យោងតាមក្រសួងបរិស្ថានឲ្យដឹងថា ប្រជាជនប្រហែល១០០គ្រួសារទៀតបានទទួលយកកញ្ចប់សំណងពីក្រុមហ៊ុន Union Development Group (UDG) ដើម្បីរើទីលំនៅ និងបើកផ្លូវឲ្យគម្រោងអភិវឌ្ឍន៍ដ៏ធំ ដែលក្រុមហ៊ុនចិនកំពុងសាងសង់តាមបណ្តោយឆ្នេរខេត្តកោះកុង។
ក្រុមហ៊ុន UDG បានជំរុញប្រជាជនប្រហែល១.០០០គ្រួសារឲ្យចេញពីផ្ទះសំបែងរបស់ពួកគាត់រួចហើយ ដើម្បីបើកផ្លូវសម្រាប់សាងសង់ទីតាំងទេសចរណ៍របស់ខ្លួនដែលមានផ្ទៃដីទំហំ៤៥.០០០ហិកតាក្នុងតម្លៃ៣,៨ពាន់លានដុល្លារ។
លោក ស៊្រុន ដារិទ្ធ នាយរងខុទ្ទកាល័យក្រសួងបរិស្ថាន បាននិយាយកាលពីថ្ងៃអង្គារថា ប្រជាជនប្រហែល១០០គ្រួសារដែលមិនទាន់រើចេញពីទីតាំងនោះ បានទទួលយកសំណើចុងក្រោយរបស់ក្រុមហ៊ុន ដែលរួមមានដីចម្ការពីរហិកតានិងដីឡូតិ៍ទំហំ៥.០០០ម៉ែត្រក្រឡា ដែលនឹងសាងសង់ផ្ទះថ្មីនៅកន្លែងតាំងទីលំនៅថ្មីនោះ។
លោកបាននិយាយថា “ពីរបីថ្ងៃកន្លងមកហើយ យើងបានសម្របសម្រួលនិងឈានដល់ដំណោះស្រាយមួយជាមួយប្រជាជនប្រហែល១០០គ្រួសារ ហើយភាគីទាំងសងខាងបានព្រមព្រៀងគ្នា”។
លោក ស៊ីម គឹមសេន ដែលគ្រួសាររបស់គាត់ស្ថិតក្នុងចំណោម២២គ្រួសារក្នុងភូមិនឹងទទួលយកសំណើនេះ បាននិយាយថា កញ្ចប់នេះក៏មានបញ្ចូលសំណង៣០ដុល្លារក្នុងដើមឈើហូបផ្លែដែលខាតបង់មួយដើម និងរវាង៣.០០០ដុល្លារទៅ២០.០០០ដុល្លារសម្រាប់ផ្ទះរបស់គ្រួសារទាំងនោះ ទៅតាមទំហំផ្ទះ។ លោកបាននិយាយថា ក្រុមហ៊ុនបានព្រមព្រៀងផ្តល់បន្ថែមស៊ីម៉ងតិ៍ ខ្សាច់មួយចំនួន និងសម្ភារសំណង់ដែរ។
លោក គឹមសេន បាននិយាយថា “២២គ្រួសារបានទៅទទួលប្រាក់ពីក្រុមហ៊ុនចិនកាលពីថ្ងៃទី១៥ខែឧសភា។ ខ្ញុំបានព្រមរើផ្ទះ ពីព្រោះខ្ញុំគិតថា ក្រុមហ៊ុនបានផ្តល់សំណងសមរម្យ ហើយខ្ញុំគិតថា ដីរបស់ខ្ញុំសព្វថ្ងៃមិនមានប័ណ្ណកម្មសិទ្ធិទេ។ យើងនឹងរើទៅកន្លែងថ្មី នៅពេលក្រុមហ៊ុនបញ្ចប់ការឆ្ការដីរួចរាល់”។
ប៉ុន្តែលោកបាននិយាយអំពីប្រាំគ្រួសារក្នុងភូមិរបស់គាត់ដែលបានបដិសេធមិនទទួលយកសំណើនេះ។
លោក ប្រាក់ ថន សមាជិកម្នាក់ក្នុងគ្រួសារមួយចំណោមគ្រួសារទាំងនោះ បាននិយាយថា លោកនិងគ្រួសារដែលមិនទទួលយកការព្រមព្រៀងផ្សេងទៀតមិនចូលចិត្តកន្លែងតាំងលំនៅថ្មីនោះទេ ហើយកំពុងទទូចចង់ឲ្យក្រុមហ៊ុន UDG ឲ្យពួកគាត់នៅកន្លែងដដែល។
លោកបាននិយាយថា “ខ្ញុំមិនចង់ទទួលយកសំណង ឬរើទៅកន្លែងថ្មីទេ ពីព្រោះ កន្លែងយើងនៅសព្វថ្ងៃ វាងាយស្រួលរកស៊ីនិងចិញ្ចឹមសត្វ។ កន្លែងនៅថ្មីនៅជិតជើងភ្នំ។ មិនមានទឹកប្រើប្រាស់ និងពិបាកចិញ្ចឹមសត្វណាស់”។
លោក អិុន គង់ជិត មន្ត្រីសម្របសម្រួលរបស់អង្គការសិទ្ធិមនុស្សលីកាដូប្រចាំខេត្តកោះកុង បាននិយាយថា ក្រុមហ៊ុន ដែលមានការប្រឈមមុខតានតឹងនិងហិង្សាបួនប្រាំលើកជាមួយគ្រួសារប្រជាជនដែលរស់នៅលើការដ្ឋានគម្រោង បានបន្ទន់ឥរិយាបថដោះស្រាយរបស់ខ្លួនចុងក្រោយនេះ។
លោកបាននិយាយថា “ក្រុមហ៊ុនចិនបានប្តូរឥរិយាបថរបស់ខ្លួនក្នុងការចរចាជាមួយអ្នកភូមិ។ កាលពីមុន ក្រុមហ៊ុននេះតែងតែប្រើកម្លាំងនិងអំពើហិង្សា ហើយមិនដែលចរចាទេ”។
តំណាងក្រុមហ៊ុន UDG មិនអាចទាក់ទងសុំការអត្ថាធិប្បាយបានទេ៕ និត