ទុក​ពិនិត្យ​តាម​ដាន​ប្រតិបត្តិការ​របស់​គាត់​។ គាត់​មាន​សិទ្ធិ​ផ្ដាច់​មុខ​ទិញយក​​ឈើ​ទាំង​អស់​ដែល​កាប់​នៅ​លើ​ដីសម្បទាន​ក្នុង​ខេត្ត​រតនគិរីភាគឦសាន និង​ឈើ​ខុស​ច្បាប់​ទាំង​អស់​​ដែល​អាជ្ញាធរ​រឹប​អូស​បាន​នៅទូទាំង​ប្រទេស​ ដោយ​ផ្ទុយ​នឹង​លក្ខខណ្ឌ​ច្បាប់​ដែល​ចែង​ថា ​ឈើ​ដែល​រឹប​អូស​បាន​​ត្រូវ​​​​ដាក់​ដេញ​ថ្លៃ​​ជា​សាធារណៈ​។

​របាយការណ៍​របស់​អង្គការ​​ក្លូបលវីតណេស​ បន្ថែម​ពី​លើ​ភ័ស្តុតាង​កាន់​តែ​ច្រើនឡើងៗ​​ក្នុង​រយៈ​ពេល​ប៉ុន្មាន​ឆ្នាំ​ថ្មីៗ​នេះ​ដែល​​បង្ហាញ​ថា លោក​ ទ្រី ភាព ទទួល​បាន​សិទ្ធិ​ទាំង​នេះ​​ដើម្បី​លាង​ឈើ​ខុស​ច្បាប់​​ក្នុង​ចំនួន​យ៉ាង​ច្រើន​ ​បំពាន​ច្បាប់​​ប្រទេស​​ និង​ដឹកជញ្ជូន​ឈើ​ទាំង​អស់​នោះ​ចេញ​ក្រៅ​ប្រទេស​ដោយ​ប្រើ​ប្រាស់​អាជ្ញាប័ណ្ណ​នាំចេញ​គួរ​ឲ្យ​សង្ស័យ​។

​ផ្លូវ​​ដឹកឈើ​​ដែល​ក្រុម​អ្នក​ស្រាវ​ជ្រាវ​របស់​អង្គការ​នេះ​​បាន​គូស​បង្ហាញ​នៅ​ក្នុង​របាយ​ការណ៍​នេះ គឺ​បញ្ចប់​ត្រឹម​ប្រទេស​ចិន ដោយ​នៅ​ទីនោះ​​​គ្រែ​ផលិត​​ពី​ឈើ​កម្រ​បំផុត​ ដែល​​ត្រូវ​បាន​ឆ្លាក់​ជា​​ក្បូរ​ក្បាច់​រចនា​យ៉ាង​ផ្ចិត​ផ្ចង់​ អាច​លក់​បាន​រហូត​ដល់​ទៅ​១លាន​ដុល្លារក្នុង​មួយគ្រឿង។ វា​ចាប់​ផ្ដើម​​នៅ​ក្នុង​ព្រៃ​ដាច់​ស្រយាល​នៃ​ឧទ្យាន​ជាតិ​វីរជ័យ ក្នុង​ខេត្ត​រតនគិរី​ ប្រទេស​កម្ពុជា។​

​អង្គការ​ក្លូបលវីតណេស​បាន​លើក​ឡើង​ថា នៅ​ទីនោះ​ក្រុម​ការ​ងារ​របស់​ខ្លួន​បាន​ចុះ​ទៅ​ដល់​ទីតាំង​កាប់​ឈើ​ខុស​ច្បាប់​ ហើយ​បាន​មើល​អ្នក​កាប់ឈើ​​កាប់​បំផ្លាញ​ឈើ​ដែល​មាន​តម្លៃ​បំផុត​​តាម​ប្រព័ន្ធ​ GPS។ ពួកគេ​​បាន​តាម​ដាន​រថយន្ត​​ដឹកឈើ​​ទាំង​នោះ​ទៅ​កាន់​ដេប៉ូ​ឈើ​នានា ដែល​ស្ថិត​ក្រោម​ការ​គ្រប់​គ្រង​របស់​ក្រុម​ហ៊ុន​ ទ្រី ភាព គ្រុប ដែល​ជា​ក្រុម​ហ៊ុន​មេ​នៃ​ក្រុម​ហ៊ុន​ផ្សេង​ៗ​ជាច្រើន​ទៀត​របស់​លោក ទ្រី ភាព រហូត​ទៅ​​ដល់​ដេប៉ូ​ឈើ​របស់​គាត់​នៅ​ក្នុង​ក្រុង​បានលុង និង​​បន្តពីនោះ​ទៅ​ដល់​ព្រំដែន​វៀតណាម​ ឬ​កំពង់ផែ​អន្តរជាតិ​​ក្រុង​ព្រះសីហនុ។

កម្រស្រប​ច្បាប់

​​​​​​​​​​​​​​ ច្បាប់​​ព្រៃ​ឈើ​ដែល​អនុម័ត​នៅ​ឆ្នាំ​២០០២​របស់​កម្ពុជា​ ហាម​ឃាត់​ការ​កាប់​ឈើ​កម្រ​​នៅ​ក្នុង​ព្រៃ​ធម្មជាតិ​ ប៉ុន្តែ​រដ្ឋាភិបាល​មិន​ដែល​ពិនិត្យ​តាម​ដាន​សារាចរ​​មួយដែល​មានរាយនាម​​ឈើ​ទាំង​នោះឡើយ ប៉ុន្តែ​​នៅ​ក្នុង​បញ្ជី​​រាយ​នាម​ប្រភេទ​ឈើ​កម្រ​របស់​រដ្ឋាភិបាល​ក្នុង​ឆ្នាំ​២០០០ រួម​មានធ្នង់ នាងនួន និង​គ្រញូងដែល​ជា​ប្រភេទ​ឈើ​មាន​តម្លៃ​បំផុត។ នៅ​ក្នុង​ឆ្នាំ​២០១៣ រដ្ឋាភិបាល​បាន​ចេញ​បទបញ្ជា​ពិសេស​មួយ​ហាម​ឃាត់​ការ​ប្រមូលទិញ​ ​ការ​ស្តុក​ទុក​​​ ការ​កែច្នៃ ឬ​ការ​នាំចេញ​ឈើ​គ្រញូង។

​ ក្រុម​អ្នកស្រាវ​ជ្រាវ​របស់​អង្គការ​ក្លូបល​វីតណេស​ បាន​មើល​ឃើញ​បណ្ដាញ​របស់​លោក ទ្រី ភាព កាប់​ និង​ដឹកជញ្ជូន​​ប្រភេទ​ឈើ​ទាំង​អស់​នេះ​។ របាយការណ៍​នេះ​​​លើក​ឡើង​ថា “ខណៈពេល​ឃ្លាំ​មើល​ប្រតិបត្តិការ​របស់​ក្រុម​ហ៊ុន​ ទ្រី ភាព នៅ​លើ​ដី​​ ក្រុម​អ្នក​ស្រាវ​ជ្រាវ​បាន​សង្កេត​ឃើញ​ថា សកម្មភាព​​កាប់​ឆ្ការ​ព្រៃ និង​​គំនរ​ឈើ​​នៅ​តាម​ដេប៉ូ​របស់​ក្រុម​ហ៊ុន​ទ្រីភាព​នៅ​ក្នុង​ព្រៃ ក្រុង​បាន​លុង​ តំបន់​សេដ្ឋកិច្ច​ពិសេស​របស់​ក្រុម​ហ៊ុន​នេះ​ក្នុង​ស្រុក​អូរយ៉ាដាវ និង​ដេប៉ូ​ដ៏ធំ​នៅ​​ឧដុង្គ សុទ្ធតែ​មានឈើ​​ប្រណីត​ទាំងពីរ​នេះ​​ជា​ច្រើន​​” គឺ​នាង​នួន និង​គ្រញូង។

របាយការណ៍​នេះ​បន្ថែម​ថា ” ការ​សម្ភាស​ជាមួយ​អ្នក​ដែល​ពាក់​ព័ន្ធ​​នឹងការ​កាប់​ឈើ​ខុស​ច្បាប់​​ពាស​ពេញ​ [ឧទ្យានជាតិ​វីរជ័យ] ​និង​ព្រៃ​នៅ​ជុំវិញ​​ភាគខាង​ត្បូង ​បាន​បង្ហាញ​យ៉ាង​ច្បាស់​ថា វា​ងាយ​ស្រួល​ណាស់​សម្រាប់​ក្រុម​ហ៊ុន​ ទ្រី ភាព ​ប្រមូល​ឈើ​នៅ​ខាង​ក្រៅ​តំបន់​ [សម្បទាន] ហើយ​​​ដឹកវា​ទៅ​កាន់​ដេប៉ូ​នានា​នៅ​ក្នុង​ខេត្ត​ ដោយ​នៅ​ទីនោះឈើ​ទាំង​នោះ​​ត្រូវ​បាន​​លាយ​ចម្រុះ​គ្នា​ជាមួយ​​ឈើ​ដែល​ដឹក​ចេញ​​​ពី​​ក្នុង​ [តំបន់​សម្បទាន​]។ ​តាម​សេចក្ដី​រាយ​ការណ៍​ថា ​ឈើ​ភាគច្រើន​​​នៅ​ក្នុង​ឧទ្យាន​ជាតិនេះ​ និង​តំបន់​ជុំវិញ​​ កំពុង​ត្រូវ​បាន​​ប្រមូល​ផល​ក្រោម​​​ការ​គ្រប់​គ្រង ឬ​សម្រាប់​លក់​ឲ្យ​ក្រុម​ហ៊ុន​ ទ្រី ភាព”។

អង្គការ​ក្លូបលវីតណេស​លើក​ឡើង​ថា អ្នកភូមិ​ និង​អ្នក​កាប់ឈើ​នៅ​ក្នុង​ខេត្ត​នេះ​បាន​ប្រាប់ពួកគេ​ថា ឈ្មួញ​កណ្ដាល​របស់​លោក ទ្រី ភាព បង្ហាញ​មុខ​​ជាមួយ​​មន្ត្រី​មក​ពី​ក្រសួង​បរិស្ថាន​​ប្រហែល​១ខែ​ម្ដង ដើម្បីជំរុញ​​ការ​កាប់​ឈើ​ខុស​ច្បាប់​ឲ្យ​​​ចូល​ទៅ​ក្នុង​ព្រៃ​​បន្ថែម​ចម្ងាយ​ពីរ​បី​គីឡូម៉ែត្រ ដោយ​​ប្រគល់​​​​​​ដីទំហំ​​តូច​ៗទាំង​នោះ​​ឲ្យ​ទៅ​ “អ្នក​ម៉ៅការ​បន្ត​” ដែល​មាន​រណារ​ រថយន្ត​ និង​ក្រុម​ការ​ងារ​ផ្ទាល់​ខ្លួន​។

របាយការណ៍​នេះ​បញ្ជាក់​ថា ទោះ​បី​ជា​អ្នក​ដែល​មិន​ចង់​ចូល​រួមក្ដី ក៏​ត្រូវ​បាន​គេ​បញ្ចុះ​បញ្ចូលដែរ​​​​បូក​រួម​​ជាមួយ​នឹង​​ការ​ឲ្យ​កាដូផង​ និង​ការ​គំរាម​កំហែង​ផង​។ អ្នកភូមិ​ម្នាក់​​​បាន​ប្រាប់​​ក្រុម​អ្នក​ស្រាវជ្រាវ​ទាំង​នេះ​ថា “បើ​យើង​មិន​កាប់​ឈើ​ទេ តើ​ធ្វើ​ម៉េច​យើង​អាច​ចិញ្ចឹម​គ្រួសារ​របស់​យើង​បាន? ហើយ​បើ​យើង​មិន​កាប់ ក៏​ក្រុម​ហ៊ុន​កាប់​វាដែរ។ កាប់​ឈើ​យក​លុយ​ ប្រសើរ​ជាង​បាត​់​បង់​ព្រៃ​ឈើ​ដោយ​មិន​បាន​អ្វី​ទាំង​អស់​”។

អង្គការ​​នេះ​លើក​ឡើង​ថា ខ្លួន​​​​បាន​បញ្ចេញ​ឈ្មោះ​​ឈ្មួញ​កណ្ដាល​របស់​លោក ទ្រី ភាព យ៉ាង​ហោច​ណាស់​៨៩​នាក់ ហើយ​អ្នក​ដែល​មាន​ឥទ្ធិពល​បំផុត​ក្នុង​ចំណោមពួកគេ គឺ​​ឧត្ដម​សេនីយ៍ទោ ហូម ហយ ​នៅ​ក្នុង​​កង​ពល​​តូច​លេខ​៧០ នៃ​កង​យោពល​ខេមរភូមិន្ទ​ ដែល​ធ្លាប់​ជា​កង​អង្គរក្ស​ផ្ទាល់​ខ្លួន​របស់​លោក​នាយក​រដ្ឋមន្ត្រី។ អង្គការ​នេះ​និយាយ​ថា អ្នក​ភូមិ អ្នក​កាប់​ឈើ​ និង​ប្រភព​មួយ​ដែល​ស្និទ្ធ​នឹង​ឧត្ដម​សេនីយ៍​រូប​នេះ​ សុទ្ធ​តែ​បញ្ជាក់​ពីការ​រៀបចំ​នេះ​។

អង្គការ​ក្លូបល​វីតណេស​​និយាយ​ថា ខ្លួន​ទទួល​បានកិច្ច​សន្យា​មួយ​​រវាង​ឧត្ដម​សេនីយ៍​ទោ ហូម ហយ និង​អ្នកភូមិ​មួយ​ក្រុម​​​ដែល​ឧត្ដម​សេនីយ៍​រូប​នេះ​ស្ម័គ្រ​ចិត្ត​សាង​សង់​ស្ពាន​មួយ​​ និង​សាល​សហគមន៍​ឲ្យ​ពួកគេ​ “ដែល​ទំនង​ជា​ថ្នូរ​នឹង​ការ​អនុញ្ញាត​ឲ្យ​មនុស្ស​របស់​គាត់​កាប់​ឈើ​នៅ​ក្នុង​តំបន់​នេះ​។ ពួកគេ​បាន​យល់​ព្រម​តាម​សំណើ​របស់​លោក ហូម ហយ ដោយ​​ស្ទាក់​ស្ទើរ​ ដោយ​គិត​ថា​ ពួកគេ​គ្មាន​ជម្រើស​។ ទោះ​ជា​យ៉ាង​ណា បន្ទាប់ពីកាប់​​​ឈើ​ប្រណីត​​ទាំង​អស់​រួច​ហើយ អ្នក​កាប់​ឈើ​របស់​ឈ្មួញ​កណ្ដាល​រូប​នេះ​បាន​​​រំកិល​ទៅមុខ​ទៀត ប៉ុន្តែ​សាល​នៅ​ក្នុង​ភូមិ​ និង​ស្ពាន​មិនត្រូវ​បាន​ក​សាង​​ទេ”។

អង្គការ​នេះ​​និយាយ​ថា ​ខ្លួន​ធ្លាប់​បាន​​សរសេរ​​លិខិត​ផ្ញើទៅ​ឧត្ដម​សេនីយ៍​រូប​នេះ​ ដើម្បី​​​សុំ​ការ​ឆ្លើយ​បំភ្លឺ​កាលពី​ខែ​ធ្នូ ប៉ុន្តែ​មិនទទួល​បាន​ការ​ឆ្លើយ​តប​ទេ​។ នៅ​ពេល​អ្នក​យក​ព័ត៌មាន​ម្នាក់​ទាក់​ទង​កាលពី​ម្សិលមិញ លោក​ ដួង រ៉ា មេបញ្ជាការ​រង​​កង​ពលតូច​លេខ​៧០​ បាន​មាន​ប្រសាសន៍​ថា នៅ​ក្នុង​អង្គភាព​របស់​លោក ​គ្មាន​អ្នក​ណា​ដែល​មាន​​ឈ្មោះ ហូម ហយ​ នោះ​ទេ។

ការ​ដឹកជញ្ជូន​ខុស​ច្បាប់

ក្រៅពី​ការ​ប្រមូល​ផល​ឈើ​កម្រ​ ច្បាប់​របស់​កម្ពុជា​ក៏​ហាម​ឃាត់​​ការ​នាំចេញ​​ឈើ​មូល​ ឬ​ឈើ​មានរាង​ការេ៉​គ្រប់​ប្រភេទ​ដែល​មាន​ទំហំ​លើសពី​២៥​សង់ទីម៉ែត្រ​ផង​ដែរ​។

អង្គការ​ក្លូបល​វីតណេស​និយាយ​ថា អ្នក​ស្រាវ​ជ្រាវ​របស់​ខ្លួន​​​បាន​ឃ្លាំមើល​ដេប៉ូ​ឈើ​របស់​លោក ទ្រី ភាព នៅ​ក្នុង​ស្រុក​អូរយ៉ាដាវ ខេត្ត​រតនគិរី ជាប់​​ព្រំដែន​វៀតណាម ហើយ​ឃើញ​ក្រុម​ហ៊ុន​លើកឈើ​ដែល​មាន​ទំហំ​ធំជាង​ច្បាប់​កំណត់ និង​កាប់​​ចេញពី​​ឈើ​ការ​ពារ​​​ដាក់​ចូល​ក្នុង​កុង​តឺ​​ន័រ​។ ក្នុង​រយៈ​ពេល​ពីរ​សប្ដាហ៍​មក​នេះ ​ពួកគេ​បាន​មើល​ឃើញ​​ថា ​ជា​មធ្យម​ក្នុង​មួួយ​ថ្ងៃ​​មាន​រថយន្ត​កុងតឺន័រ​ចំនួន​១៥​គ្រឿងឆ្លង​ដែន​ចូល​​ក្នុង​ប្រទេស​វៀតណាម។ អ្នក​បើក​បរ​បាន​ប្រាប់ពួកគេ​ថា ឈើ​ទាំង​នោះ​ដឹក​​​ឆ្ពោះ​ទៅ​កំពង់ផែន​វី ញន (Qui Nhon) ​​​​របស់​​វៀតណាម​ ហើយ​​ដឹក​​បន្ត​ឆ្ពោះ​ទៅ​ប្រទេស​ចិន។

អ្នកស្រាវជ្រាវ​ទាំង​នេះ​ក៏បាន​តាម​ដាន​កុងតឺន័រ​មួយ​ចំនួន​ដែល​ពួកគេ​មើល​ឃើញ​ផ្ទុក​ឈើ​កម្រ​នៅ​ក្នុង​ខេត្ត​រតនគិរី និង​កន្លែង​ផ្សេង​ទៀត​ឆ្ពោះ​ទៅ​​កំពង់ផែ​ស្វយ័ត​ក្រុង​ព្រះសីហនុ​ផង​ដែរ​។

ក្នុង​​​រយៈ​​​ពេល​​​បួន​​​សប្តាហ៍​​​មក​​​នេះ​​​ ពួកគេ​​​បាន​​​ឃើញ​​​កុងទឺន័រ​​​របស់​​​លោក ទ្រី ភាព យ៉ាង​​​ហោច​​​ណាស់​​​៣០​​​គ្រឿង ត្រូវ​​​បាន​​​ដឹក​​​ចូល​​​ក្នុង​​​កំពង់​​​ផែ​​​ក្នុង​​​មួយ​​​ថ្ងៃ​​​ៗ។

របាយការណ៍​​​នេះ​​​មាន​​​ខ្លឹម​​​សារ​​​ដូច្នេះ​​​ថា “ចំនួន​​​កុងទឺន័រ​​​ទាំង​​​នេះ​​​គឺ​​​មាន​​​ផ្ទុក​​​ឈើ​​​ប្រមាណ​​​៩០០​​​ម៉ែត្រ​​​គូប​​​នៃ​​​​​​ឈើ​​​របស់​​​ក្រុមហ៊ុន ទ្រី ភាព គ្រុប​​​ ដែល​​​ឆ្លង​​​កាត់​​​កំពង់​​​ផែ​​​ក្នុង​​​មួយ​​​ថ្ងៃ​​​ៗ ហើយ​​​នេះ​​​ជា​​​ការ​​​ប៉ាន់​​​ប្រមាណ​​​មួយ​​​ដែល​​​មន្ត្រី​​​គយ​​​ម្នាក់​​​បាន​​​បញ្ជាក់​​​ប្រាប់​​​​​​ក្រុម​​​អ្នក​​​ស្រាវ​​​ជ្រាវ​​​”។

ក្រុម​​​អ្នក​​​ស្រាវ​​ជ្រាវ​​​នេះ​​​ ក៏​​​ទទួល​​​បាន​​​របាយការណ៍​​​ពី​​​កំពង់​​​ផែ​​​ស្តី​​​ពី​​​ការ​​​ដឹក​​​ជញ្ជូន​​​ឈើ​​​ប្រមាណ​​​៤.៦០៧​​​របស់​​​ក្រុម​​​ហ៊ុន ទ្រី ភាព កាល​​​ពី​​​ខែ​​​មីនា​​​ ផង​​​ដែរ​​​។

អង្គការ​​​ក្លូបលវីតណេស បាន​​​លើក​​​ឡើង​​​ថា របាយការណ៍​​​នេះ​​​រួ​​​មាន​​​អាជ្ញាប័ណ្ណ​​​នាំ​​​ចេញ​​​​​​មួយ​​​​​​ដែល​​​មាន​​​ឈ្មោះ​​​ រដ្ឋបាល​​​ព្រៃ​​​ឈើ​​​ជា​​​អ្នក​​​នាំ​​​ចេញ​​​ និង​​​មាន​​​វិក្កយបត្រ​​​​​​របស់​​​ក្រុមហ៊ុន​​​ ទ្រី ភាព ដែល​​​សរសេរ​​​ដោយ​​​​​​មន្ត្រី​​​គយ​​​ម្នាក់​​​​​​ក្នុង​​​នោះ​​​តម្លៃ​​​ឈើ​​​ក្នុង​​​មួយ​​​ម៉ែត្រ​​​គូប​​​​​​ត្រូវ​​​បាន​​​ដំឡើង​​​តម្លៃ​​​ជាង​​​ទ្វេ​​​​​​​​​​​​​​​​​​​​​​​​​​​​​ដង​​​ពោល​​​គឺ​​​ដំឡើង​​​ពី​​​៥១០​​​ដុល្លារ ដល់​​​១.២០០​​​ដុល្លារ ដោយ​​​ធ្វើ​​​ឲ្យ​​​ការ​​​ដឹក​​​ឈើ​​​ក្នុង​​​មួយ​​​ជើង​​​មាន​​​ទឹក​​​ប្រាក់​​​រហូត​​​​​​ដល់​​​ទៅ​​​៥,៥​​​លាន​​​ដុល្លារ​​​។ តែ​​​ទោះ​​​ជា​​​យ៉ាង​​​ណា ប័ណ្ណ​​​នាំ​​​ចេញ​​​ដែល​​​ចេញ​​​ទៅ​​​ឲ្យ​​​ក្រុមហ៊ុន​​​ ទ្រី ភាព គ្រុប​​​ ប្រាំ​​​ថ្ងៃ​​​ក្រោយ​​​​​​មាន​​​សរសេរ​​​តម្លៃ​​​ឈើ​​​ទាប​​​ជាង​​​នេះ​​​។

របាយការណ៍​​​ទី​​​២ សម្រាប់​​​ការ​​​ដឹក​​​ឈើ​​​​​​ប្រមាណ​​​១០៥​​​ម៉ែត្រ​​​គូប​​​មួយ​​​ជើង​​​ទៀត​​​​​​ ដែល​​​ក៏​​​ស្ថិត​​​នៅ​​​ក្នុង​​​ខែ​​​មីនា​​​ដែរ​​​នោះ​​​ អ្នកស្រាវ​​​ជ្រាវ​​​បាន​​​រក​​​ឃើញ​​​ប័ណ្ណ​​​ដឹក​​​ជញ្ជូន​​​ឈើ​​​​​​លើក​​​មុន​​​​ដែល​​​មាន​​​ការ​​​អនុញ្ញាត​​​ពី​​​គយ​​​​​​​​​ ហើយ​​​ប័ណ្ណ​​​នេះ​​​បាន​​​ផុត​​​កំណត់​​​ទៅ​​​ហើយ​​​។របាយ​​​ការណ៍​​​នេះ​​​មាន​​​ខ្លឹម​​​សារ​​​ថា “នេះ​​​​​​មាន​​​ន័យ​​​ថា ការ​​​ដឹក​​​នាំ​​​ចេញ​​​ឈើ​​​លើក​​​ទី​​​២​​​នេះ​​​ដោយ​​​លោក​​​ ទ្រី ភាព ប្រហែល​​​ជា​​​ត្រូវ​​​បាន​​ធ្វើ​​​ឡើង​​​ដោយ​​​គ្មាន​​​ប័ណ្ណ​​​អនុញ្ញាត​​​ត្រឹម​​​ត្រូវ​​​ពី​​​មន្ត្រី​​​គយ​​​ដែល​​​អាច​​​ចាត់​​​ទុក​​​ថា ជា​​​ការ​​​ក្លែង​​​បន្លំ​​​”។

យោង​​​តាម​​​របាយការណ៍​​​ទាំង​​​នោះ ​​​​​​ការ​​​នាំ​​​ឈើ​​​ចេញ​​​ទាំង​​​ពីរ​​​លើក​​​គឺ​​​មាន​​​គោល​​​ដៅ ឆ្ពៅ​​​ទី​​​កាន់​​​ប្រទេស​​​ចិន​​​តាម​​​រយៈ​​​ក្រុមហ៊ុន​​​ដដែល​​​នៅ​​​ក្នុង​​​ទី​​​ក្រុង​​​ហុង​​​កុង​​​​​​​​​គឺ​​​ក្រុមហ៊ុនដឹក​​​ជញ្ជូន​​​ Kin Chung ។

នៅ​​​ក្នុង​​​ទី​​​ក្រុង​​​ហុង​​​កុង​​​ អង្គការ​​​ក្លូបល​​​វីតណេស បាន​​​រក​​​ឃើញ​​​ថា ក្រុមហ៊ុន​​​នេះ​​​បាន​​​ធ្វើ​​​កំពុង​​​ធ្វើ​​​ប្រតិបត្តិការ​​​​​​នៅ​​​អគារ​​​ដែល​​​គ្មាន​​​អ្វី​​​បញ្ជាក់​​​ច្បាស់​​​លាស់​​​ដោយ​​​មាន​​​ភាគ​​​ហ៊ុន​​​ក្នុង​​​មួយ​​​ប័ណ្ណ​​​តម្លៃ​​​ពីរ​​​ដុល្លារ​​​ហុង​​​កុង​​​ ហើយ​​​ភាគហ៊ុន​​​នេះ​​​​​​ត្រូវ​​​បាន​​​បែង​​​ចែក​​​ជា​​​ពីរ​​​​​​រវាង​​​នាយក​​​គ្រប់​​​គ្រង​​​ចំនួន​​​ពី​​​រនាក់​​​។ ក្រុមហ៊ុន​​​នេះ​​​គ្មាន​​​លេខ​​​ទូរស័ព្ទ ឬ​​​គេ​​​ហទំព័រ​​​ឡើយ​​​ ហើយ​​​ក៏​​​ទំនង​​​ជា​​​គ្មាន​​​កំណត់​​​ត្រា​​​ស្តី​​​ពី​​​ការ​​​ជួញ​​​ដូរ​​​​​​ឈើ​​​ជា​​​សាធារណៈ​​​ផង​​​ដែរ​​​។

ក្នុង​​​ចំណោម​​​មនុស្ស​​​ដែល​​​អ្នក​​​ស្រាវ​​​ជ្រាវ​​​បាន​​​សម្ភាស​​​នៅ​​​អគារ​​​ផ្សេង​​​ទៀត​​​របស់​​​ក្រុមហ៊ុន Kin Chung គ្មាន​​​នរណា​​​ម្នាក់​​​ដឹង​​​អំពី​​​ការ​​​ជួញ​​​ដូរ​​​ឈើ​​​របស់​​​ក្រុមហ៊ុន​​​នេះ​​​ឡើយ​​​។ នាយក​​​គ្រប​​​់​​​គ្រង​​​ក្រុមហ៊ុន​​​នេះ​​​បាន​​​អះ​​​អាង​​​ថា ខ្លួន​​​មិន​​​ដឹង​​​ថា មាន​​​អ្វី​​​នៅ​​​ក្នុង​​​កុង​​​ទឺន័រ​​​ដែល​​​ពួកគេ​​​បាន​​​ដឹក​​​ជញ្ជូន​​​នោះ​​​ឡើយ​​​ ហើយ​​​បាន​​​ប្រាប់​​​ក្រុម​​​អ្នក​​​ស្រាវ​​​ជ្រាវ​​​ថា ពួក​​​គេ​​​មិន​​​ដែល​​​ឃើញ​​​មាន​​​របាយ​​​ការណ៍​​​នៃការ​​​ដឹក​​​ជញ្ជូន​​​ពី​​​​​​​​​​​​ប្រទេស​​​កម្ពុជា​​​មក​​​ចាប់​​​ពី​​​ខែ​​​​​​​​​មីនា​​​មក​​​ម្លេ៉ះ​​​ ហើយ​​​ក៏​​​មិន​​​ដឹង​​​ដែរ​​​ថា ហេតុ​​​អ្វី​​​បាន​​​ជា​​​ឈ្មោះ​​​​​​និង​​​អាសយដ្ឋាន​​​របស់​​​ក្រុមហ៊ុន​​​ពួក​​​គេ​​​ត្រូវ​​​បាន​​​យក​​​ទៅ​​​ប្រើ​​​ប្រាស់​​​។

របាយការណ៍​​​នេះ​​​មាន​​​ខ្លឹម​​​សារ​​​បន្ត​​​ទៀត​​​ដូច្នេះ​​​ថា “ការ​​​ឆ្លើយ​​​តប​​​បែប​​​នេះ​​​ គឺ​​​មាន​​​តែ​​​ធ្វើ​​​ឲ្យ​​​គេ​​​សង្ស័យ​​​កាន់​​​តែ​​​ខ្លាំង​​​ចំពោះ​​​ការ​​​ជួញ​​​ដូរ​​​ឈើ​​​របស់​​​លោក ទ្រី​​​ ភាព​​​ តែ​​​ប៉ុណ្ណោះ​​​។ ការ​​​កាប់​​​ឈើ​​​ ការកែច្នៃ​​​ឈើ​​​ និង​​​ការ​​​នាំ​​​ចេញ​​​ឈើ​​​ដោយ​​​ក្រុម​​​ហ៊ុន ទ្រី  ភាព គ្រុប​​​ ឬ​​​ដៃ​​​គូ​​​របស់​​​ខ្លួន​​​ មិន​​​គួរ​​​ត្រូវ​​​បាន​​​ចាត់​​​ទុក​​​ថា ស្រប​​​ច្បាប់​​​នោះ​​​ឡើយ​​​ ប្រសិន​​​បើ​​​គ្មាន​​​អ្វី​​​មក​​​បញ្ជាក់​​​នោះ​​​”។

របាយការណ៍​​​នេះ​​​មិន​​​បាន​​​ផ្តល់​​​ត​​​ួ​​​លេខ​​​ថា តើ​​​ឈើ​​​ប្រភេទ​​​កម្រ​​​ចំនួន​​​ប៉ុន្មាន​​​ ដែល​​​លោក​​​ ទ្រី ភាព​​​ កំពុង​​​ដឹក​​​ជញ្ជូន​​​ទៅ​​​ប្រទេសច​​​ិន​​​ ដែល​​​ជា​​​ទី​​​ផ្សារ​​​ធំ​​​បំផុត​​របស​​​់​​​ប្រទេស​​​កម្ពុជា​​​​​​នោះ​​​ឡើយ​​​។ ប៉ុន្តែ បើ​​​យោង​​​តាម​​​ការ​​​រក​​​ឃើញ​​​របស់​​​អង្គការ​​​ក្លូបល​​​វីត​​​ណេស និង​​​ទិន្នន័យ​​​ពី​​​មន្ត្រី​​​គយ​​​របស់​​​ប្រទេស​​​ចិន​​​បង្ហាញ​​​ថា លោក​​​កំពុង​​​ដឹក​​​ជញ្ជូន​​​ឈើ​​​ប្រភេទ​​​កម្រ​​​នេះ​​​ច្រើន​​​ណាស់​​​។

ទិន្នន័យ​​​ពី​​​មន្ត្រី​​​គយ​​​ចិន​​​ដែល​​​ទទួល​​​បាន​​​ដោយ​​​ទី​​​ភ្នាក់​​​ងារ​​​សើុប​​​អង្កេត​​​​​​បរិស្ថាន​​​ ដែលជា​​​អង្គការ​​​សិទ្ធិ​​​បរិស្ថាន​​​មួយ​​​ផ្សេង​​​ទៀត​​​​​​មាន​​​មូលដ្ឋាន​​​នៅ​​​អង់គ្លេស​​​ បង្ហាញ​​​ថា ប្រទេសច​​​ិន​​​បាន​​​នាំ​​​ចូល​​​ឈើ​​​ប្រភេទ​​​ហុង​​​មុ​​​ (Hongmu) ជិត​​​២១.០០០​​​ម៉ែត្រ​​​គូប​​​ពី​​​ប្រទេស​​​កម្ពុជា​​​ក្នុង​​​ឆ្នាំ​​​២០១៣​​​ ដោយ​​​ច្រើន​​​ជាង​​​ឆ្នា​​​ំ​​​២០១២​​​ជិត​​​បី​​​ដង​​​។ ឈើ​​​ប្រភេទ​​​ហុ​​​ងមុ​​​នេះ​​​គឺ​​​ជា​​​ប្រភេទ​​​ឈើ​​​ដែលមាន​​​តម្លៃ​​​សម្រាប់​​​យក​​​ទៅ​​​ធ្វើ​​​ជា​​​គ្រឿង​​​សង្ហារិម​​​ក្នុង​​​នោះ​​​រួម​​​មាន​​​ទាំង​​​ឈើ​​​គ្រញូង​​​ផង​​​ដែរ​​​។

យោង​​​តាម​​​ទិន្នន័យ​​​របស់​​​មន្ត្រី​​​ចិន​​​ដែល​​​ទទួល​​​បាន​​​ពី​​​អង្គការ​​​ក្លូប៊ល​​​វីតណេស ​​​ការ​​​នាំ​​​ឈើ​​​ប្រភេទ​​​ហុង​​​មុ​​​​​​​​​ពី​​​ប្រទេសកម្ពុជា​​​ចូល​​​ទៅ​​​ក្នុង​​​ប្រទេស​​​ចិន​​​​​​​​​​​​​​​បាន​​​កើន​​​ឡើង​​​លើស​​​ពី​​​៥៥.០០០​​​ម៉ែត្រគូប​​​ទៅ​​​ទៀត​​​ក្នុង​​​រយៈ​​​ពេល​​​ប្រាំ​​​បួន​​​ខែ​​​ដំបូង​​​នៃ​​ឆ្នាំ​​​២០១៤​​​តែ​​​មួយ​​​គត់​​​ ហើយ​​​អង្គការ​​​​​​​​​នេះ​​​បាន​​​រក​​​ឃើញ​​​ថា​​​ ឈើ​​​ប្រមាណ​​​៩៧​​​ភាគ​​​រយ​​​ក្នុង​​​ចំណោម​​​ឈើ​​​ទាំង​​​អស់​​​គឺ​​​​​​ប្រទេស​​​ច​​​ិន​​​​​​បាន​​​នាំ​​​​​​ចូល​​​ពី​​​ប្រទេស​​​កម្ពុជា​​​អំឡុង​​​រយៈ​​​ពេល​​​នោះ​​​។

លោកស្រី មេហ្គែន ម៉ាកខិននីស បាន​​​លើក​​​ឡើង​​​ក្នុង​​​របាយការណ៍​​​នេះ​​​ថា “ការ​​​ចូល​​​កាប់​​​បំផ្លាញ​​​​​​ព្រៃ​​​ចុង​​​ក្រោយ​​​របស់​​​ប្រទេស​​​កម្ពុជា​​​ដោយ​​​ក្រុមហ៊ុន​​​ ទ្រី ភាព​​​​​​​​​ គ្រុប​​​ គឺវា​​​ស្មើ​​​ទៅ​​​នឹង​​​អំពើ​​​ប្លន់​​​ទាំ​​​ង​​ថ្ងៃ។ ​​​តាម​​​ទម្លាប់​​​ ក្រុមហ៊ុន​​​នេះ​​​បំពាន​​​ច្បាប់​​​ដែល​​​មាន​​​គោល​​​បំណង​​​ការ​​​ពារ​​​ពល​​​រដ្ឋ​​​ខ្មែរ​​​ និង​​​ប្រព័ន្ធ​​​អេកូឡូហ្ស៊ី​​​​​​ ​​​ពួកគាត់​​​ពឹង​​​ផ្អែកលើ​​​ដោយ​​​មិន​​​ញញើត​​​។ ហើយ​​​នេះ​​​គឺ​​​ជា​​​ឧទាហរណ៍​​​មួ​យ​​​ផ្សេង​​​ទៀត​​​​​​ស្តី​​​ពី​​​ការ​​​ប្រើ​​​អំណាច​​​នយោបាយ​​​របស់​​​ប្រទេស​​​កម្ពុជា​​​ និង​​​ការ​​​ចង់​​​បាន​​​ប្រយោជន៍​​​ជំនួញ​​​ដោយ​​​កៀប​​​សង្កត់​​​លើ​​​សិទ្ធិ​​​ប្រជា​​​ពល​​​រដ្ឋ​​​ ហើយ​​​អ្នក​​​លក់​​​ដំុ​​​បាន​​​ទាញ​​​យក​​​ធន់​​​ធាន​​​ធម្មជាតិ​​​របស់​​​ប្រទេស​​​នេះ​​​ដោយ​​​មាន​​​​​​អ្នក​​​មាន​​​អំណាច​​​ដែល​​​ប្រព្រឹត្ត​​​អំពើ​​​ពុក​​​រលួយ​​​នៅ​​​ពី​​​ក្រោយ​​​”។

ការ​​​ការ​​​ពារ​​​ និង​​​ការ​​​បដិសេធ

នៅ​​​ពេល​​​ទាក់ទង​​​កាល​​​ពី​​​ម្សិលមិញ មន្ត្រី​​​រដ្ឋាភិបាល​​​ និង​​​បុគ្គលិក​​​របស់​​​ក្រុម​​​ហ៊ុន ទ្រី ភាព​​​ គ្រុប​​​ ដែល​​​សុទ្ធ​​​តែ​​​មិន​​​ព្រម​​​ធ្វើ​​​អត្ថាធិប្បាយ​​បាន​​​​​​បដិសេធ​​​ចំពោះ​​​ការ​​​អះ​​​អាង​​​នៅក្នុង​​​របាយ​​​ការណ៍​​​នេះ​​​ ឬ​​​បាន​​​ការពារ​​​ការងារ​​​របស់​​​ខ្លួន​​​។

លោក ជ័យ សិទ្ធិ ​​​ជា​​​ប្រធាន​​​ក្រុមហ៊ុន​​​​​ដឹក​​​ជញ្ជូន​​​មួយ​​​​ដែល​​ទទួល​​​ដឹក​​​​​​ឈើ​​​ឲ្យ​​​ក្រុមហ៊ុន ទ្រី ភាព​​​ គ្រុប​​​ បាន​​​លើក​​​ឡើង​​​ថា លោក​​​លែង​​​ធ្វើ​​​ការ​​​ជាមួយ​​​​​​ឧកញ៉ា​​​រក​​​​​​ស៊ី​​​ឈើ​​​រូប​​​នេះ​​​ហើយ​​​ ប៉ុន្តែ បាន​​​បដិសេធ​​​មិន​​​និយាយ​​​ថា តើ​​​ពេល​​​ណា​​​កិច្ច​​​ព្រម​​​ព្រៀង​​​ត្រូវ​​​បាន​​​បញ្ចប់​​​នោះ​​​ឡើយ​​​ ហើយ​​​ក៏​​​មិន​​​បាន​​​ប្រាប់​​​អំពី​​​ការ​​​រក​​​ស៊ី​​​ជា​​​មួយ​​​គ្នា​​​ក្នុង​​​ពេល​​​កន្លង​​​មក​​​ដែរ​​​។

គេ​​​មិន​​​អាច​​​ទាក់ទង​​​អ្នក​​​នាំ​​ពាក្យ​​​ និង​​​ប្រធាន​​​រដ្ឋបាល​​​របស់​​​ក្រុម​​​ហ៊ុន ទ្រី ភាព គ្រុប​​​ សុំ​​​ការ​​​អត្ថាធិប្បាយ​​​បាន​​​ឡើយ​​​​​​​​​។

រីឯ​​​លោក ប៉ុល វិសាល តំណាង​​​ក្រុមហ៊ុន​​​របស់​​​ទ្រី ភា​​​ព គ្រុប​​​ប្រចាំ​​​ខេត្ត​​​រតនគិរី​​​ ក៏​​​មិន​​​អាច​​​ទាក់ទង​​​បាន​​​ដែរ​​​។

លោក សី លា ដែល​​​មើល​​​ការ​​​ខុស​​​​​​ត្រូវ​​​ក្រុមហ៊ុន​​​របស់​​​លោក​​​ ទ្រី ភាព​​​ នៅ​​​ក្នុង​​​ខេត្ត​​​ព្រះ​​​វិហារ​​​បាន​​​ច្រាន​​​ចោល​​​រាល់​​​ការ​​​ចោទ​​​ប្រកាន់​​​ទាំង​​​អស់​​​ក្នុង​​​របាយការណ៍​​​នេះ​​​។

លោក​​​បាន​​​និយាយ​​​ថា “អ្វី​​​ដែល​​​​​​អង្គការ​​​ក្លូបល​​​វីតណេស បាន​​​លើក​​​ឡើង​​​ក្នុង​​​របាយការណ៍​​​​គឺ​​​មិន​​​ពិត​​​ទេ​​​ ព្រោះ​​​យើង​​​មិន​​​ដែល​​​កាប់​​​ឈើ​​​នៅ​​​ក្នុង​​​ ឬ​​​ក្រៅ​​​តំបន់​​​ដី​​​សម្បទាន​​​សេដ្ឋកិច្ច​​​ឡើយ​​​។ យើង​​​ទិញ​​​តែ​​​ឈើ​​​ខុស​​​ច្បាប់​​​ដែល​​​រដ្ឋាភិបាល​​​រឹប​​​អូស​​​បាន​​​ប៉ុណ្ណោះ​​​សម្រាប់​​​ការ​​​នាំ​​​ចេញ​​​។ យើង​​​មិន​​​ខ្វល់​​​​​​អំពី​​​ព័ត៌​​​មាន​​​របស់​​​អង្គការ​​​ក្លូបល​​​វីតណេស​​​ឡើយ​​​ ព្រោះ​​​ពួកគេ​​​គ្រាន់​​​តែ​​​ចេញ​​​របាយការណ៍​​​េនះ​​​ដើម្បី​​​បំពុល​​​បរិយាកាស​​​ប៉ុណ្ណោះ”។

លោក សែម ម៉េង អនុ​​​ប្រធាន​​​នាយក​​​ដ្ឋាន​​​​​​គយ​​​នៅ​​​ក្រសួង​​​ពាណិជ្ជកម្ម​​​បាន​​​លើក​​​ឡើង​​​ថា លោក​​​មិន​​​អាច​​​ធ្វើ​​​អត្ថាធិប្បាយ​​​លើ​​​ការ​​​នាំ​​​ចេញ​​​ពី​​​កំពង់​​​ផែ​​​ក្រុង​​​ព្រះ​​​សីហនុ​​​បាន​​​ឡើយ​​​​​​​​ ព្រោះ​​​វា​​​ស្ថិត​​​នៅ​​​ក្រោម​​​យុត្តាធិការ​​​របស់​​​អាជ្ញាធរ​​​កំពង់​​​ផែ។ គេ​​​មិន​​​អាច​​​ទាក់ទង​​​លោក លូ គឹមឈុន ប្រធាន​​​កំពង់​​​ផែ​​​នេះ​​​បាន​​​ឡើយ​​​។

លោក សៅ សុភាព អ្នក​​​នាំ​​​ពាក្យ​​​ក្រសួង​​​បរិស្ថាន​​​ដែល​​​​​​គ្រប់​​​គ្រង​​​ឧទ្យាន​​​ជាតិ​​​វីរ​​​ជ័យ​​​បាន​​​បដិសេធ​​​មិន​​​ធ្វើ​​​អត្ថាធិប្បាយ​​​ឡើយ​​​ ព្រោះ​​​លោក​​​នៅ​​​មិន​​​ទាន់​​​បាន​​​អាន​​​របាយការណ៍​​​នេះ​​​នៅ​​​ឡើយ​​​ទេ។

នៅ​​​ក្នុង​​​ការ​​​ឆ្លើយ​​​តប​​​ដែល​​​មាន​​​ការ​​​រៀប​​​ចំ​​​មួយ​​​ រដ្ឋបាល​​ព្រៃ​​​ឈើ​​​បាន​​​បដិសេធ​​​ថា ខ្លួន​​​គ្មាន​​​ធ្វើ​​​អ្វី​​​ខុស​​​ឡើយ​​​។ ការ​​​ឆ្លើយ​​​តប​​​នេះ​​​មាន​​​ខ្លឹម​​​សារ​​​ដូច្នេះ​​​ថា “មក​​​ទល់​​​ពេល​​​េនះ​​​គ្មាន​​​អាជ្ញាប័ណ្ណ​​​ត្រូ​​​វបាន​​​ចេញ​​​សម្រាប់​​​ការ​​​កាប់​​​ឈើ​​​ ដឹក​​​ជញ្ជូន​​​ឈើ​​​ ឬ​​​នាំ​​​ចេញ​​​អនុផល​​​ព្រៃ​​​ឈើ​​​ដែល​​​មិន​​​ត្រឹម​​​ត្រូវ​​​ ឬ​​​ផ្ទុយ​​​នឹង​​​ច្បាប់​​​នោះ​​​​​​ឡើយ​​​។  ការ​​​ប្រមូល​​​អនុផល​​​ព្រៃ​​​ឈើ​​​ត្រូវ​​​បាន​​​ធ្វើ​​​ឡើង​​​ដោយ​​​អនុឡោម​​​ទៅ​​​តាម​​​គោល​​​ការ​​​ដែល​​​មាន​​​ការ​​​អនុញ្ញាត​​​ពី​​​រដ្ឋាភិបាល​​កម្ពុជា​​​”។

ការ​​​ឆ្លើយ​​​តប​​​នេះ​​​បាន​​​លើក​​​ឡើង​​​ទៀត​​​ថា​​​ ឈើ​​​ប្រភេទ​​​កម្រ​​​ដែល​​​កម្ពុជា​​​នាំ​​​ចេញ​​​គឺ​​​ជា​​​ឈើ​​​ដែល​​​អាជ្ញាធរ​​​រឹប​​​អូស​​​បាន​​​ពី​​​អ្នក​​​កាប​​​់ឈើ​​​ខុស​​​ច្បាប់​​​ ឬក៏​​​បាន​​​មក​​​ពី​​​ព្រៃ​​​ឈើ​​​ដែល​​​​​​ត្រូវ​​​បាន​​​កាប់​​​ឆ្ការ​​​រាន​​​សម្រាប់​​គម្រោង​​​អភិវឌ្ឍ​​​ន៍​​​រួមមាន​​​ដូច​​​ជា ទំនប់​​​វារី​​​អគ្គិសនី និង​​​ចម្ការ​​​ផ្សេង​​​ៗ​​​ជាដើម​​​ប៉ុណ្ណោះ​​​។ ការ​​​ឆ្លើយ​​​តប​​​​​​នេះ ក៏​​​បាន​​​អួត​​​អាង​​​ផង​​​ដែរ​​​ថា ​​​​​​ចម្ការ​​​ទំហំ​​​១,៩០០ហិកតា​​​នៅ​​​ក្នុង​​​ខេត្ត​​​សៀម​​​រាប​​​ គឺ​​​សម្រាប់​​​ដំា​​​ឈើ​​​ប្រភេទ​​​លេខ​​​មួយ​​​ ហើយ​​​ការ​​​ងារ​​​នេះ​​​គឺ​​​ត្រូវ​​​បាន​​​ធ្វើ​​​ឡើង​​​ដើម្បី​​​បង្កើត​​​ព្រៃ​​​ឈើ​​​សម្រាប់​​​ពាណិជ្ជកម្ម​​​កាបូន​​​។

រដ្ឋបាល​​​ព្រៃ​​​ឈើ​​​ក៏​​​បាន​​​គូស​​​បញ្ជាក់​​​ពី​​​ការ​​​សម្រេច​​​របស់​​​រដ្ឋាភិបាល​​​កាល​​​ពី​​​ឆ្នាំ​​​២០១៣​​ក្នុង​​​ការ​​​ចូល​​​រួម​​​ជា​​​មួយ​​​ប្រទេស​​​ចំនួន​​​១៧៦​​​ផ្សេង​​​ទៀត​​​ដើម្បី​​​ការ​​​ពារ​​​ឈើ​​​គ្រញូង​​​​​​ក្រោម​​​អនុ​​​​​​សញ្ញា​​​ស្តី​​​ពី​​​ពាណិជ្ជកម្ម​​​អន្តរ​​​ជាតិ​​​​​​នៃ​​​ប្រភេទ​​​សត្វ​​​ និង​​​រុក្ខ​​​ជាតិ​​​ជិត​​​ផុត​​​ពូជ​​​ផង​​​ដែរ។

យោង​​​តាម​​​ច្បាប់​​​នេះ រដ្ឋាភិបាល​​​ត្រូវ​​​តែ​​​ចេញ​​​អាជ្ញាប័ណ្ណ​​​ពិសេស​​​មួយ​​​សម្រាប់​​​ការ​​​ដឹក​​​ជញ្ជូន​​​ឈើ​​​គ្រញូង​​​មិន​​​ទាន់​​​កែច្នៃ​​​ចេញពី​​​ប្រទេស។ ទោះបី​​​ជា​​​ ក្រុម​​​អ្នក​​​ស្រាវ​​​ជ្រាវ​​​របស់​​​អង្គការ​​​ក្លូបល​​​វីតណេស​​​បាន​​​ឃើញ​​​ និង​​​កត់ត្រា នូវ​​​អ្វី​​​ដែល​​​កើត​​​ឡើង​​​ភាគ​​​ច្រើន​​​អំឡុង​​​ឆ្នាំ​​​២០១៤​​​ក៏​​​ដោយ​​​ តែ​​​រដ្ឋាភិបាល​​​កម្ពុជា​​​នៅ​​​មិន​​​ទាន់​​​ចេញ​​​អាជ្ញាប័ណ្ណ​​​បែប​​​នេះ​​​ណា​​​មួយ​​​នៅ​​​ឡើយ​​​ទេ​​​៕សុខុម និង ស៊ុយឈាង (រាយការណ៍​​​បន្ថែម​​​ដោយ អូន ភាព និង​​​ វ៉ាន់ រើន​​​)​​​​​​​​​

​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស