ឧទ្យានុរក្សមួយក្រុមមានគ្នា៥៦នាក់ មកពីក្រសួងបរិស្ថានកាលពីសប្ដាហ៍មុនបានបញ្ចប់វគ្គបណ្ដុះបណ្ដាលរយៈពេល១ខែក្នុងរាជធានីភ្នំពេញ ដែលរៀបចំឡើងដោយកងយោធពលខេមរភូមិន្ទ ដើម្បីជួយសង្គ្រោះតំបន់ការពារក្នុងប្រទេសកម្ពុជាពីការកាប់ឈើខុសច្បាប់ ដែលជាវគ្គបណ្ដុះបណ្ដាលលើកទី១សម្រាប់ឧទ្យានុរក្សក្នុងប្រទេសកម្ពុជា។
លោក សៅ សុភាព អ្នកនាំពាក្យក្រសួងបរិស្ថានបានមានប្រសាសន៍កាលពីម្សិលមិញថា ឧទ្យានុរក្សទាំងនេះមកពីតំបន់ការពារចំនួន២៣ស្ថិតនៅក្រោមយុត្តាធិការក្រសួង និងអ្នកផ្សេងទៀតស្ថិតក្រោមការគ្រប់គ្រងរបស់ក្រសួងកសិកម្ម ហើយបានបញ្ចប់វគ្គបណ្ដុះបណ្ដាលរបស់ខ្លួនកាលពីថ្ងៃព្រហស្បតិ៍។
បើទោះជាឧទ្យានុរក្សទាំងនេះទទួលបានការបណ្ដុះបណ្ដាលមុនៗពីក្រសួងនេះ និងអង្គការមិនមែនរដ្ឋាភិបាលក៏ដោយ ក៏លោក សៅ សុភាព បានមានប្រសាសន៍ថា នេះគឺជាលើកទី១ហើយដែលកងយោធពលខេមរភូមិន្ទបានចូលរួម។
វគ្គបណ្ដុះបណ្ដាលរយៈពេល១ខែដែលរៀបចំឡើងដោយលោក សាយ សំអាល់ រដ្ឋមន្ត្រីក្រសួងបរិស្ថាន និងលោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន ដែលជានាយរងសេនាធិការចម្រុះនៃកងយោធពលខេមរភូមិន្ទ និងជាប្រធានក្រុមការងារប្រយុទ្ធប្រឆាំងភេរវកម្មក្រសួងការពារជាតិ។
អ្នកនាំពាក្យរូបនេះបានមានប្រសាសន៍ថា “យើងមានការព្រមព្រៀងជាមួយសេនាធិការចម្រុះកងយោធពលខេមរភូមិន្ទ និងក្រុមការងារជាតិប្រយុទ្ធប្រឆាំងភេរវកម្ម ដើម្បីធ្វើឲ្យការល្បាតនៅក្នុងតំបន់ការពាររបស់យើងកាន់តែប្រសើរឡើង ជាពិសេសដើម្បីកាត់បន្ថយបទឧក្រិដ្ឋព្រៃឈើ។ យើងសង្ឃឹមថា សិក្ខាកាមទាំងនេះនឹងចែករំលែកនូវអ្វីដែលពួកគេបានរៀនជាមួយឧទ្យានុរក្សដទៃទៀត”។
លោកបានបន្ថែមថា ឧទ្យានុរក្សទាំងនេះបើទោះជាមិនមានអាវុធក៏ដោយ ក៏ពួកគេអាចធ្វើការចាប់ខ្លួនបានដែរ ហើយត្រូវរាយការណ៍ពីការកាប់ឈើខុសច្បាប់ដល់នគរបាល។ លោកបានមានប្រសាសន៍ថា ទោះយ៉ាងណា ឧទ្យានុរក្សទាំងនេះបានរៀនជំនាញដ៏មានតម្លៃ រួមទាំងរបៀបរស់នៅក្នុងព្រៃឈើរយៈពេលជាច្រើនថ្ងៃ ប្រសិនបើពួកគេវង្វេងផ្លូវនៅពេលល្បាតជាដើម។
ការកាប់ឈើខុសច្បាប់កើតមានទូទៅក្នុងឧទ្យានជាតិ ដែនជម្រកសត្វព្រៃ និងព្រៃការពារក្នុងប្រទេសកម្ពុជា។ ក្រុមអ្នកភូមិ និងអង្គការមិនមែនរដ្ឋាភិបាលបានកត់សម្គាល់ឃើញថា ទាហាន និងឧទ្យានុរក្សដែលទទួលបន្ទុកក្នុងកិច្ចការរបស់ខ្លួនតែងតែជាអ្នកជាប់ពាក់ព័ន្ធ ហើយត្រូវបានចាប់ខ្លួនខណៈដែលដឹកឈើខុសច្បាប់ឆ្លងកាត់ប្រទេស។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តមណ្ឌលគិរីដែលជាចំណុចក្ដៅនៃការកាប់ឈើខុសច្បាប់នៅក្នុងប្រទេសកម្ពុជាបានមានប្រសាសន៍ថា វគ្គបណ្ដុះបណ្ដាលថ្មីៗនេះនឹងគ្មានអ្វីផ្លាស់ប្តូរឡើយបើគ្មានឆន្ទៈក្នុងការលុបបំបាត់អាជីវកម្មខុសច្បាប់នៅថ្នាក់កំពូលៗក្នុងជួររដ្ឋាភិបាលទេនោះ។
លោកបានមានប្រសាសន៍ថា “យើងឃើញថា លោកនាយករដ្ឋមន្ត្រីបានចេញបញ្ជាឲ្យចាត់វិធានការប្រឆាំងបទល្មើសព្រៃឈើពីមុនមក ប៉ុន្តែនៅតែបន្តមានដដែល ពីព្រោះអាជ្ញាធរមូលដ្ឋានមិនបានអនុវត្តបទបញ្ជានោះឡើយ។
លោក សៅ សុភាព បានមានប្រសាសន៍ថា កងយោធពលខេមរភូមិន្ទជាស្ថាប័នមួយមានគុណសម្បត្តិគ្រប់គ្រាន់ក្នុងការបណ្ដុះបណ្ដាលអ្នកដទៃទៀតពីការប្រយុទ្ធប្រឆាំងការកាប់ឈើខុសច្បាប់។
លោកបានមានប្រសាសន៍ថា “យើងមិនអាចនិយាយថា កងយោធពលខេរមភូមិន្ទបានធ្វើខុសទេ គឺបុគ្គលតែបុណ្ណោះ។ ដូច្នេះបុគ្គលទាំងនោះត្រូវប្រឈមមុខនឹងច្បាប់”៕ សារុន (រាយការណ៍បន្ថែមដោយ Zsombor Peter)