កាលពីម្សិលមិញ លោកនាយករដ្ឋមន្ត្រី ហ៊ុន សែន បានចាប់ផ្ដើមដំណើរទស្សនកិច្ចរយៈពេលបួនថ្ងៃទៅកាន់ទីក្រុងមូស្គូ ទីដែលលោករំពឹងថា នឹងចុះហត្ថលេខាលើកិច្ចព្រមព្រៀងទ្វេភាគីមួយចំនួន ព្រមទាំងចូលរួមក្នុងកិច្ចប្រជុំកំពូលរុស្ស៊ី-អាស៊ានផងដែរ។
យោងតាមលោក ស្រី ថាមរុង្គ រដ្ឋមន្ត្រីដែលធ្វើដំណើរក្នុងក្រុមគណៈប្រតិភូរបស់លោក ហ៊ុន សែន ដែលបាននិយាយទៅកាន់អ្នកយកព័ត៌មាននៅអាកាសយានដ្ឋានអន្តរជាតិភ្នំពេញមុនពេលចេញដំណើរកាលពីយប់ថ្ងៃច័ន្ទបានឱ្យដឹងថា លោកនាយករដ្ឋមន្ត្រីគ្រោងជួបប្រជុំជាមួយលោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ីនៅថ្ងៃព្រហស្បតិ៍អំឡុងកិច្ចប្រជុំកំពូលនោះ ហើយលោកក៏នឹងជួបប្រជុំជាមួយលោក ង្វៀន សួនភុក (Nguyen Xuan Phuc) នាយករដ្ឋមន្ត្រីថ្មីវៀតណាមដើម្បី “ពង្រឹង និងពង្រីកទំនាក់ទំនង និងកិច្ចសហប្រតិបត្តិការ” រវាងប្រទេសទាំងពីរផងដែរ។
យោងតាមលោក ស្រី ថាមរុង្គ បានឲ្យដឹងថា លោក ហ៊ុន សែន និងលោក ឌីមីទ្រី មេដវេដេវ (Dmitry Medvedev) នាយករដ្ឋមន្ត្រីរុស្ស៊ីក៏នឹងចុះហត្ថលេខាលើកិច្ចព្រមព្រៀងចំនួនប្រាំបីរវាងប្រទេសទាំងពីរផងដែរ។ លោក មេដវេដេវ បានក្លាយជាមន្ត្រីជាន់ខ្ពស់រុស្ស៊ីដំបូងចាប់តាំងពីឆ្នាំ១៩៨៧មក ដែលមកបំពេញទស្សនកិច្ចនៅកម្ពុជាដែលនៅពេលនោះលោកបានដឹកនាំគណៈប្រតិភូមកកាន់រាជធានីភ្នំពេញ និងខេត្តសៀមរាបកាលពីខែវិច្ឆិកាឆ្នាំមុន។
លោក ស្រី ថាមរុង្គ បានមានប្រសាសន៍ថា ប្រទេសទាំងពីរនឹងបង្កើតមជ្ឈមណ្ឌលព័ត៌មានរួមសម្រាប់ថាមពលនុយក្លេអ៊ែរ និងចុះហត្ថលេខាលើអនុស្សរណៈនៃការយោគយល់គ្នាស្ដីពីការបង្កើតក្រុមការងាររួមមួយក្នុងគោលបំណងដើម្បីពិនិត្យមើលថាតើថាមពលនុយក្លេអ៊ែរអាចត្រូវបានប្រើប្រាស់ដូចម្ដេចសម្រាប់ “គោលបំណងសន្តិភាព”។
យុត្តិធម៌ក៏នឹងជាប្រធានបទដ៏សំខាន់នៃកិច្ចប្រជុំផងដែរ ដោយប្រទេសទាំងពីរចុះហត្ថលេខាលើសន្ធិសញ្ញាបត្យាប័ន ព្រមទាំងអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការរវាងក្រសួងយុត្តិធម៌របស់ប្រទេសកម្ពុជា និងការិយាល័យអគ្គរដ្ឋអាជ្ញារបស់ប្រទេសរុស្ស៊ី។
ឧក្រិដ្ឋជនរុស្ស៊ីសំខាន់ៗមួយចំនួនទទួលបានការពន្យារពេលកាត់ទោសនៅក្នុងប្រទេសកម្ពុជា បើទោះជាកាលពីពេលថ្មីៗនេះមានការចាប់ខ្លួន និងការនិរទេសអ្នករត់គេចខ្លួនជនជាតិរុស្ស៊ីសំខាន់ៗមួយចំនួនក៏ដោយ។លោក សេរហ្គេ ប៉ូលុនស្គី (Sergei Polonsky)មហាសេដ្ឋីក្រុមហ៊ុនអភិវឌ្ឍន៍អចលនទ្រព្យ ដែលរស់នៅក្នុងជីវិតហ៊ឺហាក្នុងប្រទេសកម្ពុជា ត្រូវបានអនុញ្ញាតឲ្យស្នាក់នៅបីឆ្នាំបន្ទាប់ពីត្រូវបានចោទប្រកាន់ពីបទកិបកេងប្រាក់នៅក្នុងប្រទេសកំណើតរបស់ខ្លួនក្នុងឆ្នាំ២០១៣ មុនពេលត្រូវបាននិរទេសទៅវិញកាលពីឆ្នាំមុន។
លោក វ៉្លាឌីមៀ បាតាលីន (Vladimir Batalin) អតីតអ្នករត់គេចខ្លួន បច្ចុប្បន្ននេះកំពុងតស៊ូជាមួយការនិរទេសខ្លួនបន្ទាប់ពីត្រូវបានចាប់ខ្លួនក្នុងក្រុងព្រះសីហនុ តាមការចោទប្រកាន់ពីបទកិបកេងប្រាក់ជាច្រើនឆ្នាំមកនោះ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានបដិសេធមិនផ្ដល់ព័ត៌មានលម្អិតអំពីសន្ធិសញ្ញានេះទេកាលពីម្សិលមិញ។
លោក ហ៊ុន សែន និងលោក មេដវេដេវ ក៏នឹងចុះហត្ថលេខាលើកិច្ចព្រមព្រៀងស្ដីពីទូរគមនាគមន៍ និងបច្ចេកវិទ្យាព័ត៌មាន និងបង្កើតភាពជាដៃគូរវាងក្រសួងមហាផ្ទៃរុស្ស៊ី និងកម្ពុជាផងដែរ។
បំណុលដែលមានទឹកប្រាក់១,៥ពាន់លានដុល្លារដែលកម្ពុជាជំពាក់រុស្ស៊ី បានខ្ចីកាលពីអតីតសហភាពសូវៀតបន្ទាប់ពីការផ្ដួលរំលំរបបខ្មែរក្រហមក្នុងឆ្នាំ១៩៧៩នោះ មិនស្ថិតនៅក្នុងរបៀបវារៈផ្លូវការទេ។
លោកនាយករដ្ឋមន្ត្រី ហ៊ុន សែន បានបង្ហាញកម្មវិធីដំណើរទស្សនកិច្ចរបស់លោកនៅក្នុងទំព័រហ្វេសប៊ុកកាលពីម្សិលមិញ។
លោកបានសរសេរថា “ថ្ងៃនេះ យើងមានកម្មវិធីពេញ ហើយព្រឹកស្អែកយើងនឹងជួបជាមួយក្មួយប្រុស ក្មួយស្រីដែលជានិស្សិតខ្មែរស្នាក់នៅក្នុងប្រទេសរុស្ស៊ី”៕ សារុន (រាយការណ៍បន្ថែមដោយ Taylor O’ Connell)