29 C
Phnom Penh

រដ្ឋមន្ត្រី​ក្រសួង​ការងារ​ព្រមាន​មន្ត្រី​ទាក់ទិន​នឹង​ប័ណ្ណការងារ​ជន​បរទេស

ដោយ ឌឹ ខេមបូឌា ដេលី

បទវិភាគ

លោក អិុត សំហេង រដ្ឋមន្ត្រី​ក្រសួង​ការ​ងារ​និង​បណ្តុះ​បណ្តាលវិជ្ជាជីវៈ កាលពី​ថ្ងៃ​ព្រហស្បតិ៍ បាន​ព្រមាន​មន្ត្រី​អំពី​ការ​រៀបចំ​បែប​បទ​ប័ណ្ណ​ការងារ​សម្រាប់​បុគ្គលិក​បរទេស ឲ្យ​ប្រកាន់​ខ្ជាប់់​យ៉ាងម៉ឹងម៉ាត់​នូវ​ច្បាប់​និង​បទប្បញ្ញត្តិ​ពាក់ព័ន្ធ​ទាំង​អស់ បើ​ពុំ​នោះ​ទេ​ប្រឈម​នឹង​ការ​ចុះ​មក​ពិនិត្យ​ពី​សំណាក់​អង្គភាព​ប្រឆាំង​អំពើ​ពុក​រលួយ។

នៅ​ពេល​ថ្មីៗ​នេះ រដ្ឋាភិបាល​បាន​ចាប់​ផ្តើម​ពង្រឹង​ការ​អនុវត្ត​បទ​ប្បញ្ញត្តិ​ច្បាប់​ដែល​ចេញ​យូរ​មក​ហើយ​ប៉ុន្មាន​តែច្រើនតែ​មិន​អនុវត្ត ដែល​តម្រូវ​ឲ្យ​បុគ្គលិក​បរទេស​ទាំង​អស់​ក្នុង​ប្រទេស​នេះ​កាន់​ប័ណ្ណ​ការងារ ហើយ​ការ​នេះ​បណ្តាល​ឲ្យ​មាន​ភាព​ច្របូក​ច្របល់​និង​ការ​ធុញ​ទ្រាន់​នៅ​ទូទាំង​សហគមន៍​ជន​បរទេស​នៅ​កម្ពុជា។

ថ្លែង​នៅ​ពេល​បញ្ចប់​ការ​ប្រជុំ​ប្រចាំ​ឆ្នាំ​រយៈ​ពេល​ពីរ​ថ្ងៃ​របស់​ក្រសួង​ការងារ​ក្នុង​ក្រុង​ភ្នំពេញ លោក អិុត សំហេង បាន​មាន​ប្រសាសន៍​ថា មន្ត្រី​មាន​”ភាព​ចន្លោះ​ប្រហោង”​ខ្លះ​ក្នុង​ការ​ចេញ​ប័ណ្ណ​នេះ។

លោក​បាន​មាន​ប្រសាសន៍​ថា “នេះ​ជា​បញ្ហា​រសើប ពីព្រោះ​នៅ​ពេល​ដែល​ជន​បរទេស​មាន​បញ្ហា​តូច​មួយ ពួកគេ​ស្រែក និងមួម៉ៅ ហើយ​​វា​នឹង​ប៉ះពាល់​ដល់​ការ​វិនិយោគ។ ដូច្នេះ​យើង​ត្រូវ​អនុវត្ត​យ៉ាង​ទៀងទាត់​និង​ត្រឹមត្រូវ។ យើង​ត្រូវ​ពិនិត្យ​ការ​ពិន័យ​និង​ទោស​ទណ្ឌ​ដោយ​យក​ចិត្ត​ទុក​ដាក់។

លោក​បាន​មាន​ប្រសាសន៍​ថា “ក្នុង​ខេត្ត​មួយ​ចំនួន មាន​ភាព​ចន្លោះ​ប្រហោង​ច្រើន​ក្នុង​ការ​អនុវត្ត ដូច្នេះ​នៅ​ឆ្នាំ​នេះ យើង​ត្រូវ​អនុវត្ត​ឲ្យ​បាន​ត្រឹមត្រូវ​និង​កុំ​ឲ្យ​មាន​ភាព​ចន្លោះ​ប្រហោង។ នៅ​ពេល​មន្ត្រី​ធ្វើ​ខុស ពួកគេ​ត្រូវ​ទទួល​ខុស​ត្រូវ​ដោយ​ខ្លួន​ឯង ដូច្នេះ​ត្រូវ​ប្រយ័ត្ន។ ពេលណា​អង្គភាព​ប្រឆាំង​អំពើ​ពុក​រលួយ​រក​ឃើញ​កំហុស គ្មាន​នរណា​អាច​ជួយ​អ្នក​បាន​ទេ”។

យោងតាម​ក្រសួង​ការងារ​បាន​ឲ្យ​ដឹង​ថា កាលពី​ឆ្នាំ​មុន​រដ្ឋាភិបាល​បាន​ចេញ​ប័ណ្ណ​ការងារ​ចំនួន​២០.០០០ កើន​ពី​៨.០០០​ពី​មួយ​ឆ្នាំ​មុន។

ថ្លែង​ទៅ​កាន់​អ្នក​យក​ព័ត៌មាន​បន្ទាប់ពី​ការ​ប្រជុំ​កាលពី​ថ្ងៃ​ព្រហស្បតិ៍ លោក​ អិុត សំហេង បាន​ពន្យល់​បន្ថែម​បន្តិច​លើ​សេចក្តី​ប្រកាស​របស់​លោក​នៅ​ថ្ងៃ​មុន​ថា រោងចក្រ​កាត់ដេរ​បាន​ទទួល​ការ​ព្រមាន​ចំពោះ​ការ​រំលោភ​ច្បាប់​ការងារ​ក្នុង​ឆ្នាំ​២០១៤។

លោក​បាន​មាន​ប្រសាសន៍​ថា ការ​ព្រមាន​បាន​ធ្វើ​ឡើង​នៅ​រយៈ​ពេល​ប្រាំមួយ​ខែ​ចុង​ក្រោយ​​នៃ​ឆ្នាំ​មុន ហើយ​ថា រោងចក្រ​នឹង​មាន​ពេល​មួយ​ខែ​ទៅ​បី​ខែ​ដើម្បី​កែ​កំហុស​របស់​ខ្លួន បើ​ពុំនោះ​ទេ​នឹង​ប្រឈម​ការ​ពិន័យ​ជា​ប្រាក់​ពី​មួយ​លាន​រៀល​ទៅ​បួន​លាន​រៀល។

ប៉ុន្តែ​លោក​រដ្ឋមន្ត្រី​មិន​ព្រម​ប្រាប់​ឲ្យ​ដឹង​ ថា​រោងចក្រ​ណាមួយ​ដែល​មិន​ព្រម​ធ្វើ​តាម​ទេ ព្រោះ​ខ្លាច​ខូច​កេរ្តិ៍​ឈ្មោះ​រោងចក្រ​ទាំង​នោះ។ “វា​នឹង​ប៉ះពាល់​កេរ្តិ៍​ឈ្មោះ​ ការ​នាំចេញ​និង​កម្មករ​របស់​រោងចក្រ ដូច្នេះ​គួរ​កុំ​ផ្សព្វ​ផ្សាយ​វា​អី”៕ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស