28 C
Phnom Penh

ជី​ស្តុក​ទុក​នៅ​ផ្ទះ​របស់​បុរស​ចិន​ម្នាក់​ត្រូវ​បាន​រឹប​អូស

ដោយ ឌឹ ខេមបូឌា ដេលី

បទវិភាគ

អាជ្ញាធរ​ដែល​ស៊ើប​អង្កេត​ផ្ទះ​មួយ​កន្លែង​ក្នុង​ខណ្ឌ​ទួល​គោក​ក្រុង​ភ្នំពេញ បាន​រឹបអូស​យក​ជី​និង​ថ្នាំ​សម្លាប់​សត្វ​ល្អិត​ជាង​២៦០​កេស​កាលពី​ព្រឹក​ថ្ងៃ​ពុធ បន្ទាប់ពី​អ្នក​ជិតខាង​របស់​បុរស​ចិន​រូប​នេះ​ត្អូញ​ត្អែរ​អំពី​ក្លិន​អាក្រក់​ភាយចេញ​ពី​ផ្ទះ​របស់​គាត់ ហើយ​ដែល​ពួកគាត់​បារម្ភ​ថា អាចជា​ឧស្ម័ន​គ្រោះថ្នាក់។

យោងតាម​ចៅ​សង្កាត់ លោក នៅ ភក្តី បាន​ឲ្យ​ដឹង​ថា មន្ត្រី​សង្កាត់​ទឹកល្អក់​ដំបូង​ឡើយ​បាន​ពិនិត្យ​បរិវេណ​ផ្ទះ​ជួល​នៅ​ផ្លូវ​២៤៥​កាលពី​យប់​ថ្ងៃ​អង្គារ ប៉ុន្តែ​បាន​សម្រេច​ការពារ​ផ្ទះ​នោះ និង​ត្រឡប់​មកវិញ​នៅ​ព្រឹក​បន្ទាប់ ក្រោយពី​សម្រេច​ថា ការ​ឆែកឆេរ​នៅ​ពេល​យប់​វា​គ្រោះ​ថ្នាក់​ពេក។

លោក ភក្តី បាន​និយាយ​ថា “កម្លាំង​របស់​យើង​បាន​ចាក់សោ​ផ្ទះ​នោះ​ជា​បណ្តោះ​អាសន្ន និង​បាន​ត្រឡប់​មកវិញ​នៅ​ព្រឹក​បន្ទាប់​ដើម្បី​ធ្វើ​របាយការណ៍។ ប៉ុន្តែ​យើង​ប្រាកដ​ណាស់​ថា ថ្នាំ​សម្លាប់​សត្វ​ល្អិត ឬ​ជី​ត្រូវ​បាន​គេ​ស្តុក​នៅ​ខាង​ក្នុង​ផ្ទះ​ដោយ​គ្មាន​ការ​អនុញ្ញាត”។ លោក​បាន​បន្ថែម​ថា ផ្ទះ​នោះ​ត្រូវ​បាន​ជួល​ដោយ​ជនជាតិ​ចិន អាយុ​៣២​ឆ្នាំ ឈ្មោះ វូ ជុនឈៀង។

លោក សៀង បូរិន ប្រធាន​មន្ទីរ​កសិកម្ម​ក្រុង​បាន​និយាយ​ថា អ្នក​ជំនាញ​គីមី​បាន​ចូល​អគារ​នោះ​នៅ​ម៉ោង​ប្រហែល​៩​ព្រឹក ហើយ​បាន​រក​ឃើញ​ជី​និង​ថ្នាំ​សម្លាប់​សត្វ​ល្អិត​២៦៧​កេស។

លោក បូរិន បាន​និយាយ​ថា “ទំនិញ​ទាំងអស់​បាន​នាំ​ចូល​មាន​អាជ្ញាប័ណ្ណ ប៉ុន្តែ​ស្តុក​ទំនិញ​ទាំង​នោះ​នៅ​ទីនេះ​ដោយ​គ្មាន​ការ​អនុញ្ញាត ហើយ​ជី​ប្រភេទ​នេះ​មិន​អាច​ស្តុក​នៅ​ជិត​ផ្ទះ​របស់​ប្រជាជន​បាន​ទេ ពីព្រោះ​វា​មាន​គ្រោះ​ថ្នាក់​ដល់​សុខភាព”។

លោក​បាន​និយាយ​ថា “ក្នុង​ករណី​នេះ ជី​មិន​បង្ក​គ្រោះថ្នាក់​ធ្ងន់ធ្ងរ​ទេ​…​ប៉ុន្តែ​យោង​តាម​ច្បាប់ ជី​ទាំង​នោះ​ស្តុក​ដោយ​ខុស​ច្បាប់ ដែល​អាច​ជាប់​ពិន័យ​យ៉ាងហោច​ណាស់​១០​លាន​រៀល”។ លោក​បាន​បន្ថែម​ថា សារធាតុ​គីមី​ត្រូវ​បាន​យក​ទៅ​រក្សា​ទុក​នៅ​មន្ទីរ​កសិកម្ម​ក្រុង។

យោងតាម​លោក បូរិន ដែល​បាន​និយាយ​ថា បុរស​ជនជាតិ​ចិន​រូប​នេះ​ធ្វើ​ការ​នៅ​ក្រុមហ៊ុន Li Zhen Qiu ក្នុង​ខណ្ឌ​ពោធិ៍​សែនជ័យ ដែល​នាំ​សារធាតុ​គីមី​ចូល​ បាន​ឲ្យ​ដឹង​ថា ជនជាតិ​ចិន​ដែល​ជួល​ផ្ទះ​មិន​នៅ​ផ្ទះ​ទេ ពេល​ដែល​គេ​ធ្វើ​ការ​ឆែកឆេរ​នោះ។

អ្នក​ជិតខាង ឈ្មោះ ទុង យ៉េង អាយុ​៦៧​ឆ្នាំ បាន​និយាយ​ថា អ្នក​ភូមិ​បារម្ភ​ខ្លាច​ថា ក្លិន​នោះ​ពុល។

លោក​បាន​និយាយ​ថា “ខ្ញុំ​មិន​អាច​ទ្រាំ​នឹង​ក្លិន​នេះ​​បាន​ទេ ពីព្រោះ​វា​ធ្វើ​ឲ្យ​ខ្ញុំ​ក្អក វា​ធុំ​ក្លិន​អាក្រក់​ណាស់ វា​អាច​ធ្វើ​ឲ្យ​ខូច​សុខភាព​របស់​យើង មាន​ផ្ទះ​ជាង​៤០​នៅ​ជុំវិញ​ទី​នេះ។ ដូច្នេះ​ខ្ញុំ​គិត​ថា អាជ្ញាធរ​គួរ​អនុវត្ត​ច្បាប់​ទាក់ទិន​នឹង​ករណី​នេះ”៕ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស